85
Oturutoh Ritonõpo a kure rokẽ ehtoh poko
Kora tõ nymerohpyry, tokarose eremiaketõ tuisary a.
1 Ritonõpo yna Esemy, kure rokẽ mexiase
sero ononory poko;
Izyraeu tõ tonehpose ropa oya,
tomãkapose roropa toto oya.
2 Opoetory tõ rypyry emero tykorokase oya,
popyra toto ehtopõpyry onenepyra toehse mase.
3 Toto zehno pyra toehse ropa mase,
tohne oehtopõpyry wino toeramase ropa.
4 Yna enehko ropa, Ritonõpo yna Pynanohne,
penekehpyra exiko opoetory tõ poko!
5 Jũme yna zehno exikehpyra hma?
Zehno oehtoh jũme exikehpyra hnae?
6 Yna jamihtanohpoko ropa, morarahtao
yna, opoetory tomo atãkyemãko ropa ynanase.
7 Ritonõpo yna Esemy yna pyno oehtoh enepoko
yna a, yna ipynanohko roropa.
8 Ritonõpo omiry etãko ase;
kyya xine, typoetory tomo a tõmiry etapõko mana
kuewomarykõ poko, torẽtyke pyra kuehtohkõme
eramara ropa kuahtao xine
ajoajohpe kuehtohkõ pokona ropa.
9 Ajohpe pyra, tõmihpyry omipona se
exiketõ pynanopyry se Ritonõpo mana,
kynonorykõ po exikehpyra toehtohme,
Kypynanohnekõme.
10 Kypyno xine Ritonõpo ehtoh anamonohpyra
aehtoh maro oseporỹko mã toto;
zae aehtoh, osepeme se toehtoh maro
oseahmãko mã toto.
11 Amonohpyra ahno ehtoh ahtãko mana
sero nono po porehme.
Zae Exiketyme, Ritonõpo kuenetorỹko mana kapu poe.
12 Kyya xine kure ehtoh ekarõko
Ritonõpo Kuesẽkõ mana.
Mame kynonorykõ po tykyrysã ahtãko,
itamurume exĩko mana.
13 Zae ehtoh Ritonõpo esemazupurume ytõko
Kuesẽkõ esemaryme, aytotohme kukurohtaka xine.