40
Anôtônê biŋ gêjam malô Sionŋa
1 Nêm Anôtô kêsôm gebe
“Anam malô, anam malô ŋoc lau.
2 Asôm biŋ malôgeŋ êndêŋ Jerusalem
ma amôêc êndêŋ eŋ
gebe ênê sakiŋ gêŋômaŋa ŋatêm gêbacnê
ma sêsuc ênê keso ŋatôp ôkwi,
gebe Apômtau lêma kêkêŋ ŋagêjô kêlêlêc su
gêjô ênê sec samob.”
3 Awa teŋ gêmôêc gebe
“Amansaŋ Apômtaunê gamêŋ êsêlêŋ êsaŋa aŋga gamêŋ sawa
to amêtôc intêna êtu solop aŋga gamêŋ ŋakeleŋ êtu nêŋ Anôtôŋa.
4 Gaboaŋ samob oc êôc sa
ma lôc to gamêŋ ŋabau êtu tapa
ma sêmêtôc ŋapoalic êtu solop
ma sêmansaŋ gamêŋ kaloŋ-kaloŋ ŋatip êsa.
5 Go Apômtaunê ŋawasi oc eoc tau lasê
ma ŋamalac pebeŋ oc sêlic gêŋ tau sêwiŋ tauŋ
gebe Apômtaunê awa kêsôm biŋ tau.”
6 Awa teŋ kêsôm gebe “Ômôêc.”
Ma aê kasôm gebe “Jamôêc asageŋ.”
“Gêŋ nomŋa samob kêtôm gêgwaŋ
ma ŋamalacnêŋ gêlôŋ samob kêtôm ŋaola kômŋa.
7 Êndêŋ taŋ Apômtau êju nê awajaô naŋ,
gêgwaŋ êmêliŋ ma ŋaola êsêlic.
Biŋŋanô, lau têtôm gêgwaŋ.
8 Gêgwaŋ kêmêliŋ ma ŋaola kêsêlic,
mago aêacnêŋ Apômtaunê biŋ oc ênêc endeŋ tôŋgeŋ.”
9 O Sion, jaeŋwaga ŋawae ŋajamŋa,
ôpi lôc baliŋ teŋ ôna.
O Jerusalem, jaeŋwaga ŋawae ŋajamŋa,
ôpuc awam sageŋ.
Ôsôm êndêŋ malac Judaŋa gebe “Alic nêm Anôtô tonec.”
10 Alic acgom, Apômtau Anôtô gêmêŋ toŋaclai
ma eŋ tau lêma gêjam gôliŋ gêŋ samob.
Alic acgom, lau taŋ eŋ kêku êsêac atom tulu naŋ, sêwiŋ eŋ
ma lau, taŋ gêjam kôm kêpi êsêac naŋ, sêmuŋ eŋ.
11 Eŋ oc eŋgeŋ nê domba êtôm ŋacgejob
ma êsip domba ŋalatu tamiŋ bôdagi,
go êwê ŋatêna malôgeŋ.
Israelnêŋ Anôtônê dôŋ masi
12 Asa kêkati gwêc ŋa lêma ma gêjam dôŋ
ma kêsaka undambê.
Asa gêjam dôŋ nom ŋakekop kêsêp bakep
ma gê dôŋ lôc samob to kêsaê gamêŋ ŋabau ŋaŋawapac.
13 Asa gêjam gôliŋ Apômtaunê ŋalau
ma mêtêmôkê ondoc kêdôŋ eŋ.
14 Eŋ gêjam kênac asa gebe êwa biŋ sa êndêŋ eŋ
ma asa kêtôc intêna mêtôc gêdêŋŋa gêdêŋ eŋ
ma kêdôŋ kauc gêdêŋ eŋ
ma kêtôc intêna êjala gêŋ ŋamŋa gêdêŋ eŋ.
15 Alic acgom, tenteŋlatu têtôm bu ŋatetep, taŋ kêsap bakep tôŋ naŋ,
ma têtôm kekop, taŋ lau sênam dôŋ êtôm atom naŋ.
Alic acgom, nuc ŋawapac kêtôm gêŋgambu teŋ.
16 Ka Lebanonŋa kêtôm gebe sênac pac êtu dajaŋa
ma bôc Lebanonŋa kêtôm gebe êtu daja tau atom.
17 Eŋ gêlic tenteŋlatu samob amboac gêŋ ŋaôma
gêlic êsêac têtôm gêŋ teŋ atom.
18 Amac alic Anôtô kêtôm asa,
ma anam dôŋ eŋ êpi asageŋ.
19 Anam dôŋ eŋ êpi gwam me.
Ŋacmêtê kêpac gêŋ tau,
ma ŋac-kêpac-goldwaga kêkwa gêŋ tau auc ŋa gold
ma kêmasaŋ kapoacwalô silberŋa kêtu gêŋ tauŋa.
20 Ŋac ŋalêlôm sawa oc êjaliŋ ka ŋajaŋa teŋ sa gebe êtu namuc atom
ma êtap kwalam laŋgwa teŋ sa,
gebe êsap ŋakatu teŋ taŋ êkô ŋaŋêŋgeŋ naŋ.
21 Amac ajala atom me. Amac aŋô atom me.
Êsêac sêjac miŋ biŋ tau gêdêŋ amac gêdêŋ andaŋgeŋŋa su atom me.
Amacnêm kauc kêsa gêdêŋ Anôtô kêkêŋ nom naŋ, atom me.
22 Eŋ taugeŋ gêŋgôŋ nom ŋamadiŋ lôlôcŋa ŋaô
ma gêlic ŋamalac têtôm wagô
ma kêlaiŋ umboŋ kêtôm obo teŋ,
go gêlam gêŋ tau kêtôm becobo, gebe lau sêŋgôŋ ŋalabu.
23 Eŋ gêgôm kasêga têtu gêŋ ŋaôma
ma gôliŋwaga nomŋa têtôm gêŋ ŋanô masi.
24 Sêsê êsêac ma sêpôŋ êsêac
ma ŋawakac keseleŋ kêsêp nom,
go eŋ gêju awajaô kêpi êsêac e gacgeŋ sêmêliŋ
ma mulai kêlai êsêac sa amboac gêŋgambu.
25 Ŋac dabuŋ tau kêsôm gebe Amac oc anam dôŋ aê êpi asa,
ma aêagêc asa atôm tauŋ.
26 Aôc matemanô sa êpi lôlôc ma alic.
Asa kêkêŋ utitalata samob tônê ŋai.
Ŋac, taŋ gêwê êsêac totoŋ-totoŋ sêsa sêmêŋ
ma kêsam êsêac samob nêŋ ŋaê naŋ,
nê ŋaclai kapôêŋ ma eŋ Ŋaniniŋ Ŋatau,
tec nêŋ teŋ gêjaŋa atom.
27 Aôm kôsôm gebe “Ŋoc lêŋ kêsiŋ tau gêdêŋ Apômtau
ma ŋoc Anôtô gêôc lêlêc ŋoc biŋ, taŋ taêc kêka naŋ.”
O Jakob, aôm kôsôm biŋ tonaŋ kêtu ageŋŋa,
o Israel, aôm kôtaŋ taŋiboa tonaŋ kêtu ageŋŋa.
28 Amac ajala to aŋô biŋ tonec atom me gebe
Apômtau eŋ Anôtô teŋgeŋŋa.
Eŋ kêkêŋ nom ŋamadiŋ samob.
Eŋ oc êtu goloŋ atom ma têkwa êmbac atom.
Aêac tatôm gebe takip ênê kauc êjala biŋŋa ŋam sa atom.
29 Eŋ kêkêŋ ŋaclai gêdêŋ lau tekweŋ gêbac
ma ŋajaŋa gêdêŋ lau palê-palê.
30 Lau matac oc têtu goloŋ ma tekweŋ êmbac,
ma ŋapalê wakuc oc sêu tauŋ,
31 mago êsêac, taŋ taêŋ kêka Apômtau naŋ, oc têtap ŋaclai wakuc sa.
Êsêac oc sêkêŋ magê amboac momboaŋ.
Êsêac oc sêlêti, mago tekweŋ êmbac atom,
êsêac oc sêsêlêŋ, mago têtu goloŋ atom.