9
Ɠimalai ɠa toligi wosu
1 Ɠimalai ná-pɛlɛi loni,
é ma ɓɛdɛ dɔfelaiti saɠani.
2 É toganiiti paani, é dɔɔi ɠɛʋele ɓɛtɛ,* Folo ɠulazu ʋele yooiti su, ti ɓena dɔɔi zupu ga ani maku nɛɛnɛgiti, nii a kɛ ti ta ʋɛɛ ná-nɛɛi ʋa (Eza 5:22).
é taɓalii ɠaaɓɛtɛni.
3 É ná-botiɠɛ anzanuiti teʋeni toli bosuʋɛ,
ti lɛɛni adaʋɛti, ɗa ɠɛ ná, è zɛlɛ taai maazu, ti ɗa ɠɛ:
4 «Wɔiti wo la dɛ faa mɔinmɔin kwɛɛ, à ʋaa lɛɛ ʋɛ.»
É boni naati ma, niiti ti la ɠeleɠeleni, é ɠɛ:
5 «À ʋa, à nà-ɓului ta mi,
à dɔɔi ɓɔle, nii gè supuai.
6 À ɠɛlɛ nuiti ta-ziɛpolui ʋa, niiti ti la dɛ faa mɔinmɔin kwɛɛ, wa zɛnvui wo.
À ziɛ ga keleɠele pelei!
7 Zɔi a zelii lo waso nui ma, naa ɠa ɗa bɛlɛlalai zɔlɔɔ,
zɔi a nu ɲɔi maaɠolo, naa ɠa ɗa poomugi zɔlɔɔ.
8 Mina ɲɛɛɠulasu nui zɔgi wo ma, mazɔlɔɔ toɠa è wɔinzeɠe,
kɛlɛ ɠima nui zɔgi wo ma, toɠa è nɛɛ ʋɛ.
9 Ungo, ɠima nui lɛnɛ, ta ɠa ɓɔ ná-ɠimalai ʋa.
Telebo nui ɠala, ta ɠa ɓɔ ná-faaɠwɛgi ʋa.
10 Ɠimalai lɔɔzeigi† Wɛlɛ 1:7 zu, ta suɠulazuʋɛ. ɠa é ga Ɠɔoɠɔ GALAGI ɠaazuluabai,
è GALA Ɲadegai ɠwɛɛ, é ga kidafaawui.‡ È GALA Ɲadegai ɠwɛɛ: Tanigaa ta bosu ga: nu ɲadegaiti ta-vaaɠwɛgi.
11 Mazɔlɔɔ nɔ̀un nà, ɠimalai, sàɓu zu,
è-zii ma voloiti su ɠa ɠooza,
è-zii ma ɠonagiti suɠooza.§ Wɛlɛ ʋɛ: 3:18.
12 Ni ɗa ga ɠima nu, ɗa suɠulanumai zɔlɔɔ,
ni ɗa ga waso nu, ɗa ɠila kpe ka ɗa sulɔnɔgi zɔlɔɔ.»
Titigi ɠa toligi wosu
13 Titigi ɠa ga eɠɛ anzanui é zɔngɔzu,
é la faa ɠaaɠaazu, é la faa ɠwɛɛ.
14 Toɠa zeini ná-pɛlɛlaʋɛ,
seizuʋɛ ɠa ga adaʋɛti ti zɛlɛgai taai maazu.
15 É ɗa teʋe nuiti toli,
niiti ti liizu ga pele zakpai,
16 «Zɔi é la dɛ faa mɔinmɔin kwɛɛ, naa ɠale ma, é ʋa ʋɛ!»
Zɔi balagai ɠigi ma, é ɠɛ naa ma:
17 «Ziɛi unmaai nɛɛ ʋɛ,
daamianigi é miizu dɔɔɠuzu, naa nɛɛ ʋɛ!»
18 Ti la suɠwɛɛ ga ta ta li laazu gɔvɛiti ma,
niiti anzanui naa ti lolisu, naati ta niina gɔvɛalaazu.