Song 19
Ol samting God i wokim i save soim yumi biknem bilong em
Devit i raitim dispela song. Em i song bilong man i bosim musik.
1 Skai Sng 8.1, 50.6, Ro 1.19-20 i soim yumi olsem
God em i nambawan tru.
Olgeta samting bilong antap
i soim yumi
gutpela wok bilong em.
2 Olgeta Sng 74.16, 139.12 de i save tokaut
long dispela samting.
Na olgeta nait i tokim yumi gen.
3 Tulait na tudak i no gat maus
na i no inap toktok.
Yumi no save harim nek
bilong dispela tupela samting.
4 Tasol Ro 10.18 tulait na tudak
i skulim ol manmeri
long olgeta hap bilong graun.
Na tok bilong tupela
i go inap long olgeta ples.
Long skai God i sanapim
wanpela haus sel bilong san.
5 San i kam ausait,
olsem man i marit na i belgut
na i lusim rum bilong en
na i kam ausait.
San i save amamas
na bihainim rot bilong en,
olsem man bilong ran
i redi long resis.
6 San Sng 113.3 i save kamap
long arere bilong skai
na i wokabaut i go long hapsait.
I no gat wanpela samting
inap hait long hat bilong en.
7 Lo Sng 119.130 bilong Bikpela em i stret olgeta,
na i save givim
nupela laip long yumi.
Tok bilong Bikpela em i samting
yumi inap bilip tru long en.
Em i save givim gutpela tingting
long ol man i no gat planti save.
8 Bikpela Sng 12.6, 36.9, 119.128 i save skulim yumi
long gutpela tok tumas.
Dispela tok i save mekim
bel bilong yumi i amamas.
Lo bilong God i nambawan tru,
na i givim gutpela save long yumi.
9 Man Sng 119.138, 119.142 i lotu long Bikpela
em i mekim gutpela pasin.
Na dispela pasin
i save stap oltaim oltaim.
Bikpela i save tokim yumi
long olgeta pasin
yumi mas mekim,
na dispela tok i tru
na i stret olgeta.
10 Tok Sng 119.72, 119.103, 119.127 bilong Bikpela i winim gol.
Em i winim gol i gutpela tru,
olsem na yumi mas laikim
dispela tok moa moa yet.
Lo bilong Bikpela i swit tumas,
na i winim hani.
Em i winim tru
gutpela switpela hani.
11 Lo Sng 17.4 bilong yu i givim save
long mi, wokman bilong yu.
Mi bihainim lo bilong yu,
olsem na yu save mekim
sindaun bilong mi
i kamap gutpela tru.
12 Tasol Sng 40.12, 51.1-2, 90.8 husat inap save
long olgeta rong bilong em yet?
Mi mekim sampela rong
em mi no save long ol,
olsem na yu mas rausim
ol dispela rong
na mekim mi i kamap klin
long ai bilong yu.
13 Mi Sng 18.32, 25.11, 119.133 wokman bilong yu,
na yu mas was gut long mi,
bai mi no ken bikhet.
Yu no ken larim pasin bilong bikhet
i bosim mi.
Olsem na bai mi stap stret
na mi no mekim bikpela rong.
14 Bikpela, Sng 18.2, 31.5, 104.34 mi laik bai tok bilong mi
na tingting bilong mi
i ken i orait long ai bilong yu.
Bikpela, yu ples hait bilong mi
na helpim bilong mi.