AMOS
(The Book of Amos)
Amos Cabu Kawng
Amos loh boiva saelhung a dawn doela Boeipa kah ol he 760 b.c. vaengah a thui. Amos he Judah ram tuithim ah a cun dae Pathen loh tlangpuei kah Israel ram la ol thui ham a tueih. Syria, Philistia, Phoenicia, Edom, Ammon, Moab, neh Judah he a cawh vetih dan a tat ni. Tedae Israel hlanglen rhoek loh khodaeng neh mangdaeng te a yoop dongah amih soah kah dantatnah kawng te a sen la a thui. Israel sokah laitloeknah kawng te othang panga a tueng sak. Kaisih loh buh boeih a yoop ni, diklai pum te hmai loh boeih a hlawp ni. Mikrhael rhui a toe te khaw Israel ca rhoek he Pathen kah uepomnah tangtlaeng dongah hing pawh a ti. Voeihang dongah kah thaihhmin loh Israel ca rhoek a poci ham yoei coeng a ti. Bethel im neh bawkkung rhoek khaw cungku pawn ni a ti. Israel ca rhoek te namtom taengah taekyak la om ni. A hnukkhueng ah ngaiuepnah om, ram te koep a thoh vetih pilnam khaw hoeih ni.
Sawt Yoeinah
Namtom soah olcaeknah 1.1—3.2
Israel neh Samaria a phae ni 3.3—6.14
Israel sokah dantatnah panga 7.1—9.10
Israel ham hmailong khosae 9.11-15
1
1 2Mg 15.1-7; 2Kh 26.1-23; 2Mg 14.23-29Tekoa kah saelhung boei rhoek khuikah aka om Amos ol. Judah manghai Uzziah tue neh Israel manghai Joash capa Jeroboam tue, lingluei hmai kah kum vaengah Israel ham a hmuh pah.
Israel neh Imben Soah Laitloeknah
2 Joe 3.16BOEIPA tah Zion lamloh kawk tih
Jerusalem lamloh a ol a huel tih a thui.
Te vaengah boiva aka dawn kah
rhamtlim te nguekcoi tih Karmel lu rhae coeng.
3 Isa 17.1-3; Jer 49.23-27; Zek 9.1BOEIPA loh he ni a thui.
Damasku kah boekoeknah pathum neh
pali dongah anih te ka rhael mahpawh.
Gilead te thi vueituk neh a boh.
4 Te dongah Hazael im ah hmai ka tueih vetih
Benhadad impuei a hlawp ni.
5 Damasku thohkalh te ka khaem vetih
kolbawn lamkah khosa rhoek khaw,
Betheden kah caitueng aka pom khaw ka thup ni.
Aram kah pilnam te Kir la a poelyoe uh ni
tila BOEIPA loh a thui.
6 Isa 14.29-31; Jer 47.1-7; Ezk 25.15-17; Joe 3.4-8; Zep 2.4-7; Zek 9.5-7BOEIPA loh he ni a thui.
Gaza kah boekoeknah pathum phoeikah
pali dongah anih ka rhael mahpawh.
Amih hlangsol a poelyoe tih
Edom taengah rhuemtuet la a det.
7 Gaza vongtung soah hmai ka tueih vetih
a impuei khaw a hlawp pah ni.
8 Ashdod kah khosa neh Ashkelon kah
caitueng aka pom rhoek khaw ka thup ni.
Ekron taengah ka kut ka thuung vetih
Philisti kah a meet rhoek khaw milh uh ni tila
Boeipa Yahovah loh a thui.
9 Isa 23.1-18; Ezk 26.1—28.19; Joe 3.4-8; Zek 9.1-4; Mat 11.21,22; Luk 10.13,14BOEIPA loh he ni a thui.
Tyre kah boekoeknah pathum neh
pali dongah anih te ka rhael mahpawh.
Hlangsol te Edom taengah rhuemtuet la a det tih
manuca kah paipi te poek uh pawh.
10 Te dongah Tyre vongtung soah hmai ka tueih vetih
a impuei khaw a hlawp pah ni.
11 Isa 34.5-17; 63.1-6; Jer 49.7-22; Ezk 25.12-14; 35.1-15; Oba 1.1-14; Mal 1.2-5BOEIPA loh he ni a thui.
Edom kah boekoeknah pathum ham neh
pali ham te anih ka rhael mahpawh.
A manuca te cunghang neh a hloem tih
a haidamnah khaw a porhak sak.
A thintoek a yoeyah la a paem tih
a thinpom te a ngaithuen yoeyah.
12 Te dongah Teman soah hmai ka tueih vetih
Bozrah impuei khaw a hlawp pah ni.
13 Jer 49.1-6; Ezk 21.28-32; 25.1-7; Zep 2.8-11BOEIPA loh he ni a thui.
Ammon ca rhoek kah
boekoeknah pathum ham neh
pali ham te anih ka rhael mahpawh.
Amamih kah khorhi dangka hamla
Gilead bungvawn rhoek te a boe uh.
14 Te dongah hmai tah
Rabbah vongtung dongah ka hlup pah vetih
a impuei khaw a hlawp pah ni.
Caemtloek hnin ah tamlung neh
cangpalam hnin kah hlipuei.
15 Amih kah manghai amah neh
a mangpa rhoek vangsawn la
rhenten cet ni tila BOEIPA loh a thui.
1:1 2Mg 15.1-7; 2Kh 26.1-23; 2Mg 14.23-29
1:3 Isa 17.1-3; Jer 49.23-27; Zek 9.1
1:6 Isa 14.29-31; Jer 47.1-7; Ezk 25.15-17; Joe 3.4-8; Zep 2.4-7; Zek 9.5-7
1:9 Isa 23.1-18; Ezk 26.1—28.19; Joe 3.4-8; Zek 9.1-4; Mat 11.21,22; Luk 10.13,14
1:11 Isa 34.5-17; 63.1-6; Jer 49.7-22; Ezk 25.12-14; 35.1-15; Oba 1.1-14; Mal 1.2-5
1:13 Jer 49.1-6; Ezk 21.28-32; 25.1-7; Zep 2.8-11