4
पत्रुस स़ोनो यूहन्नानिलाई घ्योःव कचरील यारालाँव
1 हाःत ज़ पत्रुस स़ोनो यूहन्नानी माहोल्यारास निपाँज़्याक ज़ ध्यान झ़िमलाव पाल्याराए कप्तान, नलाव पुजारीर स़ोनो सदुकीर नोनी निल्योक केस्हुकेर। 2 पत्रुस स़ोनो यूहन्नानी ‘येसु सिउनी ओसैंसिउए छुत सिउर ब सैंसिन्या लेर’ लिद थ·रैद निराएज़्यावए नोर बनै यारिस चोके। 3 है जैद नोनिलाई क्योःद जाँ ऱिमदा ऱिमदा ओतानावए हो पराःती खोले·न्याए जूँनी झ्यालखानाल यारानैकेर। 4 हैदी मनी नोनी निपाँ थैज़्यावरानी कुधुए भैंःद येसुए ओपाँत चा·सिहुकेर। नो ङ़ादाङाव भैंःज़्यावरास प़ाइँ जैद पाँच हजारा तानाकेर।
5 हो पराःती यहूदीराए याघेप्पार, यास़ेरर स़ोनो सास्त्रीर प़ाइँ यरूसलेमल दुप्सिद यालिज़्याव। 6 नोरास प्रधान पुजारी हन्नास ब उलिज़्याव। नोस फरी कैयाफा, यूहन्ना, अलेक्जेन्दर स़ोनो छुत नोए ओखलकलाव घेप्पा पुजारीर ब यालिज़्याव। 7 नोराए पत्रुस स़ोनो यूहन्नानिलाई घ्योःव कचरी ङ़ाक यारासच्याँक नो घेप्पाराए नोनिलाई खोले·द, “आव घ्याँस्यालाई काताए ओसक्तीनी, सुए उमिननी जिन्सगराँव?” है यारादोक ते, 8 पत्रुस छैंव पुरूसए ब्याल्द, “अ यहूदीराए याघेप्पार, यास़ेरर, 9 गिन आव घ्याँस्यालाई गिनयुँ नाद गिन्सगराँवए जूँनी जेखोले·सिज़्याव ताकिन, गिन नोलाई कै जैद गिन्सगराँव लिक ते, 10 जे स़ोनो इस्राएली भरिराए आव सैंच्यो — जे क्रुसत जेसैःव, परमेस्वरए सिउनी ओसोचोइव नासरतलाव येसु ख्रीसए उमिननी आव मिँ जेङ़ाक सोजोकाव ताद च्याँःसिद ले। 11 धर्मसास्त्रलाव आव पाँ होए उजूँनी ज़ सर्सिउ लिज़्या —
‘भुलीराए कान्ल ज़ माज़्यासे लिद याख्याव लुँ
नो ज़ झन भुयाँरलाव लुँ ताके।’ 4:11 भज ११८:२२
12 है जैद पापए सजानी पुलुस्न्या उपुर सुए ओल्योनी ब माले। गे मिँरालाई अजम्बरी जुनी दैन्या मनी आव मानुवाताव मिन भरिरानी उपुर सुए उमिन ब यासिउ माले,” है यादोक्यो।
13 पत्रुस स़ोनो यूहन्नानी निलेखा प़री काता ज़ ओमालिदी ब नियुँ हुप्द पक्कास निपाँज़्याव रँःद नो कचरीलाव घेप्पार बनै अचम्ब ताद, ‘आवनी ते येसुसकावनी ज़ निल्यो’ लिन्या थ·रैकेर। 14 फरी नो निसगराँव मिँ ब याङ़ाक सोजोकाव ज़ च्याँःसिद उलिज़्याव रँःद कातानी ज़ मापाँधुद थाम थुम ज़ ताकेर। 15 है जैद नोनिलाई कचरीनी लाँःदा पले·द या याज़ जलफल दाद, 16 “आवनिलाई कै जैन्या ओताव? आवनी तोबो अचम्बलाव य़ेन निदोव यरूसलेम भरी प़ाइँए सैंज़्यार, नो पाँत ‘माःक’ है गेमालिधुइ। 17 खाली नो पाँ झन आदा होदा माफींजैन्याए जूँनी नोनिलाई हप्कैद, ‘येसुए उमिननी सुरास ज़ तापाँचिन’ है लिद अर्थैव ताके,” है लिन्या थ·रैकेर।
18 है जैद नोनिलाई कचरील फरी ब खुल्द रैद, “जिन अबकिन येसुए उमिननी सुलाई ज़ काता पाँर सथैन्या ब माःक, पैन्या ब माःक,” है लिद याराअर्थैकेर। 19 हाःत ज़ पत्रुस स़ोनो यूहन्नानी, “परमेस्वरए उयुँ किताव उलिज़्याव, जे ज़ सैंचिके — जे जेपाँ दान्या सैं ओल ओपाँ दान्या? 20 गिन ते गिन्थैव स़ोनो गिन्रँःव भरी कै जैद मापाँन्या?” है निरादोक ते, 21 नो घेप्पाराए फरी ब यारासिङार्केर। खाली मिँ भरिए नोनी निदोव य़ेनत परमेस्वरए उमिन बनै सघ्योःद यापाँज़्यावए नोनिलाई कैज़ माजैधुद याराऱास्केर। 22 निताव अचम्बलाव य़ेननी निसगराँव मिँ ते चालीस बर्सकिन यादाङाव ओल्यो।
येसुए ओपाँत बाज़्यावराए यापोंखारिउ पाँ
23 पत्रुस स़ोनो यूहन्नानी निऱास्सिउ छींनी निनैंराए ल्योक बाद नो मुख्या पुजारीर स़ोनो यहूदीराए यास़ेरराए है यारादोव भरी है यारादोकिनी। 24 नोराए निपाँ भरी थैद प़ाइँए तयुँ जैद परमेस्वरलाई अइ लिद पोंखारिकेर, “अ गेप्रभु, आव नाम नम स़ोनो ऱीर जैज़्याव नँ ज़। नलाव लिज़्याव भरी जैज़्याव ब नँ ज़। 4:24 प्रस २०:११; नहे ९:६; भज १४६:६ 25 नँ छैंव नपुरूसनी ज़ ननोकोर गेपुर्खा दाऊद राजाए ओयाःनी अइ लिद नपाँके,
‘मानुवाताव मिँर काराव यारसिज़्याव?
काराव अऩाकलाव य़ेनत बुद्धी याकलैज़्याव?
26 मानुवाताव राजार स़ोनो मिँराए याघेप्पार
प़ाइँ दुप्सिद परमेस्वर स़ोनो छाँतिद ओनैज़्याव ख्रीसकिन तँदा जैसिकेर।’ 4:25-26 भज २:१-२
27 साचो ज़ प्रभु, आव सहरल ज़ हेरोद स़ोनो पन्तियस पिलातसनी छुत जातलाव मिँर स़ोनो इस्राएलीरास खैद, छाँतिद ननैज़्याव छैंव नज़ा येसुकिन तँदा जैसिद, 28 नँ ङ़ादाकिन ज़ नयुँल गोइँद नरायो य़ेन ब दोनाकेर। 29 अब ते, गेलाई हप्कैद सचे·व यापैंज़्याव नँ ज़ चिऊके, प्रभु। स़ोनो गे ननोकोररालाई ब नपाँ सथैन्या माछे·द ज़ पाँन्या जैसियो। 30 नो गेरासथैज़्याव पाँत फरी नँ नसक्तीए ज़ छैंव नज़ा येसुए उमिननी याजोरो हुवर ब ओगराँरक, अचम्बलाव सरेसर, अचम्बलाव य़ेनर ब ओतारक,” 31 है लिद पोंखारिकेर। हो प़ाइँना ज़ नो दुप्सिद यालिज़्याव झ़िम बनै थोनो·सिद, छैंव पुरूसए ब्याल्द प़ाइँए परमेस्वरए ओपाँ माछे·द ज़ यारासथैनाकेर।
येसुए ओपाँत बाज़्यावराए प़ाइँ याखार्त ज़ याजैव
32 येसुए ओपाँत बाज़्यावर प़ाइँ खैद तोबो युँस ज़ यालिज़्याव। यासकाव लिज़्याव भरी ब प़ाइँ याखार्त जैद ‘आव ङामीं ज़’ है लिद सुए ज़ है यामालिज़्याव। 33 येसुए ओसाचीराए फरी बनै सक्तीस, ‘येसु सिउनी सैंसिद स्वर्गत बाके’ है लिद प़ाइँलाई ज़ सथैद प्रभुए ओसाची याराएज़्याव। उपुर्काव येसुए ओपाँत लिज़्यावरालाई मनी परमेस्वरए ओअसिक याक्याँत ज़ ओताज़्याव। 34 याखार्ल माथैंव मायो·व मिँर ब सु ज़ यामालिज़्याव। याझ़िम, याएँः ल्योर नो भरी यो·द ओएः भरी रैद, 35 नो पैसार येसुए ओसाचीराए ल्योक यादुप्ज़्याव। स़ोनो जोल चाहिज़्या होल नो पैसार भाःद याराएज़्याव।
36 हाः बेलाक नोरास तोबो साइप्रस तापुनी हुव लेबी थरलाव योसेफ यादोज़्याव उलिज़्याव। येसुए ओसाचीराए नोए उमिन बारनाबास नैदिकेर। (नोए ओअर्थ ‘युँ सझेंःद्यान्या’।) 37 नोए पाला तोबो ओएँःलाई यो·द ओएः भरी येसुए ओसाचीराए ल्योक लाँक्यो।