1 Pǝnɑɣɑ sikɑɑ nɑ pǝ́ tɑlɑ wɑɑtʋ wei ɑwulɑɑ tɛɛkɩ yoou tɔ, ɩlɛnɑ Tɑfiiti kʋsɩ ɩ yoolɑɑ wulɑʋ Sowɑpɩ nɑ Ɩsɛɣɛlɩ yoolɑɑ tǝnɑ sɩ pɑ́ polo pɑ́ kʋ Amoni nyǝ́mɑ tǝnɑ nɑ pɑ́ lɛɛkɩ Lɑpɑ ɩcɑtɛ. Amɑ Tɑfiiti mɑɣɑmɑɣɑ tɑ polo.

2 Ḿpʋ́ɣʋ́ kʋyɑkʋ nɑkʋlɩ Tɑfiiti lɩɩnɑ tǝhǝntǝlɛ kɛ tɑɑnɑɣɑ, nɑ ɩ́ cɔɔkɩ kutuluɣu pɑtɑ tɔɔ. Ɩlɛ ɩ loosɑ ɑlʋ nɔɣɔlʋ ɩ sɔɔkɩ lʋm ntɛ, nɑ ɩ ɩsɛntɑɑ lɩɩwɑ pǝ tɩɩ fɛɩ. 3 Ḿpʋ́ɣʋ́ ɩ tilɑɑ nɑ pɑ́ pɔɔsɩ ɩ tɔɔ. Ɩlɛnɑ pɑ́ cɔ-ɩ sɩ Ɩliyɑm pɛɛlɔ Pɑsepɑ kɛ́. Ɩ pɑɑlʋ kɛlɛ Hiti tʋ Yulii. 4 Ntɛnɑ ɩ́ tili nɑ pɑ́ ponɑ-ɩ ɑlʋ ɩnɩ nɑ ɩ́ sʋʋnɑ-ɩ nɑ ɩ́lɛ́ ɩ́ mǝlɩ ɩ tɛ. Pǝyele ɩ kɑ tɛmɑ ɩsɔtʋ nɑʋ ntɛ́ kpɑkpɑɑ nɑ ɩ́ lɑ ɑsilimɑ kɛɛlʋɣʋ kɔtɑɣɑ.

5 Alʋ nɑwɑ ɩ tɩ nɑ teu ɩlɛnɑ ɩ́ tili nɑ ɩ́ heeli Tɑfiiti.

6 Mpʋɣʋlɛ Tɑfiiti tilɑɑ nɑ ɩ́ heeli Sowɑpɩ sɩ ɩ́ yele Hiti tʋ Yulii nɑ ɩ́ kɔɔ.

Ɩlɛnɑ Sowɑpɩ nɑ́ɑ́ yele Yulii. 7 Yulii kɔmɑ ɩlɛnɑ Tɑfiiti pɔɔsɩ-ɩ Sowɑpɩ nɑ yoolɑɑ nɑ yoou pɑ ɑlɑɑfǝyɑ tɔɔ. 8 Ḿpʋ́ɣʋ́ Tɑfiiti heelɑ Yulii sɩ: Polo nyɑ́ tɛ nɑ ń hɛɛsɩ.

Yulii lɩɩwɑ ɩlɛnɑ wulɑʋ lɑpɩ-ɩ kʋcɔɔʋ nɑ pɑ́ ponɑ-ɩ. 9 Amɑ ɩ́lɛ́ ɩ tɑ sʋʋ ɩ tɛ. Ɩ nɑ wulɑʋ tɑŋlɑɑ pɑ hǝntǝnɑ nɔnɔɣɔ tɛɛ. 10 Ḿpʋ́ɣʋ́ pɑ tɑɣɑsɑ-tǝɣɩ wulɑʋ nɑ ɩ́lɛ́ ɩ pɔɔsɩ-ɩ sɩ: Anɩ n lɩɩnɑ mpɑɑʋ kɛ́. Ɩlɛ pepe tɔɔ kɛ́ n tɑ sʋʋ tǝyɑɣɑ? 11 Ḿpʋ́ɣʋ́ Yulii cɔ-ɩ sɩ: Ɩsɔ ɑtɑkɑɑ nɑ Yutɑ nɑ Ɩsɛɣɛlɩ nyǝ́mɑ tǝnɑ hǝntǝɣɩ cokɑ tɑɑ kɛ́. Mɑ cɑɑ Sowɑpɩ nɑ ɩ wɑɑlɩ nyǝ́mɑ nɑ́ wɛ nyɩɩtʋ tɑɑ. Ɩlɛnɑ mɑ́ɑ́ sʋʋ mɑ tǝyɑɣɑ tɑɑ nɑ mɑ́ tɔɣɔ nɑ mɑ́ nyɔɔ, nɑ mɑ́ hǝntǝnɑ mɑ ɑlʋ nɑ? Mɑ tuunɑ-ŋ sɩ mɑ kɑɑ lɑ mpʋ. 12 Ntɛnɑ Tɑfiiti heeli-ɩ sɩ: Tɔʋ, hɛɛsɩ sɑŋɑ, cele ɩlɛ mɑɑ yele nɑ ń mǝlɩ.

Ɩlɛnɑ Yulii cɑɣɑ. 13 Ḿpʋ́ɣʋ́ Tɑfiiti yɑɑ-ɩ ɩ tɛ nɑ ɩ́ tɔɣɔ nɑ ɩ́ nyɔɔ nɑ pǝ́ kʋ-ɩ. Pɑɑ nɑ mpʋ, ɑhoo yuwɑ tɔ, ɩ tɑ polo ɩ tɛ, ɩ́ nɑ tɑŋlɑɑ pɑ hǝntǝnɑ.

14 Tɛʋ femɑ ɩlɛnɑ Tɑfiiti ŋmɑɑ Sowɑpɩ kɛ tɑkǝlɑɣɑ nɑ ɩ́ tilinɑ-kɛɣɛ Yulii mɑɣɑmɑɣɑ 15 sɩ pɑ́ tɛlǝsɩ-ɩ timpi yoou hɑŋɑ teu tɔ nɑ pɑ́ yele-ɩ nɑ pɑ́ kʋ-ɩ.

16 Sowɑpɩ nyɑlɑ ɩcɑtɛ, ɩlɛnɑ ɩ́ ponɑ Yulii kɛ timpi yoolɑɑ tɑɑ yoolɑɑ tɑŋɑɑ tɔ. 17 Ḿpʋ́ɣʋ́ ɩcɑtɛ nyǝ́mɑ lɩɩwɑ nɑ pɑ́ yoonɑ Sowɑpɩ nɑ ɩ nyǝ́mɑ nɑ pɑ́ kʋ Tɑfiiti yoolɑɑ pɑɣɑlɛ nɑ pɑ́ kpɛŋnɑ Yulii nɑ pɑ́ kʋ tɔtɔ. 18 Ɩlɛnɑ Sowɑpɩ ŋmɑɑ Tɑfiiti kɛ tɑkǝlɑɣɑ nɑ ɩ́ kɛɛsɩ-ɩ pǝ tǝnɑ mpi pǝ lɑpɑ tǝyoole tɔ. 19 Ḿpʋ́ɣʋ́ Tɑfiiti lɛlɑ tillu kɛ heeluɣu sɩ: Ye ń kɛɛsɑ wulɑʋ kɛ tɑ cɑkǝlɛ tɔm kɛ cǝnɛ, 20 ntɑnyɩ pɑ́ɑ́nɑ́ kɑ kpɑ-ɩ nɑ ɩ́ yɔɣɔtɩ sɩ pepe tɔɔ kɛ́ tǝ sʋʋ ɩcɑtɛ tɛɛ sɩ tǝ yookinɑ-tɛ. Anɩ tǝ nyǝmɑɣɑ sɩ ɩcɑtɛ nyǝ́mɑ tɔɔkɩ nyǝ́mɑ́. 21 Ḿpʋ́ɣʋ́ ɑlʋ kɑ kʋnɑ Ketiyɔŋ pǝyɑlʋ Apimelɛkɩ. Tɛpɛɛsɩ ɩcɑtɛ tɛɛ kɛ́ ɩ kɑ sʋʋ mpʋ nɑ ɑlʋ yɑɣɑ-ɩ nɑmlɛ hɔɣɔlʋɣʋ nɑ koluŋɑ nyʋɣʋ tɑɑ. Ɩlɛ pepe tɔɔ kɛ́ tɑ́ kpǝtǝnɑ koluŋɑ kɛ mpʋ? Ɩlɛ n cɔ-ɩ sɩ nyɑ́ pǝyɑlʋ Yulii nɑ́ sǝpɑ tɔtɔ.

22 Ḿpʋ́ɣʋ́ tillu kɛɛsɑ Tɑfiiti kɛ nti Sowɑpɩ kɛɛsɑ-ɩ tɔ sɩ: 23 Kolontunɑɑ mpɛ pɑ kpilɑ-tʋɣʋ. Pɑ lɩɩ-tʋɣʋ kʋlɩɩʋ kɛ tɑwɑ tɑɑ nɑ tɑɑ tɔɣɔnɩ-wɛ nɑ tǝ́ tɑnɑ-wɛɣɛ pɑ ɩcɑtɛ nɔnɔɣɔ. 24 Ɩlɛnɑ koluŋɑ tɔɔ sǝŋlɑɑ nɑ́ɑ́ tɔ-tʋɣʋ nyǝ́mɑ́ nɑ pɑ́ kʋ tɑ tɑɑ pɑɣɑlɛ. Hɑlɩ nyɑ́ pǝyɑlʋ Yulii nɑ́ sǝpɑ tɔtɔ.

25 Tǝnɑɣɑlɛ Tɑfiiti cɔwɑ tillu sɩ: Polo nɑ ń heeli Sowɑpɩ sɩ, pɑɑ pǝ kʋwɑ ɩ yǝlɑɑ tɔ pǝ tɑɑ kǝlɩ-ɩ cɑɑlʋɣʋ. Pǝ wɛɛ kɛ́ sɩ ɩ́ polo ɩcɑtɛ tɔɔ nɑ toŋ nɑ ɩ́ kǝlɩ-tɛ. Nyɑɑ polɑɑ ń tɑsɑ-ɩ ḿpʋ́ɣʋ́ ɑpɑlʋtʋ.

26 Yulii ɑlʋ nɩɩwɑ sɩ ɩ pɑɑlʋ sǝpɑ, ɩlɛnɑ ɩ́ wii-ɩ. 27 Lǝyɑɣɑ tɛmɑ, ɩlɛnɑ Tɑfiiti tili nɑ ɩ́ kpɑɣɑ ɑlʋ nɑ ɩ́ lʋlɩ-ɩ ɑpɑlʋ pǝyɑɣɑ. Ḿpʋ́ɣʋ́ Tɑfiiti kʋlɑpǝtʋ ntɩ tǝ tɑ mɑɣɑ Tɑcɑɑ.