Salmo 54
54
Kararag Ay Mankedaw Si Panalakniban Diyos
1 Omisalakan ka koma ay Diyos babaen sin panakabalin mo
ya paneknekam ay magay basol ko.
2 Dengngem din adawag ko,
songbatam kod din kararag ko.
3 Tan nay ay omibaw din mangipapangatos awak da.
Nan ipogaw ay magay seg-ang da,
kanan da en pomse da.
Sik-a ay Diyos yan dinokogan da.
4 Ngem bomadang ka, Apo,
tan sik-a di salaknib ko.
5 Sapay koma ta dosaem daida gapo ta matalek ka
ta apiten da din lawa ay am-amagen da
ya mamaga di biyag da isnan daga.
6 Maragsakanak to ay mangidawat si daton ko
ya man-iyamanak gapo sin kinasiged mo,
7 tan inmisalakan ka sin amin ay ligat ko
yan inilak di naabakan din kalaban ko.