37
1 “Ọ kwa iphe ono meru
iphe obu anma mu anmanma;
mbụ l'obu akfụ mu nkfụ.
2 Unu ngabeduduphu!
Unu ngabeduduphu nchị;
nụa olu Nchileke!
Unu nụduduaphu ekiri, oode!
3 Ọoloje ebemu-igwe;
yo dzuru mkpuli igwe;
shi ẹke ono dzuru mgboko l'ophu.
4 Ebemu ono kugee;
olu iya edelahaa edede.
Olu iya anọduje
agba l'ọ bụ egbe-igwe.
Ẹ to nwedu iphe oodomije edomi.
5 Ọ bụlephu l'ẹge olu
Nchileke edetabeje igidi adụje egvu.
Oomeje iphe,
kariru ẹge oo-do madzụ ẹnya.
6 Ọosuje aka-mini t'ọ
daa lẹ mgboko.
Yọ sụkwaphu
mini t'ọ chịa chị-shia ike.
7 Oomeje tẹ madzụ jebuhu ozi;
k'ọphu onyemonye
ọbule a-maru ẹge ozi
kẹ yẹbe Nchileke habe nshinu.
8 Ụnwu anụmanu anọduje
ekpu ekpukpu;
domishia onwẹphe l'ime ẹnu ẹphe.
9 Oke phẹrephere eshije
l'ụzo ọhali;
ẹge ono bẹ oyi eshije l'ụzo isheli.
10 Ọ bụ ume, Nchileke tụru
emetaje aka-mini.
Yọ bụru ume iya ono
emeje tẹ mini,
saru petengu bya anmaa anmanma.
11 Oomeje urukpu;
yọ ngụ-guhu angụ-guhu;
yo shi l'urukpu ono
l'eku ebemu kẹ mẹremu mẹremu.
12 Ọobuje; o -zia ẹphe;
ẹphe alọwashihu dzuru
mgboko mgburumgburu;
ẹphe l'agbaphe iya;
l'ejelephu ozi ẹge o ziru ẹphe.
13 Nchileke achị-jeru ndiphe mini
t'o gude iya hụ̀a ẹphe àhụ̀hù;
m'ọ bụ t'o gude iya koshi
lẹ ya yeru ẹphe obu.
14 Ngabeduduphu nchị; Jobu!
Nọduedu anọdu;
gbua igo l'iphe,
dụ biribiri Nchileke emebe!
15 ?Ị maru ẹge Nchileke
egudeje atụ-zi urukpu l'akpamigwe?
?Ị maru ẹge oomeje ebemu t'o kua?
16 ?Ị maru iphe urukpu
adọjeru l'eli iya
l'awụnga awụnga l'akpamigwe?
Ono kwa ozi, dụ egvu,
o jeru; mbụ onye ono,
tụkoru iphemiphe ọbule makọtaru ono;
17 Teke phẹrephere,
shi ụzo ọhuda ephe;
alị ederu gbẹe;
bẹ uwe, i yeru l'ẹhu
anọduje ekpo ngu okpomọku.
18 ?Ịi-dụ-ghe ike mee
akpamigwe t'ọ gbasaa agbasa;
kpọo gbengu l'ọ bụ onyo,
a wụru awụwu?
19 Kanụru ayi iphe,
ayi e-kfuru Nchileke.
Ẹ tọ dụkwa iphe ayi maru, ayi e-kfu;
kẹ l'ẹ tọ dụdu ọphu ayi maru.
20 ?Mu a-dụ ike kpọfu
Nchileke l'ifu tọo.
?Bụ onye e-wota onwiya
je agbaa mgbukuma.
21 ?O nweru onye e-wota
ẹnya iya je aphụbe l'anwụ,
echi echichi;
teke phẹrephere sacharu
akpamigwe; yo doo rịsangu.
22 Nchileke shi l'ụzo isheli;
gude mkpọla-ododo
kwaa onwiya ebirisa l'abya.
O gude ike, eye egwu;
dụ biribiri l'abya.
23 Ọkaribe-Kakọta-Ike bụ iya ka;
ọphu ayi 'adụdu ike
abya iya ntse.
Ikpe iya bụ ikpe,
vudo nhamụnha;
odobe-ẹka-ndoo nk'iya edzua edzudzu;
k'ọphu bụ l'ẹ tọ kpadu madzụ ẹhu.
24 Ọ bụ iya meru iphe,
madzụ atsụ iya egvu.
Ndu bụ
ọ-maru-ọmachata; b'ẹ tọ gụbedu iphe.”