1 Feiöchün ätewe an pupungau a musala,

nge an tipis a möla.

2 Feiöchün ewe aramas ewe Samol mi Lapalap esap tip ngeni och pwüngingau,

ewe aramas ese wor chofana lon lelukan. ✡ Rom 4.7-8

3 Lupwen üsap pwärätä ai tipis,

inisi a apwangapwangala ren ai kechü lon unusen rän me rän.

4 Pun lerän me lepwin ka apwüngüei.

Pöchökülen inisi a morotä

usun koluk a morotä lupwen fansoun pwichikar.

5 Mürin üa pwärätä ai tipis ngonuk,

nge üsap aopala ai pwüngingau.

Üa apasa, “Üpwe pwärätä ngeni ewe Samol mi Lapalap ai pupungau.”

Iwe, ka amusala ai tipis meinisin.

6 Iei mine ekewe chon allükülük repwe iotek ngonuk lon fansoun riaföü.

Lupwen feiengauen apwüng a war usun eu noter,

esap toriir.

7 En eu lenien op fän itei,

ka tümwünüei seni weires.

Üa leüömong le köl

usun om angasaeila.

8 Ewe Samol mi Lapalap a apasa,

“Üpwe aiti ngonuk ewe al kopwe fetal won o emwenuk,

üpwe öüröürok o mamasok.

9 Kosap wewe ngeni eman oris ika eman aas esap mirit,

nge eman a chök tongeni nemeniir, are efoch mächä a nom lon awer fiti efoch säl,

pwe repwe aleasochis ngeni.”

10 A wor chomong än ekewe aramasangau riaföü,

nge ewe Samol mi Lapalap a tongei o tümwünü

chokewe mi anomu ar apilükülük won.

11 Ämi chon pwüng, oupwe pwapwa o meseik

ren mine ewe Samol mi Lapalap a föri.

Oupwe mweireir fän pwapwa, ämi meinisin mi wenechar lelukemi.