zĩkea nɛ́ e dↄ.

2 Ǹ kpaatɛtɛ gↄ̃ↄn swɛɛplaaanↄnɛ ke sↄraagↄ̃,

zaakɛ ń mↄ́nzi kɛ̀ eé bùsu lee dↄ̃ro.

3 Tó ludambɛ sia kũ̀ kↄ̃n ío,

è ma tↄↄtɛa lou ũmɛ,

tó lí lɛ̀ɛ ↄfãntɛ̃bↄɛ kpa ke ↄfãntɛ̃gɛ̃kpɛn kpa,

guu kɛ̀ à lɛ̀ɛn, gwen ègↄ̃ daɛɛn.

4 Gbɛ̃ kɛ̀ à wɛ́ɛ dↄ ĩazi è pↄ́ tↄ̃ro,

gbɛ̃ kɛ̀ èe ludambɛ siaa gwaa è pↄ́ kɛ̃ro.

5 Lán ń wɛ̃̀ndibↄkii dↄ̃ro nà

ke nɛ́ kasana a da gbɛɛɛn,

nɛ́ fↄ̃ ǹ Luda Pↄ́pingikɛri zĩi dↄ̃ro.

6 Ǹ pↄ́ tↄ̃ kↄngↄ,

ǹton mɛa kɛ uusiɛro,

zaakɛ ń dↄ̃ tó à kparee bé eé aubarika kɛro.

Kɛ̀kiin yoo ke kɛ̀kãan yoo,

ke aↄ̃égↄ̃ maa ń píngin yoo, ń dↄ̃ro.

7 Gupura nna,

wɛ́ɛsina ↄfãntɛ̃lɛ è káńnɛ.

8 Baa tó gbɛ̃ wɛ̃̀ndi gbã̀a fↄ̃ àgↄ̃ dia,

à pↄnnaa kɛn píngi.

Baa kↄ̃n beeeo à laasuu lɛ́ gusia gurↄↄa,

zaakɛ aↄ̃égↄ̃ parimɛ.

Yã kɛ̀ èe mↄↄ píngi pãmɛ.

9 Gↄ̃kparɛ, ǹ pↄnnaa kɛ n ↄ̀wazikɛgurↄ,

ǹ tó n pↄↄ kɛ nna n gↄ̃kparɛkɛgurↄↄa.

Ǹ yã kɛ̀ n pↄↄ gbà kɛ

ǹ tɛ́ pↄ́ kɛ̀ kɛ̀nnɛɛzi,

mↄde à píngi guu ǹgↄ̃ dↄ̃

kɛ̀ Luda é yãkpaɛ kɛnyo.

10 Ǹton tó n pↄↄ yakaro,

ǹ n mɛ̀'ↄ̃ammanↄ gonla,

zaakɛ gↄ̃kparɛkɛ kↄ̃n mìkã siaao è gɛ̃ zɛ́lamɛ.