Luda yã takada kↄ̃n Bokobaru yão LAASUUDEE 5

Lɛ́gbɛ̃na Ludanɛ laasuu sai

1 Tó n gaa Luda ua guu, ǹgↄ̃ kú kↄ̃n làakario. Ǹ sↄ̃zi ǹ à yã maa maa dɛ yↄ̃nkↄↄnↄ sa'ona gweela, zaakɛ aↄ̃ yãdↄ̃nasai bé è tó aↄ̃ yã zaaa kɛ. 2 N lɛ́ tóngↄ̃ wãaro, ǹton wã ǹ yã o Ludanɛro. Lán à kú musu ń kú tↄↄtɛ nà, ǹton yã o pariro. 3 Lán yãbↄkↄ̃tɛ parii è mↄ́ kↄ̃n nana'onao nà, lɛn yã pari bↄɛna è mↄ́ kↄ̃n yↄ̃nkↄyão lɛ. 4 Tó n lù sɛ̀ Ludanɛ, ǹton à papana gurↄ gágaro. Ǹ à papa, zaakɛ yↄ̃nkↄↄnↄ yã è kánɛro. 5 Lùsɛna Ludanɛ sai maa dɛ n lù sɛ̀nɛ papana saila. 6 Ǹton tó n lɛ́ n da yãnlo. Ǹton o sa'orinɛ n bè n sã lùsɛna yãnlo. Ń yezi Luda pↄ fɛ̃nzi n yã pì yãnzi à zĩi kɛ̀ nɛ́ɛ kɛɛ kaatɛn yↄ́? 7 Nana pari ona kↄ̃n yã pari bↄɛnao è mↄ́ kↄ̃n yã pãaomɛ. Beee yãnzi ǹgↄ̃ Luda vĩa vĩ.

Auziki nɛ́ yã pãamɛ

8 Tó ń è wèe gbãa mↄↄ takaasideenↄnɛ gukea, wèe giińnɛ kↄ̃n yãzɛdeeo wèe yã gↄ̃gↄ̃ↄńnɛ a zɛ́aro, ǹton tó yã pì bↄ n saɛro, zaakɛ bùsu pì gbãadeenↄↄ e wɛ́ɛ dↄↄkↄ̃nɛ, ben aↄ̃ gbɛ̃nsinↄↄ e wɛ́ɛ dↄↄńnɛ dↄ. 9 Aↄ̃ píngi è bùsu pì baka blemɛ, zaakɛ kína bé à buraanↄ vĩ.

10 Gbɛ̃ kɛ̀ ye ↄↄzi è kɛ̃sãa,

gbɛ̃ kɛ̀ ye auzikizi àre è mↄ́aro.

Beee nɛ́ yã pãamɛ dↄ.

11 Tó auziki e kaara,

à blèrinↄ ègↄ̃ kaaramɛ.

Bↄ́ àren à vĩ a diinɛ?

À wɛ́ɛ biia baasiro.

12 Zĩgbãakɛri è i nnaa o,

baa tó à pↄ́ blè féte ke bíta.

Auzikidee sↄ̃ pↄ́ parii è tó à ii oro.

13 Ma nↄ̀sɛyakayã pãsĩ è anduna guu,

gbɛ̃ke zɛ́ tàta a ↄↄdaalɛ

à a zĩnda kari kɛ̀,

14 ben à bↄkↄ̃tɛ zaaa kɛ̀o,

à auziki kàatɛ píngi.

Kɛ̀ à nɛ́gↄ̃gbɛ̃ ì, à pↄ́ke vĩ kɛ̀ à tónɛro.

15 Gbɛ̃ntee è bↄ a da gbɛɛɛn bũumɛ.

Lán à mↄ̀ nà lɛn è liara à tá lɛ dↄ,

è a zĩ àre ke e à sɛ́ à na a ↄzĩ à táoro.

16 Yã kɛ̀kii nɛ́ nↄ̀sɛyakayã pãsĩmɛ dↄ.

Lán gbɛ̃ mↄ̀ nà lɛn è liara à tá lɛ dↄ.

À ísimma gà à kpà à pɛ̀ gukoria pã,

bↄ́ bé à gↄ̃̀nɛ?

17 Beee gbɛra à a gurↄ dɛ̀ gusiaan

kↄ̃n nↄ̀sɛyakana bítao

kↄ̃n gyãao kↄ̃n pↄfɛ̃o.

18 Ben má è à maa kↄ̃n gbɛ̃nteeo à pↄ́ ble à í mi à zĩi kɛ̀ à kɛ̀ kↄ̃n nawɛ̃ao anduna guu sáabu kpá a wɛ̃̀ndi zaka kɛ̀ Luda à gbà lɛ́n, zaakɛ à bakan gwe. 19 Beee gbɛra tó Luda gbɛ̃ kà ↄↄdaaa kↄ̃n auzikio, ben à à gbà zɛ́ à aufãni kɛo, à zɛ kↄ̃n a bakao à a zĩ sáabu kpá. Luda bé à à gbà. 20 Ègↄ̃ laasuu lɛɛ a wɛ̃̀ndi zakaa pari dↄro, zaakɛ Luda bé à yã màa kↄ̃n pↄnnaao.