Salmo 124
124
Salakniban Diyos Din Ipogaw Na
1 Sino ngata di napasamak mo adi binadangan Diyos si datako?
Dakayo am-in ay Israelita, siya na koma di isongbat yo:
2 Mo adi koma binmadang si Apo
idi ginmobat din kaibaw tako,
3 dadlon dan inmabak begew sin palalo ay bonget dan datako.
4 Tan kaman dan layos ay mangianod ya manlim-ot en datako,
5 begew sin kinapigsa da, sigurado ay malned tako.
6 Dayawen tako si Yahweh ay Diyos tako,
tan adi nan inpalobos ay pomse di kaibaw tako.
7 Kaman takon linmobos ay titit
sin tawang ay nabisngit.
8 Tan si Diyos ay namarsua ed daya ya isnan daga
di kapkapoan di badang tako tet-ewa.