49
Onye-ozi kẹ Chipfu
1 Unu ngabẹru mu nchị
unubẹ ndu bukube
eze-ẹnyimu!
Unu nụmakpodapho iphe-a
unubẹ ọha, bu l'ẹka dụ
ẹnya!
Chipfu vukwaru ụzo kua
mu tẹme a nwụa mu.
Ọ bụro teke mu nọkwadu
l'ẹpho ne mu bẹ
o kuru mu ẹpha.
2 O meru ọnu mu;
ọ nọdu atsụ nkọ g'ogu-echi,
a barụ ababa;
bya eworu mu domia l'ime
ọbochi-ẹka iya.
O meru mu; mu dụ g'apfụ,
a rwacharu arwacha;
bya eworu mu sụ-chia l'iphe,
ooyeje apfụ iya.
3 Ọ sụ mu: “Ị bụkwa onye-ozi
mu gụbe Ízurẹlu.
Onye bụ ngu bẹ mu e-gude
goshi gẹ mu dụ-be
biribiri.”
4 Mbẹdua sụkwanu:
“Mu seakwaru akanya
ọla-l'iswi.
Mu swịshierupho ike mu
k'iphoro l'iphe,
bụ iphe-mmanụ.
Ọle ọ bụ; iphe, rwuberu mu
nụ bụ l'ẹka Chipfu
bẹ ọ dụ.
Tẹme obunggo mu bụru
Chileke mu gude iya.”
5 O be nta-a Chipfu,
bụ onye ono,
meru mu rọ teke mu
nọ l'ẹpho;
gẹ mu bụru onye-ozi iya;
sụ:
“Duphutaru mu ụnwu Jiékọpu
azụ.
Chịkobe ụnwu Ízurẹlu
chịtaru mu.”
Kẹle mu bụ onye aakwabẹ
ùbvù l'ẹnya kẹ Chipfu;
tẹme ọ bụru Chileke
mu bụ ike nkemu.
6 Ọo ya bụ; ọ sụ:
“Ọ tọ bụlekwaa g'ị bụru
onye ejeru mu ozi
duphutaru mu ipfu ipfu
ụnwu Jiékọpu azụ;
wafụa g'i dulatakwaru
mu phọ ndu kẹ Ízurẹlu,
bụ nwa ndu ọphu mu
doberu bẹ ị nọ-doru.
Mu e-mekwa ngu phọ
g'ị bụru ìphóró,
dụru ndu
abụdu ndu Jiuda;
k'ọphu ii-me gẹ ndzọta mu
rwua ẹka igwe beru
alị beru.”
7 Wakwaphọ iphe, Chipfu epfu;
mbụ onye ono,
bụ onye agbafụtaje anyi;
bya abụru Onye Nsọ
kẹ ndu Ízurẹlu.
Oopfu iya anụ onye ono,
ọhamoha jịkaru ajịka;
akpọ-yiru iya ukuvu ono;
mbụ onye ono,
bụ onye-ozi kẹ ndu-ishi.
Waa iphe oopfu baa:
“Ndu eze e-mechakwaa
hụma ngu wụ-lihu.
Ndu-ishi a-hụma ngu
phozeru ngu.”
Ọ bụru onye e-me iya nụ
bụ Chipfu; onye ono,
apfụshije ike l'iphe,
o pfuru;
mbụ Onye nsọ kẹ ndu
Ízurẹlu,
bụ onye họtaru ngu nụ.
Edophu Ízurẹlu azụ l'ọnodu iya
8 Wakwa iphe, Chipfu epfu:
Ọo teke mu a-wata eme
eze-iphe-ọma bẹ mu a-za
ngu ẹnu.
Ọ bụru mbọku,
mu a-wata adzọta
nemadzụ bẹ mu e-yeru
ngu ẹka.
Mu a-kwakọbe ngu mee ngu
g'ị bụru iphe,
mu lẹ ndiphe e-gude gbaa
ndzụ;
g'i dophu alị ono azụ
l'ọnodu iya;
mee g'ẹphe keta okiphe ono,
shi dabyiru iphoro
onoya.
9 Mbụ-a; g'ị sụ ndu ono,
a kpụru lẹ ndzụ ono
g'ẹphe fụta;
l'ị sụkwapho ndu nọ
l'ọchii g'ẹphe nweru
onwophẹ.
Ẹphe adụ g'ụnwu-atụru,
dọru ata nri l'agụga gbororo;
hụmachaa nri l'úbvú úbvú,
dụgbaa kpọkoro
kpọkoro kpọkoro.
10 Ẹgu nri ta abyadụ agụ phẹ;
ọphu ẹgu mini agụdu
phẹ; ọphu okpomọku,
shi l'echiẹgu;
ọzoo ọphu shi
l'ẹnyanwu ekpoẹdu
phẹ.
Ọ bụru onye aphụru phẹ
obu-imemini a-nọdu
edu phẹ duru phẹ
shita agụga mini,
asọ asọso.
11 “Mu e-me g'úbvú úbvú,
mu nweru bụchaaru
gbororo.
L'aabya atụa iphe,
bụ oji mu mkpoli l'ọoha
l'eli l'eli.
12 Lekwa; ẹphe e-shigbakwa
ẹka dụ ẹnya.
Ọ dụru ndu ọphu e-shi
l'isheli;
ndu eshi l'ụzo ẹnyanwu-adada;
dụru ndu ọphu e-shichaa
ụzo alị Asụwanu.”
13 Unubẹ imigwe l'ophu;
unu rwua okwe!
Gụbe eliphe; tenaa ẹswa!
Unubẹ úbvú úbvú;
unu watanụ agụ ebvu!
Noo kẹle Chipfu watawarụ
adụ ndibe iya obu.
Tẹme ọ bụru ndibe iya ono,
shi eje iphe-ẹhuka ono
bẹ ọo-phụru obu-imemini.
14 Obenu lẹ Zayọnu sụru:
“Chipfu gbadoakwaru
mu.
Nnajịuphu mu zọhaakwaru
mu.”
15 Ne; ?ọozohaje nwa, angụ iya
ẹra l'obu;
mbụ kẹ g'ọ tọ phụru nwa,
bụ iya nwụru iya
obu-imemini?
O -jekpọonu azọha bẹ
ọo-zọhakwaa;
obenu lẹ mbẹdua ta
azọhadu ngu!
16 Tii ledu; mu deakwaru ẹpha
ngu g'uri l'ọbochi-ẹka
mu;
ọphu mu azọhajedu igbulọ
ngu ono azọha.
17 “Ụnwu ngu alwaakwa
ẹgwegwa.
Ndu ono, shi mee ngu;
ị bụru ochobu ono nọdu
alụfuwaa.
18 Palinaa ẹnya ngu imeli
lephee mgburugburu!
Ụnwu ngu g'ẹphe ha
anọkoakwa alwapfuta
ngu.
Wakwa iphe, mụbe Chipfu
epfu baa:
Eshinu mu nọ ndzụ gẹ mu nọ
iya-a bẹ ii-mechaa yee
phẹ g'ẹphe hakọta g'onye
yeru uwe.
Mbụ l'ii-gude phẹ kwaa
ngwa gẹ ngwa nwanyị,
aabya alụ k'ọ̀phúú.
19 A makwarụ-a l'e shi
mebyishia ngu tọgbo
ngu ị bụru ochobu;
alị ngu dabyiru iphoro.
Nta-a bẹ ị tị sụkpoedunu
ndibe ngu ebubu.
Tẹme ndu ono,
shi mebyishia ngu nụ
ono nọdu ngu
ụzenya.
20 Ụnwegirima, a nwụru teke
ono,
iije iphe-ẹhuka ono
e-mechakwaphọ pfua
l'ị nụma lẹ nchị ngu sụ:
Ẹka-a paakwaru anyi
nwanshịi ebubu;
chọbanaaru anyi alị
ẹka anyi e-buru!
21 Noo teke ii-pfu l'ọkpoma
ngu sụ:
‘?Bụ onye nwụshiru mu ikpoto
ụnwegirima ọwa-a?
Mu shi eje iphe-ẹhuka;
tẹme ọphu mu atsụdu ime.
Mbụ lẹ mu shi bụru onye
a jịkaru ajịka;
a bya akpụa mu lẹ ndzụ
laa alị ndu ọhozo.
?Bụkwanu onye
hefutaru mu ụnwegirima
ọwa-a?
Lẹ mụbe onye e shi haa;
mu nọdu nkịnyi mu.
?Igwerigwe ndu ọwa-a
shihunu awe?’ ”
22 Wakwa, iphe Nnajịuphu,
bụ Chipfu epfu baa:
“Lenu; mu e-pheru
ọhamoha ẹka.
Mu e-woru ẹkwa-ọhubama
mu paliaru ọhamoha.
Ẹphe egude ẹka phẹ
kulataru ngu ụnwu ngu
unwoke;
kwọru ụnwada ngu
l'ukuvu kwọlataru ngu.
23 Ndu eze a-bụru nna,
ehe ngu nụ.
Ndu eze-nwanyị abụru ne,
ehe ngu nụ.
Ẹphe a-nọdu ephozeru ngu;
bubechaa iphu l'alị.
Ẹphe erichachaa urwuku,
dụ ngu l'ọkpa.
Noo teke ịi-maru l'ọo mu
bụ Chipfu;
lẹ ndu ẹnya dụ l'ẹka mu
nọ bẹ iphere te emedu.”
24 ?Aa-nata ndu dụ ike
l'ọgu iphe, ẹphe kwarụ
l'ọkwata tọo?
Tọo ?aanafụ ndu iwashị ndu
ẹphe kpụru lẹ ndzụ?
25 Obenu lẹ-a; wakwa iphe,
Chipfu epfu baa:
“Ee! Ndu a kpụru lẹ ndzụ bẹ
aa-nafụ l'ẹka ndu ike
dụ l'ọgu!
Tẹme l'a nata ndu iwashị iphe,
ẹphe kwarụ l'ọkwata.
Ọle ndu etso ngu ọgu bẹ
mu e-tso ọgu.
Mu adzọo ụnwu ngu ndzụ.
26 Ndu emekpa ngu ẹhu bẹ mu
e-me g'ẹphe taa anụ
onwophẹ.
Ẹphe angụa mee onwophẹ jasụ
l'ọotsuahaa phẹ gẹ mẹe.
Noo teke nemadzụ l'ophu
a-maru lẹ mbẹdua,
bụ Chipfu bụ onye adzọje
ngu nụ;
bya abụru onye agbatajẹ
ngu nụ;
bya abụru Ọkalibe
kẹ Jiékọpu.”