148
1 Unu jaa Ojejoje ajaja.
Unu shi l'imigwe jaa Ojejoje ajaja.
Unu nọdu l'ẹke kagee l'eli jaa ya ajaja.
2 Unubẹ ụnwu ojozi iya l'unu ha;
unu jaa ya ajaja.
T'iphe bụ ndu sọja imigwe; jaa ya ajaja.
3 Unu jaa ya ajaja;
unubẹ ẹnyanwu; mẹ ọnwa.
Unu jaa ya ajaja;
unubẹ mkpọ-kpodo, egbu zamụzamu.
4 Unu jaa ya ajaja;
unubẹ akpamigwe;
mẹkpo unubẹ mini,
nọ-ngoru akpamigwe anọ-ngo.
5 Unu tụko l'unu ha jaa Ojejoje ajaja;
kẹ l'ọ bụ iya sụru t'unu nọdu;
meru iphe unu nọ.
6 Ọo yẹbedua dobetsuaru unu l'ẹke unu a-nọdu.
Yọ bụru ẹke ono,
o dobetsuaru unu t'unu
nọdu ono; bẹ unu nọtsua.
Yọ bụru ẹke ono; bẹ unu
a-nọ jeye lẹ tutu yoyo.
Iphe ono, ọ tọru ọkpa iya ono
te nwedu l'o chihuru echihu.
7 Unu nọdunu lẹ mgboko
jaa Ojejoje ajaja;
unubẹ iphe dụtsua biribiri,
o meshiru dobe l'eze ẹnyimu;
mẹ ọphu nọtsua lẹ mini ime-alị.
8 Unu jakwaaphu Ojejoje ajaja;
unubẹ egbe-igwe; mẹ aka-mini;
mẹ urukpu; mẹ oke phẹrephere,
emeje iphe o kfuru.
9 Unubẹ oke ugvu;
mẹ ugvu kẹ nshịi;
iphe bụ oshi-ọmi;
mẹ iphe bụ oshi sida;
unu jakwaa ya phụ ajaja.
10 Tẹ anụ-ẹgu-ẹgbudu:
iphe bụ elu; ụnwehu;
mẹ ụnwenu, ephe l'eli;
unu tụko jaa ya ajaja.
11 Unubẹ ndu eze kẹ eliphe ọwaa;
unubẹ iphe bụ mbakeshi;
unubẹ ndu ishi;
mẹ iphe bụ ndu achị mgboko l'ọ ha;
12 unubẹ ụnwu-okorọbya;
unubẹ ụnwu-mgbọko;
unubẹ ndu bụ ọgurenya;
mẹ ụnwegirima;
unu jajẹkwaa ya phụ ajaja.
13 Unu tụko l'unu ha jaa Ojejoje ajaja;
kẹ l'ọ bụ ẹpha iya
nwẹnkinyi bụ ẹpha, kakọta nụ.
Ọdu-biribiri iya swetaru
mgboko mgburumgburu
bya esweta imigwe.
14 O meru tẹ onye ike dụ
lụfutaru ndu nk'iya.
Onye ono bẹ ndu Ízurẹlu,
bụ ndu yeru iya obu anọduje aja ajaja;
mbụ ndu ono, nọ iya l'obu ono.
T'ajaja bụru kẹ Nchileke.