98
याहवेहए ल्हागिर छारा क्वे प्रिंन्
भजन घ्रि।
1 याहवेहए मिंर छारा क्वे प्रिंन्,
तलेबिस्याँ खीजी औदिबै केमैं लइमुँ!
खीए क्योलो यो नेरो पबित्र योजी
ह्रोंसए म्हिमैं दु:खउँइँले फ्रेमिंइमुँ।
2 खीए त्हाँबै म्हिमैं जोगेमिंब याहवेहजी उँइँमिंइमुँ;
धै खीजी ह्रोंसए ठिक केमैं ह्रें-ह्रेंमैंए ओंसों उँइँमिंइमुँ।
3 इस्राएलए परवाए फिर लबै खोंयोंइ आनुबै म्हाँया
नेरो चमैंइ खोंयोंइ खीए फिर भर लल् खाँम् बिसि याहवेहजी मैंइमुँ।
ङ्योए परमेश्वरजी जोगेमिंबै केमैं
ह्युलर्बै ताँन् साँदर टिबै ह्रेंमैंइ म्रोंइमुँ।
4 ओ ताँन् ह्युलर्बै म्हिमैं, सैं तोंदै याहवेहए मिंर कै तेद्;
सैं तोंदै क्वे प्रिंसि खीए जयजय लद्।
5 बीणा ह्रादै क्ह्युरल्ले भजन प्रिंन्,
बीणा ह्रादै याहवेहए मिं क्वेद्!
6 थुतुरु नेरो क्युए रु ह्रादै याहवेह म्रुँए उँइँर
सैं तोंदै कै तेसि ओरद्।
7 मा ङ्युँइ नेरो चर मुँबै ताँन् सो प्ह्याबै सैमैंइ थेबै कैले खीए मिं क्वेरिगे;
छलेन पृथ्बी नेरो चर मुँबै तोन्दोंरि सैमैंज्यै या थेबै कै तेरिगे।
8 स्योंमैंइ योप्ल्ह ह्रारिगे;
कोंमैंइ सैं तोंदै तिखेर्न क्वे प्रिंरिगे;
9 चमैं ताँनइ याहवेहए उँइँर क्वे प्रिंरिगे,
तलेबिस्याँ निसाफ लबर खी पृथ्बीर युम्।
खीजी ह्युलर ठिक निसाफ लब्मुँ,
धै ह्रें-ह्रेंर्बै म्हिमैं खाबै आफेलल्ले खीजी ठिक निसाफ लब्मुँ।