31
Kí Lemuɛli yã
1 Kí Lemuɛli da lɛ́ dàa à bè:
2 Diamɛ, ma nɛ́? Bↄ́mɛɛ, ma nɛ́'ina?
À kɛ̀ diamɛ, nɛ́ kɛ̀ ma à lɛ́ gbɛ̃̀ Ludanɛ?
3 Ǹton n wó dɛ nↄgbɛ̃nↄ kiiaro,
ǹton zɛ́ kɛ̀ è kínanↄ yaka sɛ́ro.
4 Lemuɛli, geepiwɛ̃ɛ dɛ kínanↄ pↄ́mina ũro,
í gbãaa dɛ kpatablerinↄ pↄ́mina ũro,
5 lɛ aↄ̃ton mi, dokayãnↄ sãńgu,
aↄ̃ yã gↄ̃gↄ̃ takaasideenↄnɛ faa sairo yãnzi.
6 À í gbãa kpá gbɛ̃ kɛ̀ aↄ̃ↄe mↄↄ gaanↄa,
à geepiwɛ̃ kpá pↄsiadeenↄa
7 aↄ̃ mi, aↄ̃ takaasi sãńgu,
aↄ̃ yã'ↄ̃amma tóngↄ̃ dↄńgu dↄro.
8 Ǹ yã o gbɛ̃ kɛ̀ aↄ̃é fↄ̃ wà yã oroonↄ gɛ̃ɛ ũ,
ǹ yã sí gbɛ̃ kɛ̀ aↄ̃ↄ dↄnlɛri vĩroonↄnɛ.
9 Ǹtongↄ̃ yĩtɛnaro, ǹ yãkpaɛ kɛ a zɛ́a.
Ǹ takaasideenↄ kↄ̃n wɛ̃ndadeenↄ yã nnaa kpáḿma.
Nↄ làakaridee
10 Dé bé eé nↄ làakaridee ee?
À bɛ̀ɛ vĩ dɛ gbɛ̀ bainↄla zã̀.
11 À zã ègↄ̃ à náanɛ kɛɛ kↄ̃n nↄ̀sɛo domɛ,
pↄ́ maa ke è kɛ̃sãaro.
12 À maaan ègↄ̃ kɛɛ a zãnɛ,
èe kɛ à zaaanlo ai a wɛ̃̀ndi lɛ́n.
13 È sãkã kↄ̃n gbↄ̃̀bào wɛtɛ
à a ↄzĩi kɛ kↄ̃n pↄnnaao.
14 È gá blɛ sɛ́ zã̀
lán góro'itɛ latari bà.
15 È fɛɛ gukɛ̃kↄ̃anao à pↄ́blee kɛ a uadeenↄnɛ,
è zĩi kpaatɛtɛ a nↄkparɛnↄnɛ.
16 È tↄↄtɛ maaa wɛtɛ à lú,
è geepi línↄ pɛ́pɛn kↄ̃n a zĩnda bↄ̀gↄ ↄↄo.
17 È gbãaa dↄ a pii asaa ũ
à gã̀sãwa bↄbↄ a zĩia.
18 Ègↄ̃ dↄ̃ kɛ̀ é yàra e,
à fitia tɛ́ ègↄ̃ nana gwãavĩmɛ.
19 À ↄↄ ègↄ̃ porona àgↄ̃ buutãbↄ kũna,
ègↄ̃ kɛkɛ ↄ̃ wã a ↄnɛo.
20 È ↄ poro wɛ̃ndadeenↄnɛ,
è ↄ liga takaasideenↄzi.
21 È ĩampuu gurↄↄ vĩa kɛ a bɛdeenↄ yã musuro,
zaakɛ à uadeenↄ è uta didi kↄ̃amɛ.
22 È daɛbↄ bisanↄ tã a zĩnda,
à pↄ́kãsãanↄ nɛ́ táaru bisa kↄ̃n bisa gaarura'ideenↄmɛ.
23 À zã è tↄ́ bↄ fàadibokiia,
ègↄ̃ vɛ̃ɛna gu dↄ̃nkↄ̃ kↄ̃n bùsu gbɛ̃nsinↄ.
24 Nↄgbɛ̃ pì è pↄ́dangãn kɛ àgↄ̃ yaa,
è gère tã à kpá a latarinↄa.
25 Ègↄ̃ gbãa kↄ̃n gakuio dana pↄ́kãsãa ũ,
à kuuna zia yã è swɛ̃̀ kɛ̃nlo.
26 Ɔ̃ndↄ̃yã ègↄ̃ daa à lɛ́n,
è yã dańnɛ kↄ̃n yenzio.
27 À wɛ́ɛ ègↄ̃ tɛ́ a ua yãkɛnazi,
è mɛa pↄ́ blero.
28 À nɛ́nↄ è fɛɛ wà sa maaa onɛ,
à zã è à sáabu kpá à be:
29 Nↄgbɛ̃ paridee aĩa vĩ fá,
mↄde ḿbe ń dɛńla ń píngi.
30 Kakana maaa ègↄ̃ náanɛ vĩro,
nↄmaakɛɛ è gɛ̃ zɛ́lamɛ,
nↄgbɛ̃ kɛ̀ Dii vĩa vĩin wè sáabu kpá.
31 Ǹ zĩi kɛ̀ à kɛ̀ àre kpáa,
ǹ à tↄ́ kpá à yãkɛna musu gãalɛ.