63
Bab-Jehová Edom-dulemargi nakwisad
1 Edom-yar-akar danikid, ¿wede doawa?
Bosra-neggwebur-akar mor-ginnidbi-yoi danikid, ¿wede doawa?
Mor-nudakar-yoi danikid, ¿wede doawa?
Gandikidba binna-binnagwad danisulid, ¿wede doawa?
“Ani an danikid. An igar-innikigwadba-sunmakedid,
an dule-abonogega-gangued-nikadid.”
2 ¿Ar ibiga be-mor ginnitibi daklege?
Ar be-mor, uva-egured-galugi dule-uva-egured-e-moryob dakleged.
3 “An walagwen uva-egured-galugi uva-egurusad,
dule-bamalad gwen anba gunai gussulid.
An-sae-itogedgi an egi annasad.
An-urwedgi an maataa imaksad.
E-ablis an-morgine milesad,
degi, bela an-mor ese isgusad.
4 Buged-mai-imaked-iba bato an mesisad.
An-dulamar-bendakleged-iba bato warmaksad.
5 Dule-an-bendaked an edarbisanad, degi-inigwele, dule gwen an-bendaksasulid,
dule-wargwensaar-an-bendakbi-gussulid geg an itoged.
Dukin an-ganguedgine an emargi obichad.
An-urwedi sikirmakega an-imaksasulid.
6 An-sae-itogedgi, dulemar-yar-baid-baidgi-bukmalad-birgi an annasad,
an-urwedgi an amar-obelosad.
E-ablis napagi-milegega an imaksad.”
Bab-Jehová Israel-dulemargi nued-binsaed
7 Bab-Jehová-e-sabgued-dummad an ebinsaoed,
e-ibmar-dummagan-imaksadgi an namakoed.
Bab-Jehová bela anmarga ibmar-imaksad-ular, an ega namakoed.
Wile-anmar-daked-ular, degi, dummad-anmar-sabed-ular, an ega namakoed.
Bab-Jehová Israel-dulemarga ibmar-nuegan-bukidar-imaksad-ular, an ega namakoed.
8 Ar Bab-Dummad weyob sogsad:
“Ar napiragwa, wemar an-dulamalad, mimmigan-an-yardakmalosulidid.”
Deyobi, e-suli-suli-itogedgine, Bab-Dummad bendaknonikid.
9 Bab-Dummad dule-abonogega, dule-e-nuggi-sunmaked, degi, baliwitur, barmiarsulid,
na e-sunnad dule-abonosad.
E-sabedgine, degi, e-wile-dule-dakedgine, bendaknonikid.
Gannarse ogwichisad, na e-ganguedba sesad.
Epennegwadyobi deyob imaksad.
10 Degi-inigwele, Israel-dulemar Bab-Jehováʼba ibsassurmalad,
E-Burba-Isligwaled-wile-itogega imaksamalad.
A-ulale, Bab-Jehová Israel-dulemar-e-isdaradga gunonikid,
Bab-Dummad e-sunnad egi bila-onosad.
11 E-dulamar, epenne neg-gusmalad-ebinsadmalad,
degi, Moisés-ibagangi neggusad-ebinsadmalad, weyob sogdemalad:
“Dule demar-obakega anmar-idunadap-gusadi, emide, ¿bia gudii?
Dule Israel-dulemar-e-iduedi, ¿bia nade?
Bab, E-Burba-Isligwaled-Moisésʼgi-mesisad, ¿wede bia nade?
12 Dule e-gangued-nikadba Moisés-argan-nuedsik, Moisésʼba nadapigusad, emide, ¿bia nade?
Bab, dulemar-asabin demar-egasad,
adi, degisadegu e-nug-dummarba-guega, ¿wede bia nade?
13 Igi-moli nega-dulesulidganba gwen ibmargi-yolesuli nadapdae,
deyobi, muu-billi-odinnosadba dulemar-obakega-imaksadi, ¿wede bia nade?”
14 Igi-moli-bebe-nikamalad nebase gagan-manonidamala, deyobi,
Bab-Jehová-E-Burba, Israel-dulemarga obunnoged uksad.
Bab-Jehová, be-nug-dummarba-guega, weyobi, be-dulamar-idumai be gusad.
Bendaklegega Bab-Dummadse goled
15 Bab-Dummadye, mogir-billi-akale, be nue atake.
Be-neggandikid-islidikid-yeerdakleged-akale, be nue negdake.
¿Bia be-sabed-dummarbad, degi, be-gangued nade?
Be-wile-dule-daked, degi, be-sabgued anmar daksulid.
16 Degi-inigwele, be, anmar-Babad,
ar Abraham amba aku-anmar-dakele, degi, dad-Israel amba aku-anmar-dakbalile,
be, Bab-Jehová, be anmar-Babad.
Gusgu be Anmar-Ollor-Imakedye nugad.
17 Bab-Jehová, ¿ibiga be-igargi banguega be anmar-imake?
Bab-Jehová, ¿ibiga be, mer be-dobgumalaga, anmar-gwage-dutusur imake?
Be-maigan-sabed-ulale, be gannar dage.
Be-dulamar-danar-danar-bukwad-sabed-ulale, be gannar dage.
18 Be-dulamar ichesaale be-neg-islidikid akwisad.
Emidi, anmar-isdarmalad bela be-neg-islidikidyaba ubosad.
19 Emidi, anmala, be-anmar-dummad-iduedga-megissulidyob bukwad.
Anmala, begadga-gussulidyob bukwad.