50
Bab-Jehová dulemar-egi-bensulid bendaked
1 Bab-Jehová weyob soged:
“Israel-dulemar, ¿an bemar-nan obachasi?
Degite, ¿bia abirgin-meted-gardade nadsunna? Anga be oyodo.
¿An doa-dulemarga bemar-egi-mani-ganikidyobi an be-uksamarsunna?
An deyob be-uksasurmalad.
Ar be-isgued-ular, na be dukin uksamalad.
Bemar uaya-sate-gusad-ulale, be-nan oballedsunnad.
2 An nonigua, ¿ibiga dule-sate an daknonisunna?
An gotegua, ¿ibiga dule gwen an-abin-imaksasursunna?
¿Ar bemar-bendakosurye, be angi binsamala?
¿An bemar-onogega, garganguedsuli be an-dakmala?
Ar an sunna, demar, ilagwensaale dinna saed.
Ar an sunna, diwarmar, nega-dulesulidga-nai imaked.
Uamar e-mas-satedba burgwideled.
Dii-dingudedba uamar bela nungudeled.
3 An sunna mogir-billi nega-gubyagwaledbi-nai an imaked,
mor-sichid-naidyobi an imaked.”
4 Bab-Jehová binsaed-ibegan-sunmaked-gwabinduku anga uksad,
adi, dulemar-geggus-gudimalad-e-gwage gadi-gadi-imakegar.
Bab-Dummad bane-bane wakudaryalabali an-odaked,
ibmar-itogega an-imaked,
adi, dule-ibmar-durdaknaidyobi an ibmar durdakegar.
5 Bab-Jehová ibmar-magar-itogega an-imaksad,
an eba uayasuli gussulid,
an eba ibsassuli gwen gussulid.
6 Dulemar-an-bibyonanaidga an-yargan an oyosad.
Dulemar-an-siga-sabsur-ungemaladgi, an-aku an gwen odukussulid.
Degine, dule-angi-dodomaladgi, degi, angi-wiakmaladgi, an-wagar an gwen odukussulid.
7 Ar Bab-Jehová-Bur-Birigined an-bendaked,
degisoggu, mesagwar-imaklenaidgi an bai itossulid.
A-ulale, akwasailayob an na gandik imaksad.
Ar an wisid, an bingeguosulid.
8 Dule-an-irwa-gwisguedi, an-nagaba gudiid.
¿Degisoggu, doa anbo gala-itobie?
Dule anbo-gala-itobiele, ¡anse dagdo!
Dule angi gwisgubiele, ¡anga ibmar sogdado!
9 ¡Ar Bab-Jehová-Bur-Birigined an-bendakdaed!
¿Doa sabsur-odurdakleged-igar anga mesosunna?
Ar an-isdarmaladdi, ilagwen-berguar gudoed,
igi mor suuse-gulledae, deyobi namaloed.
10 ¿Doa bemar-abargi Bab-Jehová-dobee gudii?
¿Doa Bab-e-mai-sogedba nanadii? Dule sated.
Dule-negasichidba-nanadiidi, neg-meegwadba-nanadisulidi, a-dule, Bab-Jehováʼgi bensuli guoed,
e-Bab-Dummadgi alakwaa naguoed.
11 Ar bemar na soo ogadamalad,
na be gwinnur ogadamarbalid.
Bemar na be soo-ogadamaladgi be nanabukmalad,
na be gwinnur-ogadamaladgi be nanabukmalad.
Degi-inigwele, an we-ibmarmargi sabsur-bemar-odurdakoed:
Igar-bulegangi be sabsur-odurdaklemaloed.