19
Egiptoʼgi-yoedse-ibmar-guoedgi sunmaklesad
1 Egipto-yar-guoedgi iduakwaa sunmaklesad:
Bab-Jehová be dakmala.
Mogir-gwae-gwae-iirmakmaid-birgi-sii, Egipto-yalase danikid.
Egipto-e-bab-dummagan e-abin wawanmakbukwad.
Egipto-dulemar nue dobe-itomalad.
2 Bab-Jehová soged:
“Egipto-dulemar na abin-abin-urwemalaga an imakoed,
na e-gwenad-e-gwenad-egi-gwisgumalaga an imakoed,
dulemar-na-e-aimarbo-urwega an imakoed,
neggweburmar-na-abin-abin-urwemalaga an imakoed,
yalamar-na abin-abin-urwemalaga an imakoed.
3 Egipto-dulemar suli-suli itodamaloed,
bab-dummadyob-imaklemaladse idakdemaloed.
Dule-burgwarmalad-e-burbase idakdemaloed,
bab-dummad-gayaburba-barsoged-bundorse idakdemaloed.
Yoo-ibmar-guoed-soged-dulese idakdemaloed, anmar ibu imakoye.
Degi-inigwele, e-igarmar igarga-guega an imakosulid.
4 Egipto-dulemargi dule-bulegan yar-seega an imakoed.
Rey-isgana yar-seega an imakoed.
Ani Bab-Jehová-Bela-Gangued-Nikad soged.
5 ”Demar-naid dingudoed,
Nilo-diwar-maid bela dinna naoed.
6 Dian-akwiar-mamaid sunnasuli yapanne gudoed,
Nilo-diimar-iirmakmaidi, iremai gudoed, bela dinna naoed.
Nallayob-daklemaladi, degi, nagwaryob-daklemaladi, bela burgwidoed.
7 Nilo-diwar-gakaba ibmar-digarmaladi, bela burgwidoed,
Nilo-diwar-gakaba ibmar-nanaidi, bela bergudoed,
bela swiri naoed, bar daklegosulid.
8 Bela dule Nilo-diwargi-ua-somaladi, degi, bela saki-miar-ua-gamaladi, bukib binsadmaloed,
bela bodmaloed.
9 Bela dule lino-mor-nued-sobedgi-arbamaladi, degi, saki-sobedgi-arbamaladi,
suli-suli itodamaloed.
10 Ua-galugi-arbamaladi, nue-wiles itodamaloed,
ar bela e-sakimar itiridoed.
11 ”Zoán-neggwebur-e-dummagan, dule-binsaed-ibedye be sogdimalad,
bemar dule-gegeganad.
Ar bemar Faraónʼga binsaed-isgana ukdimalad.
Ar igi yogasaar bemar sogmalosunna:
‘Anmar binsaed-ibedye, epenne-reymar-binsaed-ibegan-megismaladse binsaed amismaladye.’
12 ”Egipto-rey, ¿be-dule-binsaed-ibegande bega igigudmarsunna?
Emide, be-dule-binsaed-ibegan bega sogmardo,
ibu Bab-Jehová-Bela-Gangued-Nikadi, Egipto-dulemargi imaksokali,
igi-Egipto-dulemar-idu igar-amismaidi, bega sogmarbardo.
13 Zoán-neggwebur-e-dummagan dule-binsaedsulidga nadmalad,
Menfis-neggwebur-e-dummagan ese yamolesmalad.
We-neggwebur-e-dummagan, Egipto-yala noar sesmalad.
14 Ani an Bab-Jehová dule-binsaed-dakmaladgine, suli-suli-neg-itoged-burba egi nasiksad.
Bela Egipto-dulemar-ibmar-imakedi, noarsaila imakdemalad.
Igi-dule-mummudi, agar-agar banamakdii,
debayobi, Egipto-yala banamaksiid.
15 Gege bar Egipto-yar-ulale, ibmar imakleged.
Ar dule-dummagana, dule-ibmar-wismaladi,
dulamar-bukwadi, degi, sordamala,
gege bar Egipto-yar-bendakega ibmar imakmalad.”
16 A-ibagangine, Egipto-dulemar, Bab-Jehová-Bela-Gangued-Nikad sabsur-e-odurdakega egi gwisgualile, omeganyobi dobe itodmaloed. 17 Egipto-dulemar Judá-dulemar-dobe itodamaloed. Ar Judá-dulemargi wis binsadmalale, bato dobed egi nagudmaloed. Ar ade, Bab-Jehová-Bela-Gangued-Nikadi Egipto-dulemar-idu igar-bulegan amisad.
18 A-ibagangine, Egiptoʼgi neggwebur-gwaatale Canaán-dulemar-gayaba sunmakdemaloed, degi, ise-sogar Bab-Jehová-Bela-Gangued-Nikadga sogdemaloed: Anmar be-sogedba damaloye. A-neggwebur-gwagwenad nugguoed, Herez-neggweburye.
19 A-ibagangine, Egipto-yalagi Bab-Jehováʼga ibmar-ogumakar-ukleged-aila sigoed. Geb degine, yar-abingunaid-nagaba Bab-Jehováʼga akwa-dummad ogwismarbaloed. 20 Ar a-akwa-dummadi Egipto-dulemarga e-wilubga guoed. Adi, oyogega, Egipto-dulemar Bab-Jehová-Bela-Gangued-Nikad-e-nug odummomarmoye. Ar Egipto-dulemar Bab-Jehováʼse mesagwar-dule-e-imakmaladgi e-ollor-imakega gotemaloed. Bab-Jehová ega dule-e-abonoged, degi, dule-e-ular-gwisgued barmidagoed, adi, mesagwar-dule-e-imakmaladgi ollor-imakegar. 21 A-ibagangine, Bab-Jehová Egipto-dulemar magar-e-dakega imakoed, ede, nue-Bab-Dummad guye. Geb Egipto-dulemar magar daknonimaloed, wede, Bab-Jehová nue-Bab-Dummad guye. Degi, Bab-Jehováʼga ibmar-oburgwar ukdemaloed, ibmar-gwagmar ega ukdemaloed. Bab-Jehováʼga ise-ibmar-imakoye-sogmaloedi, na sogedba ega imakmaloed. 22 Bab-Jehová bonigi Egipto-dulemar-naibi-imaknonikoed, geb a-sorbali, onugubaloed. Geb degi, Egipto-dulemar Bab-Jehováʼba gannar nagudmaloed, degine, Bab-Dummad wile amar-dakoed, degi, onuguoed.
23 A-ibagangine, Egipto-akale, Asiria-yalase igar-dummad megoed. Geb Asiria-dulemar Egiptoʼse nanabukwa gumaloed, degi, Egipto-dulemar Asiriaʼse nanabukwa gumarmogoed. Egipto-dulemar, Asiria-dulemarbo Bab-Jehová-nug odummobukwa gumaloed. 24 A-ibagangine, yala-sogapaa ambikumaloed: Egipto, Asiria, Israel. Degi, wemar-yalagi neggwebur-bamaladba egi nued binsalegoed. 25 Ar ade, Bab-Jehová-Bela-Gangued-Nikad bela we-yalamargi ise-nued binsaoed, weyob sogdoed: “Egipto an-dulamarga gued. Egi nued binsalesun. Asiria-dulemargi nued binsalesun, ani an urbisad. Degi, Israel-dulemargi nued binsalesun, wedi angadid. Ani an we-dulemar susad.”