13
1c. Yar-baid-baidgi-bukmaladga sunmaklenaid
(13:1–23:18)
Isaías, Babilonia-yala-yoedse-berguoedgi sunmaksad
1 Bab-Dummad Amoz-machi-Isaíasʼga Babilonia-dulemar-berguoedgi sunmaksad:
2 Yala-swire-naidgi bander be mer-mer imakmar,
sorda-bila-onomaladse be binnasuli gormar.
Argan ese be oyomar,
adi, dule-nuga-nikamalad-yawagakba ubomalagar.
3 Anga-nug-salegarmaladga bato an igar-uksad.
Anga-dule-bulegan-gumaladi, an-nakwedgi-na-yeer-itodimaladi, an guakwaa urbisad,
adi, anga sabsur-dulemar-odurdakegar.
4 ¡Be itomar! Yalaganba neg-oimake itoleged,
dulemar-ichesur-oimakedyob itoleged.
¡Be itomar! Neggwebur-dummagan-atosmalad-oimaked, be itomar,
mala-gollomakedyob e-oimaked itoleged.
Bab-Jehová-Bela-Gangued-Nikad, bila-onogega,
sorda-bila-onomalad-guagwar urbenaid.
5 Neggwebur-dikasulidba danimalad,
yarmar-bergunaid-akale danimalad.
Bab-Jehová, e-urwedba-ibmar-ebulemalad sedanikid,
adi, bela napneg obelogegar.
6 ¡Be bomarsun! Bab-Jehová-urwemaid-iba omosad,
Bab-Dummad-Bela-Gangued-Nikad bemar sabsur-odurdakoed-e-iba danikid.
7 A-ulale, bela argan nollomakdoed,
bela dulemar niga-argwatemaloed.
8 Bela-belad dobe-itodmaloed,
suli-suli-itomaloed, nunmaked-dummadi egi nagudmaloed.
Igi-sior-muu-neggi-ugakgunair nunmaked-itodae,
deyobi, egi nunmaked nagunonikoed.
Dukin-dukin geger na dakdemaloed,
e-wagarmar-daklegoedi, bela-bela dobed-nika daklemaloed.
9 ¡Be dakmar! Bab-Jehová-urwed-e-iba danikid:
Iba-buled dani, yeer-gangued-iba, bela-belad-urwed-iba dani,
napneg ollobi daarmakar nasikoed,
agine, bela dule-isgubukmalad obelogoed.
Bab-Jehová soged:
10 “Niisgwamar mogir-biriba-nanaidi bar gaosulid,
niisgwamar-danar-danar nanaidi, bar ibegwar gaosulid.
Dad-ibeler-noalile, sichii naguoed,
bar nii ibegwar gaosulid.
11 Napneggi-dulemar-bukwad e-isgudiid-nukad an sabsur-odurdakoed,
dule-isganamar e-ibmar-isgana-imakdiidba an sabsur-imakoed.
Dule-na-san-dummarba-imakmaladi, na san-dummarba-imakega bar guosurmalad.
Dule-bulegan-na-san-dummarba-imakmaladi, na san-dummarba-san-saega bar guosurmalad
bela nug-bipi-gumalaga an imakoed.
12 Dulemar, olo-sunsoged-icheguedba bur ichee-bukuega an imakoed.
Dulemar, Ofir-or-nued-icheguedba ichee-bukuega an imakoed.
13 A-ulale, ani Bab-Jehová-Bela-Gangued-Nikad, an-urwemaid-ibagangi an-urwedba nibneg giglimakega an imakoed.
Napneg e-naidgi ainirega an imakoed.
14 Dulemar igi-goe-sapur balegillemaidae,
deyob, balegillegoed, e-neggweburse duurmakdemaloed.
Igi-sibad-wawaad e-idugedsuli duurmakmadaedyobi gumaloed,
wala-walagwen e-yarse wakitemaloed.
15 Doa-dule galenonikile, ewarar oburgwilegoed,
dule yogasaar-galesale, es-suidgi oburgwilegoed.
16 Dulemar-wagaba e-mimmigan omukudmaloed,
e-negmar-ibe ibmarmar atursadmaloed,
e-omegan e-ibe gagadmaloed.
17 Babilonia-dulemargi Media-dulemar gwichiguega an imakoed.
We-dulemar mani bai dakdasurmalad,
orgi gwen weligwar itodasurmalad.
18 E-sigugi ese sapingana, yagana, oburgwilegoed,
goe-gwarugana gwen wile dakosurmalad,
burwigana gwen bai dakosurmalad.
19 Babilonia-neggwebur, be yeerdakleged, gandikidba be yeer-dakleged,
Caldea-dulemarga be san-dummarbaa gusiid.
Emidi, Sodoma-neggweburyob be guoed,
Gomorra-neggweburyob be guoed.
Ani an Bab-Dummad gued.
Igi an we-neggweburmar obelosa,
deyob an be-imakmaloed.
20 Bipisaale, bar dulemar egi ambikuosulid,
dulemar-sorba-danimaloedi bar egi ambikuosurmalad.
Árabe-dulemar we-yargi bar megosulid.
Sibad-wawaad-edarbedi, bar egi e-sibad-wawaadmar oambikuosulid.
21 Unnila nega-dulesulidganba ibmar-durgan-ursilimaladbi bukuoed.
E-negmargine, irmonbi ena ambikuoed,
nuu-dummad-malisuiganbi a-yargi ambikuoed,
sibad-omegan-sapurbarmaladbi gudidioed.
22 E-neg-gandikmaladgi achu-sapurmarbi gordioed,
e-reynegmargi achu-sapur-uaya-gannareged-bunnu-wawaadmarbi gordioed.
Babilonia-neggwebur, Bab-Dummadse be sabsur-odurdakleged-igar omodanigusad,
bar bega ibamar obannolegosulid.”