47
Ozi, e ziru ndu Filisitayinu
1 Ọwaa bụ Opfu Chipfu, bụ ọphu rwuru Jieremaya nchị, bụ opfu ẹhu ndu Filisitayinu; tẹme Fero bya etsoo ndu mkpụkpu Gaza ọgu.
2 Wakwa iphe, Chipfu epfu baa:
Lewarọ gẹ mini shi l'ụzo
isheli abya kẹ kụlakula.
Oo-mecha bụru utso,
asọ gborogboro.
Ọo-sọ-kputa alị l'ophu;
yẹe iphemiphe,
nọ iya nụ;
sọpyabe mkpụkpu;
yẹe onyemonye,
bu iya nụ.
Ndu ono e-chishi mkpu.
Mbụ l'iphe, bụ ndu bu l'alị
ono a-tụ ụzu-ẹkwa.
3 Mbụ l'ẹphe -nụmaepho igiji
ichirupfu-ọkpa ịnya phẹ;
bya anụma ụzu ụgbo-ịnya
ndu ọhogu phẹ;
yẹe kwọkiri kwọkiri,
ọkpa ụgbo-ịnya
phẹ ono eme bẹ ndu
bụ nna tee leẹdu
ẹnya l'azụ k'eyeru ụnwu
phẹ ẹka.
Ẹka a-tụhu phẹ
lwakpalwakpa.
4 Kẹle mbọku rwuakwaru teke
ee-mebyishikọta ndu
Filisitayinu g'ẹphe
hakọta.
L'e mee gẹ nwa ndu phọduru
nụ, bụ ndu gege eyeru
ndu mkpụkpu
Taya yẹe ndu mkpụkpu
Sayịdonu ẹka chịhu;
kẹle Chipfu abyakwa
emebyishi ndu
Filisitayinu;
mbụ nwa ndu phọduru nụ
lẹ ndu alị Kafụto.
5 Ndu mkpụkpu Gaza
kpụshiwaru ishi aphụ.
Ndu mkpụkpu Ashikelọnu bẹ
a lawarụ l'iswi.
Sụ-a; unubẹ nwa ndu ọphu
phọduru lẹ ndu Anaku;
?unu e-yejashịkpoo
onwunu ẹgube-a jasụ
teke ole?
6 “Sụa-a; gụbe ogu-echi
Chipfu;
?bụkpoo teke ole bẹ
oo-jeberu l'ịikabe
tụta unme?
Kabẹnu mịru onwongu
yee l'ọbo!
Tụtanu unme; nọdunu nwa
nggujingguji!
7 Ọle ?dẹnukwanu g'oo-shi
nọdu nwadoo
l'ẹka iile ẹnya lẹ Chipfu
tụwaru iya ekemu
sụ g'ọ lwụa ndu mkpụkpu
Ashikelọnu;
yẹe ndu bu l'agụga
eze-ẹnyimu?
Mbụ l'onoo g'o pfuwaru
l'ọo-dụ bụ ono.”