23
Te Devitgo asęani balia po me deli dao.
Genuai Bidi agai da tonalubo bidi dao
1 Genuai Bidi te ena tonalubo bidi da, tama
ena te aga sipsip me deli tiwai dao.
Tama tiyu, te magi nai me deli ena me sǫą pogobeo.
2 Agai ena te wiegi yai tuabo nosaide
pila mumainu ebo dao.
Tama agai ena te dwasianu wę ulu
pedalubo madi odasa pelama, tama ena te wę tuyu,
te ena toma nabo dao. [Ped 7:17]
3 Agai enabolo gesi bomo mabo dao.
Tama agai ena te doloba pai sunumidu
odasa pabo dao, te agai tama tiaiba po
polobadu wali gilama ebo dao.
4 God, ena te dwai bulu
te be hulia sai madi bilibaso da,
te tagalao, ena te dwai naide wi me egobeo.
Magi baso meni, nage ena dali bidibao.
Eno suali, nago te sipsip tonalubo
bidigo dono tolasa bilibo suali,
tama tibaso, eno homu nagame elama,
bidibo dao. Ena me dologobeo.
5 Nago te eno wiegi yai nai te hania
te tebol saide sisi ilama,
tama eno boi bidi dabego suali goli,
te augwaligo magi sę me yabo usugobeo.
Nago ena selama, te nage dali duayagasobo,
tama ena nago bugagia gesebo dao.
6 Genuai Bidi, eno mu koneani,
te nago ena bugagia tonalu,
tama nago enade homu dene eyu, tau sabo kolesaga,
te kolesaga si te ena dali sesemane sogo bidaibao.
Tama, Genuai Bidi, ena nago bede
sesemane sogo bidada peyu, bidada paibao.