3. ESDRAS JERUSALÉN-NEGGWEBURSE NONIKID
7
(7:1–8:36)
Esdras Jerusalén-neggweburse nonikid
1 Bela we-ibmarmar-gusad-sorbali, Artajerjes Persa-dulemar-e-rey, yar-semaiunni, dule-wargwen gudii gusad.
A-dulede, Esdrasʼye nugad.
Esdras, Seraías-e-machi. Seraía, Azarías-e-machi.
Azarías, Hilcías-e-machi. 2 Hilcías, Salum-e-machi.
Salum, Sadoc-e-machi. Sadoc, Ahitob-e-machi.
3 Ahitob, Amarías-e-machi. Amarías, Azarías-e-machi.
Azarías, Meraiot-e-machi. 4 Meraiot, Zeraías-e-machi.
Zeraías, Uzi-e-machi. Uzi, Buqui-e-machi.
5 Buqui, Abisúa-e-machi. Abisúa, Finees-e-machi.
Finees, Eleazar-e-machi. Eleazar, Aarón-e-machi.
Aarónʼde, gebe dule-irwa-Bab-Dummadse-goledga gusadid.
6 We-Esdras Babilonia-neggwebur-akar nonikid. A-dule, dule garda-narmaked-duled, degi, Israel-e-Bab-Dummad-Jehová Moisésʼba-Igar-uksa-gusad nue-wisbalid. Ar Israel-e-Bab-Dummad-Jehová Esdrasʼba nue gudigusoggu, Rey-Artajerjes, Esdras ese-ibmar-egichisadi bela ega-sogedba uksad.
7 Rey-Artajerjes birgaguglegus-yar-dakmaidgi (7), Israel-dulemar gwenna-gwenna Esdrasʼba Jerusalén-neggweburse nonimalad
Amarde, wemalad:
Dule-irwa-Bab-Dummadse-gormalad,
Levita-dulemar, dule-namakmalad,
dule-yawagak-dakmalad,
degi, dule-Bab-Dummadse-goled-neggi-arbamalad.
Amala, Esdrasʼba Jerusalénʼse nonimalad.
8 Degisoggu, Esdras, Rey-Artajerjes birgaguglegus (7), negdakmaidgi a-nii-walatargine, Jerusalén-neggweburse nonigusad. 9 Esdras Babilonia-neggweburgi gebe-nii-gwisgusad-iba-onodedgine, noaligusad. Ar Bab-Dummad dule-wiledaked-maid eba gudigussoggu, geb Jerusalén-neggweburse gebe-nii-walatar-gwisgusad-ibagi nonigusad. 10 Esdras, Bab-Jehová-Igar-Maid-durdakegala Bab-Igargi nue-alamaknai gusad. A-Igar-Maid-sogedba-ibmar-saega, degi, Bab-Jehová-Igar-Maidgi, degine, Bab-Dummad-Igar-sogsadgi Israel-dulemar-odurdakega Bab-Igargi nue-alamaknai gusad.
Rey-Artajerjes Esdrasʼse garda barmisad
11 Rey-Artajerjes, dule-irwa-Bab-Dummadse-goled-Esdrasʼga we-garda uksagusad. Dule-garda-narmaked-Esdrasʼde, Bab-Jehová-Igar-Maid nue-wisidid. Deginbali, Bab-Dummad Israel-dulemarga-ibmar-sogsad nue-wisbalid. Rey weyob garda narmaksad:
12 “Ani Artajerjes, reymar-e-rey, Esdrasʼse an we-garda an-barmisiid. Bedi dule-irwa-Bab-Dummadse-goledid, degi, garda-narmaked-dule-gubalid. Deginbali, Bab-Dummad-Nibneg-Dakmaid-Igar be nue wisbalid: Bitigine be nueganbina gadin.
13 ”An igar-uksad: Bela Israel-dulemar an-yargi-bukwad, dule-irwa-Bab-Dummadse-gormaladi, degi, Levita-dulemarse-bakale, Jerusalén-neggweburse beba nabimalale, namalodo. 14 Ani rey, degi, anga-binsaed-dakmalad-gugled-nuggine (7), Judea-yalase, Jerusalén-neggweburse, dulemar-daknaega an be-barmisiid. Igi be be-Bab-Dummad-Igar-wisi, deyobi bule-nabiri, we-Judío-dulemar Bab-Dummad-Igar-Maidba nanabukmarmodibe.
15 ”Deginbali, or be sedo, mani be sedbalo. Wede, ani rey, degi, dulemar-ega-binsaed-dakmalad e-binsaedba Israel-e-Bab-Dummadga uksamalad. We-Bab-Dummadde, Sión-yalagi, Jerusalén-neggweburgi maid. 16 Degine, Babilonia-yalagi, mani, ormar bega uklesale, be sedbalo. Deginbali, dulemar, dule-irwa-Bab-Dummadse-gormalad, Bab-Dummadse-goled-neg Jerusalén-neggweburgi-siidga e-binsaedba-ibmar-ukmaloedba be sedmalo. 17 A-manigi, ibmar-durgan be baksuli gudager: Moli-bebe-nikad-sapingana, sibad-wawaad-machergan, sibad-wawaad-sapingana. De-ukinbali, Bab-Dummadga-ibmar-uklebaloed be bakbalo: Ibmar-gwagmar, vinoʼmar. Geb degi, Jerusalén-neggweburgi bemar-Bab-Dummadse-goled-neggi Bab-Dummadga ibmar-ogumakar-ukleged-aila-siidgine, bemar we-ibmarmar Bab-Dummadga-ogumakar ukoed.
18 ”Mani-gwabgumaloedi, or-gwabgumaloedi, be dakedba, degi, be-gwenadgan-dakedba na be imakmaloed. Degi-inigwele, bemar-Bab-Dummad-sogedba be imakmalo. 19 Bab-Dummadse-goled-neggi ibmar-ebulemalad bega-uklesadi, a-neggi be urboed. Adi, Jerusalén-neggweburgi be-Bab-Dummadse-goled-neggi ebulegegar. 20 Ibmar-baigan be-Bab-Dummadse-goled-negga nue abegele, rey-mani-bukwadgi, baklegoed.
21 ”Emide ani, Rey-Artajerjes, bela dulemar Éufrates-diwar-dad-argwanedsik mani-dakmalad-bukmaladga an we-igar uked: Dule-irwa-Bab-Dummadse-goled-Esdras, Bab-Dummad-Nibneggi-Maid-e-Igar nue-wisidi, bemarse ibmar egichialile, ega be ibmar ukmalo.
22 Sunna ega be we-ibmar ukmaloed:
Mani, nibir-miligugle gaka dulataled-ilabo gaka dulapaa (7,260).
Orosgi-dakleged-trigoʼye-nugad, tambor-gwadulatar (100).
Vino, galón-gwa-dulataled-ilatar gaka dulabo-gakambe (550).
Olivo-gwallu, galón-gwa-dulataled-ilatar gaka dulabo-gakambe (550).
Degine, baludi, wilubsarsuli ega be ukmaloed.
23 ”Bela Bab-Dummad-Nibneggi-Maid igar-uksadba, a-sogedbali, ese-goled-negga inniki be ibmar-ukmaloed, ar adi melle Bab-Dummad, rey-negsemaidgi, degi, e-masmalagi urwegar.
24 An bemar-owisobalid, melle we-dulemar neggwebur-bennukega be imakmalo:
Dule-irwa-Bab-Dummadse-gormalad, Levita-dulemar,
degi, dule-namakmalad. Deginbali, dule-yawagak-dakmalad,
dule-Bab-Dummadse-goled-neggi-arbamalad,
degi, dule-Bab-Dummadse-goled-neggi-ibmar-imakmalad,
”Melle we-dulemarse ibmar-weleged be egismarbalo, degi, ibmar-sedanikidgi-mani-galeged melle bennukega be imakmarbalo.
25 ”Esdras, bedi, Bab-Dummad-binsaed nue-nikasoggu, dule-igar-nabiromaladi, dule-dummagan-neggwebur-semaladi be nug-imako. Adi, amar bela dulemar-Éufrates-diwar-dad-argwanedsik-bukmaladga igar-nabogegar. A-dulemardi, bela dulemar Bab-Dummad-Igar-Maid wismaladid. Deginbali, dulemar amba Bab-Dummad-Igar-Maid-wissulile, be amar-odurdakbalo. 26 Ar, dule-gwensak be-Bab-Dummad-Igar-Maidba ibmar-imaksulile, degi, rey-igar-mesisadba dasurbalile, we-dule ise-sabsur-odurdaklegoed: Oburgwilegodibe, neggweburyagi ononnolegodibe, igi egi-mani-dummad galegodibe, igi, esgaryagi odolegodibe.”
Esdras Bab-Dummadse gochad
27 Geb degidgine, Esdras Bab-Dummadse gotesunnad:
“Bab-Jehová, anmar-dadgan-e-Bab-Dummadye, be nug odummolesun. Emide, Rey-Artajerjes-e-gwage be ebusad, Jerusalén-neggweburgi bese-goled-neg-siid ogannogegar. 28 Bab-Dummad, bedi wile an-dakedbali, rey, degi, dulemar-ega-binsaed-dakmalad, dule-dummagan-gangued-nikamalad, a-dulemar-asabinni, yeer an-dakega be an-imaksad. Bab-Jehová, bedi anba gudigusoggu, an-niga gangusad.”
Degisoggu, Israel-dule-dummagan, Jerusalén-neggweburse anba-naega an oambikusad.