मरकुस रचीत यीशु मसीह का सुसमाचार
मरकुस लिखेल यीशु मसीन हाजाली खुबेर
ओलखात
यीशुन जीवणान बाराम देखाड़नारान नोवाला नेम माय चार पुस्तेका माय रेन एक पुस्तेक हे मरकुस ने लिखेल हाजाली खुबेर हे, न्या चार पुस्तेकाह हाजाली खुबेर कियेल हे, ज्यी चार हाजाली खुबेर यीशुन जीवणान बाराम केत्युह।
यीशुन मोरनेन पासाण ज्यी चार हाजाली खुबेर एकान पासाण एक मत्ती, मरकुस, लुका, योहान ज्या लिखेल हेते, एने न्या चार माय रेन मरकुस ने हाजाली खुबेर आखाह रेन आतली पुस्तेक हे, मरकुस ने हाजाली खुबेर आखा रेन पेल लेखायेल हे, एने यीशुन जेल्मान कोमीत कोमी 65 रेन ते 70 सालान पासाण रोम हेयरा माय रेन लेखायेल हे काय मसी मोंडलीन बुरहो वोड़ावणेन केरता, एने ईमोत आवणे जुवे तानकेरता ज्यी हाजाली खुबेर लेखायेल हे।
एने इही केतेह काय ज्यो मरकुस कुण हे? प्रेरित पौलुसान एने बरनबास ने जो जुवान हाती योहान मरकुस हे, जो तान पेल्ली मिश्नरी यात्रा माय जाणेन टेम मा आरदे वाटी रेन सोड़ीन नाह जायेल ईतो, मरकुस ओहलो किरेल तान केरता तान जीवाह दुको पोचनो प्रेरितान काम 13:13 पासाण जोच मरकुस बरनबासा हिऱ्यो मील जायेल ईतो, प्रेरितान काम 15:37-39, 1 पतरस 5:13 ने गेत मरकुस पतरसान आरहीन हाती ईतो, जाणकारान मान्नो हे काय मरकुस यीशुन जीवणो एने सेवान काम डोला केरीन दिखेल नाह ईतो, तीबी पतरसान पुरावान आदारा पोर तो ज्यी हाजाली खुबेर लिखेल हे, ज्यो मरकुसान हाजाली खोबरीन आदार हे।
मरकुस हाजाली खुबेर ने पुस्तेक माय मुख्य दुय वातुन बाराम हे, यीशुन चेला किहीक बोणनु, एने आखरी टेम ने बाराम यीशुन हिकवोण।
रूपरेखा
1. बपतीस्मा केरनार योहान एने यीशुन बपतीस्मा। 1:1-13
2. यीशुन द्वारे गेलील ईलाकाम यीशु किरेल चोमेत्कार। 1:14–9:50
3. गेलील माय रेन यरूशलेम वोर यीशुन यात्रा एने मोंदिर माय जाणो। 10:1–12:44
4. यीशुन द्वारे बविष्यान बाराम आपेल हिकवोण। 13:1-37
5. यीशुन मोरने एने जीव उठणो एने मोटलो उकुम। 14:1–16:1-20
1
योहान बपतीस्मा केरनारान पारचार
(मत्ती 3:1-12; लुका 3:1-18; योहान 1:19-28)
1 ज्य बोगवानान बेटाख यीशु मसीन, हाजाली खोबरीन सुरवात हे।* 1:1 थोड़ाक लेख माय बोगवानान बिटोख नाह लिखेल हे। 2 जिहकेरीन यशाया जाणकारान पुस्तेक माय लिखेल हे:
बोगवान केयो, “देख, ‘मी तार ओंगाण मार खोबर्याह मोकेलथु।’
3 उजाड़ी माय एक आयेड़नारान आवाज होमलानो,
‘बोगवानान वाट तियार किरो;
एने तान वाट हुतरी किरो!’ ”
4 † 1:4 थोड़ाक लेख माय बपतीस्मा केरनार योहान पारचार किरतेन जेंगला माय देखाय दिनो। तानकेरता बपतीस्मा केरनार योहान उजाड़ी माय आवीन बपतीस्मा, एने पारचार केरतालो देखानो। एने माणहाह केयो, “पाप केरने सोड़ो एने बपतीस्मा लिवो, काय बोगवान तुमरा पाप माफ केरी।” 5 यहुदिया देसान ईलाका माय रेणारे आखा माणहे, एने यरूशलेम हेयराम रेणारे माणहे योहान फाय आवा, एने वचन होमलीन जान तान पापान माफी मांगीन यरदन नेदी माय योहान फाय रेन बपतीस्मा लेदा।
6 योहान उटड़ान रोचकान फाड़का पेर रियेल ईतो, एने कोमरा माय चामड़ान पुट्टो बांद रियेल ईतो, एने तान खाणो टिड्या एने जेंगली मोवाल एतो। 7 योहान इहकेरीन पारचार केरतालो, “जो एदमी मार पासाण आवण्यो हे, तो माहु रेन जादा ताकेतवालो हे। तान खाहड़ान दोयड़ी सोड़नेन वोर मार माय लायकी नाय मीले। 8 मी ते तुमूह पाण्या केरीन बपतीस्मा केरथु, पुण तो तुमूह चोखाला जीवा केरीन बपतीस्मा केरी।”
यीशुन बपतीस्मा एने पारेख
(मत्ती 3:13–4:11; लुका 3:21,22; 4:1-13)
9 ता दिह्याम ओहलो एनो काय यीशु गेलील ने नासरत गावाम रेन आवो, एने यरदन नेदी माय योहान फाय रेन बपतीस्मा लिदो। 10 जेवी यीशु बपतीस्मा लेन पाण्या माय रेन उपेर आवो, तुलेचबूखे यीशु हेरोग उगेड़तालो एने चोखाला जीवाह पेरवान गेत ता पोर उतेरतालो दिख्यो। 11 ✡ 1:11 मत्ती 3:17; 12:18; मरकुस 9:7; लुका 3:22एने हेरगा माय रेन ज्यो आवाज होमलानो, “तु मारो मोंगाल्लो बिटोख हे, एने मी तार पोर जुलूम खुस हे।”
12 तेवी चोखालो जीव यीशुह उजाड़ी माय ली गीयो, 13 एने उजाड़ी माय चालीह दिह वोर सैतान यीशुन पारेख किरते रिनो; एने यीशु जेंगली जेनवेरा हिऱ्यो रिनो, पुण हेरोगदुत आवीन तान सेवा चाकरी केऱ्या।
यीशुन सेवान सुरवात
(मत्ती 4:12-17; लुका 4:14,15)
14 बपतीस्मा केरनार योहान देराय जाणेन पासाण यीशु गेलील माय आवो, एने बोगवानान राज ने हाजाली खोबरीन पारचार किरते रिनो। 15 ✡ 1:15 मत्ती 3:2एने यीशु इही किन पारचार केरतालो, “टेम पुरो एय जायेल हे, एने बोगवानान राज आहने आव लागेल हे; तुमरा पापाम रेन मोन फिरावो एने हाजाली खोबरी पोर बुरहो किरो!”
16 जेवी यीशु गेलील ने देरीयान दिड़े दिड़े जाणे बाजरियेल ईतो, तेवी तो शमोन एने तान बाहख अन्द्रियासाह देरीयाम जाल टाकताला दिख्यो, काहाकाय ता मासऱ्या एता। 17 तेवी यीशु ताह केयो, “मार पासाण आवो मी तुमूह हिकाडुह काय माणहाह बोगवाना फाय किहीक लावणु हे।” 18 ता यीशुन वात होमलीन जालीह जागेस सोड़ीन तान पासाण चाल देना।
19 यीशु थोड़ोक ओंगाण चालीन गीयो, तेवी जब्दीन सोरा याकुब एने योहान ज्या दुय बाहख डोंडह्या पोर जाल हुदारताला ताह देखाना। 20 जेवी यीशु ताह दिख्यो, तुलेचबूखे ताह हाद्यो; एने ता तान आबाख जब्दीह मोंजर्या हिऱ्यो डोंडह्या पोर सोड़ीन यीशुन पासाण चाल देना।
यीशु बुतड़ो लागेल माणहा हुदारने
(लुका 4:31-37)
21 तेवी यीशु एने तान चेला गेलील देसान कफरनहूम हेयरा माय आवा, एने यीशु विहेवणेन दिह यहुदिन बोक्ती केरन्या गेरा माय जाईन हिकाड़ने बाज गीयो। 22 ✡ 1:22 मत्ती 7:28,29एने माणहे यीशुन हिकवोण होमलीन बोंगलाय जाताला, काहाकाय यीशु ताह देरेमगुरून गेत नाह; पुण आदिकार हिऱ्यो हिकाड़तालो।
23 तुलेचबूखे बोक्ती केरन्या गेरा माय एक बुतड़ो लागेल माणुह एतो, तो आयड़ीन केयो, 24 “एय यीशु नासरी आमुह तुवा हेऱ्यो काय काम? काय तु आमुह खेतेम केरने आयेल हे? मी तुवाह जाणथु, तु बोगवानान चोखालो खुबर्यो हे!”
25 पुण यीशु ताह दोपकाड़ीन केयो, “ठावको रे, एने ज्या एदम्यान सेरीर माय रेन निकेल जा!”
26 तेवी बुतड़ो ताह मोहदेलीन मोठेस आयेड़नो, एने तान सेरीर माय रेन निकेल गीयो। 27 तो देखीन आखा माणहे ओला बोंगलाय गीया एने एका दिहराह केया, “ज्य काय हे? काय ज्यी नोवाली हिकवोण हे? ज्या एदम्या फाय बुतड़ाह उकुम आपणेन आदिकार हे, एने तो तान उकुम मानेह!”
28 एने यीशुन बाराम खुबेर गेलील ईलाकान आहने पाहने आखी जागे पोसीर गीयो।
यीशु जुलूम दुखाऱ्या माणहाह हुदारने
(मत्ती 8:14-17; लुका 4:38-41)
29 यीशु एने तान चेला यहुदिन बोक्ती केरन्या गेरा माय रेन निकेल गीया, एने याकुब एने योहान हिऱ्यो शमोन एने अन्द्रियास ने गेर आवो। 30 शमोनान हाहवोक हेरी माय दुखारी खाटला पोर लोट रियेल एती, जेवी यीशु ता पुचनो, तीन बाराम ताह केया। 31 तेवी यीशु जाईन तीन आथ दिऱ्यो, एने तुलेचबूखे तीन हेरी उतेर गीयो, एने ती उठीन यीशु एने तान चेलान सेवा चाकरी केरने बाज गियी।
32 हांजीन टेम माय दिह बुड़ गीयो, तेवी माणहे आखा दुखाऱ्याह एने जा माय बुतड़ा एता ताह यीशु फाय लावा। 33 एने आखा गावान माणहे गेरान ओंगाण टोलवाय गीया। 34 एने यीशु जुलूम जाणे जा बात बातीन दुखा माय एता ताह हुदाऱ्यो। एने जुलूम बुतड़ाह काड्यो एने ताह कायच बोलने नाह दिनो, काहाकाय बुतड़ा यीशुह ओलेखताला।
उजाड़ी माय यीशुन विन्ता
(लुका 4:42-44)
35 उठ्यान विगोस दिह उगणेन पेल यीशु उठीन गेरा माय रेन निकलीन एक उजाड़ जागे गीयो, एने ता विन्ता केरने बाज गीयो। 36 पुण शमोन एने तान हाती यीशुह होदणे गीया। 37 जेवी यीशु ताह सापड़ी गीयो, तेवी ता यीशुह केया, “आखा माणहे तुवाह होदतेह।”
38 यीशु ताह जापाप आप्यो, “चाला आपु आस पास ने गावा माय जाता। माहु ता बी पारचार केरनु हे, काहाकाय मी ज्यान केरताच आयेल हे।”
39 ✡ 1:39 मत्ती 4:23; 9:35तानकेरता ता गेलील माय गीया, एने यीशु यहुदिन बोक्ती केरन्या गेरा माय जाईन पारचार किऱ्यो एने बुतड़ाह बाहेर काड़ते रिनो।
यीशु कोढी माणहाह हुदारने
(मत्ती 8:1-4; लुका 5:12-16)
40 एक कोढी यीशु फाय आवीन तान पाया पोड़ीन विन्ता केरीन केयो, “केदी तारी मोरजी एय, ते तु माहु हुदार सिकेह।”‡ 1:40 माहु चोखो किर, ज्यी बेमारी माणहा देरमान नेम प्रती खाराब किरेह।
41 § 1:41 गीण, थोड़ाक लेख माय राग लिखेल हेयीशु ता पोर गीण केरीन आथ ओंगाण केरीन ताह सापलीन केयो, “मारी मोरजी हे काय तु हुदेर जाय!” 42 एने तुलेचबूखे कोढ ने बेमारी ताह एदम्याह सोड़ देनी, एने तो हुदरी गीयो। 43 तेवी यीशु ताह सोमजाड़ीन चालोच मुकेल दिनो। 44 एने ताह केयो, “होमेल, कुणीह मा किहे। पुण जाईन चाकऱ्याह देखाड़जे एने ताह तार पारेख केरने दे, एने आपणे हुदेर जाणेन बाराम जो मुसो नेम ठेरायेल हे, ताह बेट चेड़ावजे काय ता पोर पुरावो एय।”
45 पुण तो बाहेर जाईन ज्यी वातीन जुलूम पारचार केरने बाज गीयो, एने जुलूम पोसराव दिनो काय यीशु उदाह हेयरा माय नाह जाय सीकनो। पुण बाहेर उजाड़ी माय रिनो, एने आखी जागे रेन माणहे यीशु फाय आवती रेना।
*1:1 1:1 थोड़ाक लेख माय बोगवानान बिटोख नाह लिखेल हे।
†1:4 1:4 थोड़ाक लेख माय बपतीस्मा केरनार योहान पारचार किरतेन जेंगला माय देखाय दिनो।
✡1:11 1:11 मत्ती 3:17; 12:18; मरकुस 9:7; लुका 3:22
✡1:15 1:15 मत्ती 3:2
✡1:22 1:22 मत्ती 7:28,29
✡1:39 1:39 मत्ती 4:23; 9:35
‡1:40 1:40 माहु चोखो किर, ज्यी बेमारी माणहा देरमान नेम प्रती खाराब किरेह।
§1:41 1:41 गीण, थोड़ाक लेख माय राग लिखेल हे