27
पिलातुस ने सामने यीशु
(मरकुस 15:1; लुका 23:1-2; योहान 18:28-32)
1 जेवी उजालो एनो ते आखा मुखी चाकऱ्या एने डायडाया यीशुह मार देणेन होमच्यो केऱ्या। 2 एने ता यीशुह बांदिन ली गीया एने पिलातुस ने आथाम होप देना।
यहुदान मोत
(प्रेरितान काम 1:18-19)
3 ✡ 27:3 प्रेरितान काम 1:18,19जेवी यीशुह देरावणार यहुदा दिख्यो काय यीशु दोसी ठेराय जायेल हे, ते यहुदा पासतानो एने ता तीस चांदीन सिक्का मुखी चाकऱ्या एने डायडाया फाय पुशो आपणे गीयो। 4 एने केयो, “मी निर्दोसाह मारावणेन केरता देरावीन पाप किरेल हे।” ता केया, “आमुह काय? तुवाह मालुम।”
5 तेवी तो ता पोयशाह मोंदिरा माय टाकीन जात रिनो, एने जाईन जीवेच फासी खाय लिदो।
6 मुखी चाकऱ्या ता पोयशा विसीन केया, “न्याह पेटी माय मेलनेन हाजो नाह सोतो, काहाकाय ज्यी लुयीन किमोत हे।” 7 तेवी ता तान तान होमच्यो केरीन ता पोयशान पाराया देसावाला माणहाह बुजणेन केरता कुमारान खेत वेचातो लेय लेदा। 8 ज्यानकेरता तो खेत आज वोर लुयान खेत केवाथे।
9 तेवी जो वचन यिर्मया जाणकारान द्वारे केवाय जायेल एतो, तो पुरो एय गीयो; मुखी चाकऱ्या ता तीस सिक्का मतलब ता ठेरायेल किमोताह जाह इस्राएलान सोरा माय रेन मोकतास सहमती माय ठेरायेल एता लेय लेदा। 10 एने जीहे मालीक माहु उकुम आपेल एतो, तिहेस ताह कुमारान खेताह किमोत माय आप देना।
पिलातुस ने सावाल
(मरकुस 15:2-5; लुका 23:3-5; योहान 18:33-38)
11 जेवी यीशु आदिकारीन ओंगाण उबरियेल ईतो, ते आदिकारी यीशुह फुशो, “काय तु यहुदिन राजा हे?” यीशु ताह केयो, “तु सोताच केणे बाजरिनोह।” 12 जेवी मुखी चाकऱ्या एने डायला ता पोर गुनो लागाड़ने बाजरियेल एता, तो काईच जापाप नाह आप्यो।
13 केरीन पिलातुस यीशुह केयो, “काय तु नाह होमलेत ज्या तार विरोद माय कोलोक पुरावो देणे बाजरेनाह?”
14 पुण यीशु ताह एक वातीन बी जापाप नाह आप्यो, केरीन काय आदिकारीह जुदोच लागो।
यीशुह सोड़नेन पिलातुस पास नाह ईनो
(मरकुस 15:6-15; लुका 23:13-25; योहान 18:39–19:16)
15 एने देर वोरीह फसह ने तिवारान टेमा माय यहुदि माणहे एक काल्ला बी आरापीह सोड़नेन मांग केरताला, ताह पिलातुस सोड़ देतालो। 16 ती टेम माय ता फाय यीशु बरअब्बा नावान एक नाव लायेल केयदी ईतो। 17 जेवी ता एकठा एना, ते पिलातुस ताह केयो, “तुमू कुणाह सोड़ेवण्या काय मी तुमरी केरता सोड़ देव? बरअब्बाह काय यीशुह, जो मसी केवाथे?” 18 काहाकाय पिलातुस जाणतालो काय ता यीशुह कुयराये देरायेल हेते।
19 जेवी तो नियावान गादि पोर बोह रियेल ईतो ते तान बायकु ताह केय मोकल्यी, “तु ता देरमीन बाराम आथ मा टाकहे, काहाकाय मी आज होपना माय तानकेरता जुलूम दुख विठेल हे।”
20 मुखी चाकऱ्या एने डायला माणहाह बोड़काया काय ता बरअब्बाह मांग लिवो, एने यीशुह खेतेम केराव देय। 21 आदिकारी ताह फुशो, “न्या दुय जाणा माय रेन कुण जुवेह काय मी तुमरी केरता सोड़ देव?” ता केया, “बरअब्बाह।”
22 पिलातुस ताह फुशो, “पुण यीशुह जो मसी केवाथे ताह काय केरू?” सोब ताह केया, “ताह खुरूसखाम पोर चेड़ाव दिवो।”
23 पुण पिलातुस केयो, “काहा, ज्यो काय गुनो किरेल हे?” पुण उंजु ता आयड़ी आयड़ीन केणे बाज गीया, “ताह खुरूसखाम पोर चेड़ाव दिवो।”
24 जेवी पिलातुस दिख्यो काय काईच बोणताली नाह हासवाताली, पुण गाड गाडीह कापाली वोदते जाथे, ते तो पाणी लेन गेरदीन ओंगाण जिवास ने आथ दुयो एने केयो, “मी ज्या देरमीन लुयीह रेन निर्दोस हे तुमूच जाणो।”
25 आखा माणहे जापाप आप्या, “ज्यान लुय आमु पोर एने आमरा सोरा पोर रेय।”
26 तेवी पिलातुस ज्य होमलीन बरअब्बाह ता माणहान केरता सोड़ दिनो, एने यीशुह चापका देवाड़ीन सिपायाह होप दिनो काय खुरूसखाम पोर चेड़ाव देय।
सिपायड़ा यीशुन अपमान केऱ्या
(मरकुस 15:16-20; योहान 19:2-3)
27 तेवी पिलातुस ने सिपायड़ा यीशुह किल्ला माय ली जाईन आखा तान चार चोमखीर एकठा एना। 28 एने यीशुन फाड़का काड़ीन ताह जामण्या रेंगान फाड़का पेराया, 29 एने काटान मुकूट गुथीन तान मुंडी पोर पेराया, एने तान जेवड्या आथा माय डिंगो देराया, एने तान ओंगाण पाया पोड़ी तान ईजुत उड़ाया, एने केया, “एय यहुदियान राजा, नमस्कार,” 30 एने ता पोर थुप्या, एने ताच डेंगा केरीन तान मुंडा माय देणे बाज गीया। 31 जेवी ता यीशुन ईजुत उड़ाव लेदा, तेवी तान सेरीर माय रेन जामण्या फाड़का काड़ीन, एने उंजु ताच ने फाड़का ताह पेराया, एने खुरूसखाम पोर चेड़ावणेन केरता ली गीया।
यीशुह खुरूसखाम पोर चेड़ावणु
(मरकुस 15:21-32; लुका 23:26-43; योहान 19:17-27)
32 बाहेर जाणे बुखेत ताह शिमोन नावान एक कुरेनी माणुह मिलानो, ता ताह उदडुस देऱ्या काय यीशुन खुरूसखाम उखलीन चाले। 33 ता जागा पोर जो गुलगुता, मतलब खोपड़ीन जागु केवाणे ता पोचना। 34 ता पित्त बिसकेल अंगुरान रूह यीशुह पिणेन आप्या, पुण ताह साकीन पिणे नाह हुद्यो।
35 तेवी ता यीशुह खुरूसखाम पोर चेड़ाया, एने चिट्ठी टाकीन यीशुन फाड़का वाट लेदा, 36 एने ता बोहीन यीशुन राखवाली केरने बाज गीया। 37 एने तान गुनान चिट्ठी लेखीन तान मुंडीन उपेर लागाड्या, “ज्यो यहुदियान राजा यीशु हे।” 38 तेवी यीशु हेऱ्या दुय बांड एता, एक जीवड़े उगे एने एक डाखरे उगे खुरूसखाम पोर चेड़ायेल एता।
39 एने जाणारे आवणारे मुंड आलवी आलवीन तान चिहटा केरताला, 40 ✡ 27:40 मत्ती 26:61; योहान 2:19एने इही केताला, “एय मोंदिराह ओदारनार, एने तीन दिह्या माय बाणावणार, सोताह ते वोचाड़; तु बोगवानान बिटोख हे, ते खुरूसखाम पोर रेन उतेर आव।”
41 इहीचकेरीन मुखी चाकऱ्या बी देरेमगुरू एने डायडाया हेऱ्या एकठा केर केरीन केताला, 42 “ज्यो दिहराह वोचाड़ेल, एने सोताह नाह वोचाड़ सिकेत, ज्यो ते इस्राएलान राजा हे, एवीच खुरूसखाम पोर रेन उतेर आवी ते आमु तार पोर बुरहो केरहु।”
43 ज्यो बोगवाना पोर बुरहो किरेल हे, केदी तो ज्याह पसंद किरेह, ते एवी ज्याह सोड़वी लेय, काहाकाय ज्यो कियेल ईतो, “मी बोगवानान बिटोख हे।”
44 तिहेस केरीन बांड बी जा ता हेऱ्या खुरूसखाम पोर चेड़ायेल एता, तान ईजुत उड़ावताला।
यीशुन जीव निकेलने
(मरकुस 15:33-41; लुका 23:44-46; योहान 19:28-30)
45 जेवी दिह्यान बारा वाज गीया, ते आखा देसा माय आदारो सावाय गीयो, एने तीन वाजता वोर आदारोच रेनो। 46 दिह्यान तीन वाजता यीशु मोठेच आयड़ीन केयो, “एली, एली, लमा शबक्तनी?” मतलब “एय मारा बोगवान, हे मारा बोगवान, तु माहु काहा सोड़ दिनो?”
47 जा आहने उबरियेल एता, ता माय रेन थोड़ाक जाणे ज्य होमलीन केया, “ज्यो ते एलियाह आयड़ेह।” 48 ता माय रेन एक चालोच दोवड़नो एने एक स्पंजाह टोकरा माय लेन अंगुरान कोड़वा रूहा माय बुड़ायो, एने सेंडा पोर मेलीन ताह चुहाड्यो।
49 दिहरा केया, “थोब जावो, देखता एलिया ज्याह वोचाड़ने आवीह काय नाह।”
50 तेवी यीशु पुशो जोरेह आयड़ीन जीव सोड़ दिनो।
51 तेवी मोंदिरान पुड़दो उपेर रेन बुंदे वोर फाटीन दुय टुकड़ा एय गीया, एने देरती आल गियी एने सापोर फुट गीया। 52 एने माहणे उगड़ी गीया, एने हुवताला चोखाला माणहान मोकतास देड़े जीव उठना। 53 एने यीशुह जीव उठणेन पासाण ता माहणा माय रेन निकलीन चोखाला हेयराम गीया एने मोकतास जाणाह देखाना।
54 तेवी सुबेदार एने जा ता हेऱ्या यीशुन राखवाली केरताला, बुकम्प एनो, जो काय ईयेल एतो तो देखीन जुलूम बिय गीया, एने केया, “खेरीच ज्यो बोगवानान बिटोख ईतो।”
55 ✡ 27:55 लुका 8:2,3ताहरी मोकत्युस बायकु ज्यु गेलील माय रेन यीशुन सेवा किरतेन ता हेऱ्यु आयेल एत्यु, सेट्युस रेन देखताल्यु। 56 त्युम रेन मरीयम मगदलीनी, एने याकुब एने योसेसान आहख मरीयम, एने जब्दीन बेटाख ने आहख एत्यु।
यीशुह बुजणो
(मरकुस 15:42-47; लुका 23:50-56; योहान 19:38-42)
57 जेवी हांज एनी ते युसूफ नावान अरीमतीयान एक मालदार माणुह, जो सोताह यीशुन चिलो केतालो, तो आवो। 58 एने तो पिलातुस फाय जाईन, यीशुन देड़ मांग्यो, तेवी पिलातुस आप देणेन उकुम आप्यो। 59 युसूफ देड़ाह उताऱ्यो, एने ताह दोवल्यी डाठी माय गुंडाल्यो, 60 एने तान नोवाला माहणा माय मिल्यो, जाह तो सापराट्या माय खोदीन बाणायेल ईतो, एने माहणान बायणा पोर मुठोस दिगोड़ टेकाड़ीन जात रिनो। 61 मरीयम मगदलीनी एने दिहरी मरीयम ताहरी माहणान सोमोर बोह रियेल एत्यु।
यीशुन माहणान राखवाली
62 दिहरे दिह जो तियारीन दिह्यान पासाणल्यो दिह ईतो, मुखी चाकऱ्या एने फरिसी पिलातुस फाय एकठा एयीन केया, 63 ✡ 27:63 मत्ती 16:21; 17:23; 20:19; मरकुस 8:31; 9:31; 10:33,34; लुका 9:22; 18:31-33“एय मालीक, आमुह एर हे काय तो बोटकावणार जीवतालो ईतो, तेवी कियेल, ‘मी तीन दिह्यान पुशो जीव उठुह।’ 64 उकुम आप काय तिसरे दिह वोर माहणान राखवाली केरती, ओहलो नाय एय काय तान चेला आवीन ताह चोरीन लेन जात रेती एने माणहाह केणे बाज जाती, तो मुरेल माय रेन जीव उठेल हे, तेवी पासाणल्यो दुको पेल्लाह रेन खाराब रेय।”
65 पिलातुस ताह केयो, “तुमू फाय राखवाल्या ते हेते ने, जावो तुमूह सोमजी तिहे होमालो।”
66 तेवी ता राखवाल्याह आरही लेन गीया, एने देगड़ा पोर साप लागाड़ीन माहणान राखवाली केऱ्या।