1  * 4:1 चाकर्‍यो; थोड़ाक लेख माय मुखी चाकर्‍यो लिखेल हे।जेवी पतरस एने योहान माणहाह इहकेरीन केताला, तेवी चाकऱ्या एने मोंदिर ने सिपायान आदिकारी, एने सदुकी ता पोर खीजवाय गीया। 2 ता ज्यानकेरता खीजवाय रियेल एता, काहाकाय पतरस एने योहान यीशुन मुरेलान जीव उठणेन पारचार केरताला, एने माणहाह हिकाड़ताला। 3 ता पतरस एने योहानाह दिहरे दिह वोर चोवकी माय मेल्या, काहाकाय हांज एय जायेल एती। 4 पुण वचन होमेलनाराम रेन जुलूम होवटा बुरहो केऱ्या, एने ओहला एदम्यान गेणती पाच एजार कोम से कोम एय गियी।

5 दिहरे दिह यहुदिन राजा, डायला एने देरेमगुरू यरूशलेम माय टोलवाना। 6 एने मुखी चाकर्‍यो हन्ना एने केफा एने योहान एने आलेकजांडर एने जोला मुखी चाकर्‍यान गेराणान एता, आखा यरूशलेम हेयरा माय टोलवाना। 7 ता पतरस एने योहानाह विची माय उबराखीन फुसणे बाज गीया, “तुमू ज्यो काम काल्ली ताकेत केरीन एने काल्ला नावा केरीन किरेल हेते?”

8 तेवी पतरस चोखाला जीवा माय बोरायीन ताह केयो, एय माणहान आदिकारी एने डायडाया: 9 ज्या लेंगड़ा माणहा हेऱ्यो जो बोलो ईयेल हे, केदी आज आमु फाय रेन तान बाराम चोकसी केराय जाथे काय तो किहीक हाजो ईनो, 10 ते तुमू आखा एने आखा इस्राएली माणहाह, ज्यो मालुम पोड़ी काय जा मसी यीशुह तुमू खुरूसखाम पोर खीला ठोकीन मारील, जाह बोगवान मुरेल माय रेन जीवाड्यो, ता यीशु नासरीन नावा माय ज्यी ताकेत हे, ता नावा माय ज्यो माणुह हुदरीन तुमरी ओंगाण उबरियेल हे। 11 पुस्तेक माय लिखेल हे,

13 जेवी ता पतरस एने योहानान बुरहो देख्या, एने ज्यो जाण्या काय ज्या अनपोड़ एने सादा माणहे हेते, ते बोंगलाय गीया। ओवता ताह ओलख्या काय ज्या यीशु हेऱ्या रियेल हेते। 14 ता माणहाह जो ठिख ईयेल ईतो, पतरस एने योहाना हिऱ्यो उबरियेल देखीन तान विरोद माय कायच नाह केय सेक्‍या। 15 पुण ताह पोंचान बाहेर जाणेन उकुम आपीन ता आपसाम विचार केरने बाज गीया, 16 “ज्या माणहा हेऱ्या आपु काय किरज्‍यो? काहाकाय ता फाय रेन खेरीच नाव गाज्यो चोमेत्कार ईयेल हे, ज्यो आखा यरूशलेम वालाह मालुम पोड़ जायेल हे, तेवी तो आपुह नाकारता आवीत नाह। 17 पुण ज्यानकेरता काय ज्यी वात माणहा माय उंजु पोसेरने नाय जुवे, केरीन आपु ताह दोपकावता काय यीशुन नावा केरीन उंजु काल्ला माणहा हेऱ्या वातु नाय केरी।”

18 तेवी ता पतरस एने योहानाह हाद्या, एने उकुम आपीन ज्यो केया, “यीशुन नावा माय काय बी मा बुलहो एने मा हिकाड़हो।” 19 पुण पतरस एने योहान ताह जापाप आप्या, “तुमूच नियाव किरो; ज्यो बोगवानान नेजरी माय हाजो हे काय आमु बोगवानान वातीह रेन वोदार तुमरी वातु माने। 20 काहाकाय ज्यो ते आमुह एय नाह सिकेत काय जो आमु देख्या एने होमलेल हेते, तो नाय किज्यो।” 21 तेवी ता ताह उंजु दोपकावीन सोड़ देना, काहाकाय ताह किहीक डेंड आपी सोमजातालो नाह, ज्यानकेरता काय जी गेटना ईयेल एती तान वोजेसे आखा माणहे बोगवानान बोड़ाय केरताला। 22 हुदेरनेन जो चोमेत्कार जा लेंगड़ा माणहा पोर ईयेल एतो, तो माणुह चालीह वोरह्या रेन वोदार वोयान ईतो।

23 पतरस एने योहान सुटीन तान हाती फाय आवा, एने जो काय मुखी चाकऱ्या एने डायडाया ताह कियेल एता, ताह होमलाव देना। 24 ज्यो होमलीन विश्वासी एक मोन एन मोठेस आयड़ीन बोगवानाह केया, “एय मालीक, तु तोच हे जो हेरोग एने देरती एने देरीयो एने जो काय ता माय हे बाणायो।” 25 तु चोखाला जीवा माय तारो पावोर आमरो डायलो दाऊदान मुया केरीन केयो,

27  ✡ 4:27 लुका 23:7-11; मत्ती 27:1,2; मरकुस 15:1; लुका 23:1; योहान 18:28,29काहाकाय खेरीच तार चोखालो पावोर यीशुन विरोद माय जान तु निवाड़ किऱ्यो, हेरोदेस एने पुन्तियुस पिलातुस बी बिगेर यहुदि एने इस्राएली हेऱ्या ज्या गावा माय एकठा एना। 28 ता एकठा एना काहाकाय तारी ताकेत एने मोरजीन गेत जो काय पेलुच रेन ठेरायेल एतो, तो पुरो एय। 29 एवी एय मालीक, तान दोमक्‍युह देख; एने तारा पावराह ज्यी पारवांगी आप काय तारो वचन मोजबुत ईमोत माय होमलावे। 30 हुदारनेन केरता तु तारो आथ ओंगाण केर काय चोमेत्कार एने निसाणी तारो चोखालो पावोर यीशु मसीन नावाम केराय जाय।

31 जेवी ता विन्ता केर लेदा, ते तो जागो जाहरी ता एकठा एता आल गीयो, एने ता आखा चोखाला जीवाम बोराय गीया, एने बोगवानान वचन ईमोत केरीन होमलावते रेना।

32  ✡ 4:32 प्रेरितान काम 2:44,45बुरहो केरनारान मोंडेली एक मोन एने एक जीव ईतो। ता माय रेन कुण बी तान मालदेनाह मारो नाह केताला, पुण तान आखो काय गोवांद्यो एतो। 33 एने प्रेरित मोटली ताकेत माय मालीक यीशुन जीव उठणेन गोवाय देताला, एने ता आखा पोर मोटली गीण एती। 34 ता माय रेन कुण बी गेरीब नाह एतो; काहाकाय जा फाय जागो नाहते गेरे एता, ता ताह वेच देताला। 35 एने वेचायेल चिजीन किमोत लावीन प्रेरितान पायान थुड़ाम मेल देताला; जिहकेरीन जान गिरेज रेताली, तान पारमाणे आखाह वाट देया केरताला।

36 युसूफ नावान साइप्रसान एक लेवी ईतो जान नाव प्रेरित न्या बरनबास मतलब उत्साह आपणार मीलेल एता। 37 ता फाय तान थोड़ोक जागो ईतो, ताह तो वेचो एने तान पोयशा लावीन प्रेरितान पायान थुड़ाम मेल दिनो।