1 काल्ला बी डावाला माणहाह दोपकावीन मा बुलहो, पुण ताह आबोख जाणीन सोमजाड़ दे, एने जुवान्याह बाहख सोमजीन ता हिऱ्यो वेवार केर। 2 डावाली बायकुह आहख जाणीन; एने जुवान बायकुह पुरो चोखो मोन केरीन बोणीख जाणीन सोमजाड़ दे।

3 त्यु रांडायेल बायकुन मान मेल, ज्‍यु खेरीच रांडायेल हेत्यु। 4 केदी एगदी रांडायेल बायकुन सोरा निहते नाते पोणत्या एती, ते आखान पेल ता तान गेराणा हेऱ्या बोक्‍तीन वेवारो केरती, एने तान आईख आबाख हुक आपणेन हिके, काहाकाय ज्यो बोगवानाह पुटीह। 5 ज्यी खेरीच रांडायेल हे एने तीन कुणूस नाह सोतो, ती आपणी आसा बोगवाना पोर मेल मिलेह, एने ती रात ने दिह विन्ता एने विन्ता किरते रीथे। 6 पुण ज्यी सेरीरान मोरजी पुरी केरने माय पोड़ गियीह, ती जीवताली ते हे पुण मुरेल बाराबोर हे। 7 ज्यी वातुन बी उकुम आप काहाकाय ती निर्दोस रेय। 8 एने खास केरीन तान गेराणान माणहान कालजी नाह किरेत, ताहार तो बोरहाम रेन बोटकी जायेल हे, एने अविश्वासी माणहाह रेन बी होवटोह खाराब बोण जायेल हे।

9 तीस रांडायेल बायकुन नाव लिखजे जी साठ वोरह्याह रेन कोम निहे एय, एने एकुच एदम्यान लाडी रेनी एय।* 5:9 एक वारीन वाराड़ किरेल; नाहते तीन एदम्या हेऱ्यी ईमानदार। 10 एने हाजाला कामान केरता नाव गाजेल एय, एने जी सोरान पोहणो केरेय; पावणाय केरेय, चोखाला माणहान पाय दुयेल एय, एने दुखाऱ्या माणहान सेवा चाकरी किरेल एय, एने आखा हाजा कामा माय मोन लागाड़ेल एय। 11 पुण जुवान रांडायेल बायकुन नाव मा लिखहे, काहाकाय ती पोशी वाराड़ केरने हुदेह एने सेरीरान मोरजी पुरी केरनेन केरता मसी रेन सेटी एय जाथे। 12 एने गुनेगार ठेराथी, काहाकाय त्यु वायदो तोड़ देन्युह। 13 ओवती ती गेर गेर फिरीन आलही एणेन हिकेह, एने आलही एणेन ओलीस नाह पुण बकबक केरती रीथे, एने दिहरान कामाम आथ टाकेह एने होबाय नाय ओहल्यु वातु किरेह। 14 तान केरता मी ज्यो होद्थु काय जुवान रांडायेल बायकु वाराड़ केरी, एने गेरबार होमाली एने सोराह पायदा केरी, एने विरोद केरनाराह बदनाम केरने टेम नाय आपी। 15 काहाकाय मोकत्युस बोटकीन सैतानान पासाण चाल दियेल हेत्यु। 16 केदी बुरहो केरनार्‍यु बायकुन गेर रांडायेल बायकु एय ताहार, तीन मोदेक तीच केरी एने मोंडली पोर वोजो नाय बोणी, काहाकाय जी खेरीच रांडायेल हे तीन मोदेक मोंडली केर सेकी।

17 जा डायडाया तान आदिकार हास केरीन चालाड़तेह, ताह दुय गुणा मोंजरी जुड़ने जुवे, एने खास केरीन ता जा वचन होमलाड़ ने एने हिकाड़नेन मेहनेत केरतेह। 18  ✡ 5:18 मत्ती 10:10; लुका 10:7काहाकाय चोखाली पुस्तेक किथे, “वेगेलताला बोयलान मुयाह मोहको मा बांदही,” काहाकाय “मोंजऱ्यो तान मोंजरीन हकदार हे।” 19 दुय नाहते तीन गोवा रेती, तेवीच काल्ला बी डायडाया पोर गुनो लागाड़जे। 20 एने पाप केरनाराह आखा माणहान ओंगाण सोमजाड़ दे, काहाकाय दिहरा माणहे बिते एने पाप नाय केरती। 21 बोगवान, मसी यीशु एने निवाड़ेल हेरोगदुताह आहने जाणीन मी तुवाह चेतावणी आपीन केथु काय तु मोन खोलीन ज्यी वातुह मान्या केर, एने बेदबाव माय काल्लो बी काम मा किरहे। 22 उतवाल्यो एन कुणी पोर बी आथ मा मिलहे, एने दिहरान पापाम बागी मा इही; आपणे आपाह चोखो बोणावीन मेल।

23 एवी रेन ओंगाण पाणी ओलोस पिय मा, पुण पेटान केरता एने जाहार ताहार एण्या दुखान केरता थोड़ोक अंगुरान रूह बी पिया केर।

24 थोड़ाक माणहान पापे ते उगड़ीन नियाव ने केरता पेलुच पोच जातेह, पुण थोड़ाक पासाण रेन जातेह। 25 तिहेस केरीन थोड़ाक हाजाला कामे उगाड़ला हेते, एने जा ओहला ना सोता, ता बी लीकाय नाह सेकते।