39
1 Amih long tah hlamat lamkha cueihnah a tlap, tonghma olthui te khaw a paelki.
2 Mingthang kah olthui khaw a khoem tih, thuidoeknah olkhoelh nen khaw phaep uh.
3 Olcueih kah thuingainah olhuep a tlap tih, im ah khaw thuidoeknah olkael neh om.
4 Anih tah hlanglen taengah khaw olpai thai tih ukkung rhoek hmaiah khaw pumphoe thai. Kholong kho la yiin tih, hlanghing kah hmulung a thae then khaw a ming.
5 Anih tah yueya thoh hamla thinko a khueh tih, Amah aka suenkung Boeipa tlap ham neh, Khohni taengah huithuinah khuen hamla. Thangthuinah ne a ka te a ang tih, a tholhnah dongah tholhhlahnah a bih.
6 Boeilen Boeipa loh a ngaih pa atah anih te yakmingnah mueihla a baetawt vetih, amah kah cueihnah loh te a thaa ni, thangthuinah neh Boeipa te a uem.
7 Boeipa loh a cilsuep neh mingnah a thuinuet vetih Boeipa kah olhuep aka thuep la om ni.
8 Anih te a cangnah soah cueihnah a tueng vetih, Boeipa paipi kah olkhueng dongah a thangpom ni.
9 A yakmingnah te muep a uem uh vetih, anih te hnawt uh tlaih voel mahpawh. Anih poekkoepnah te paa tlaih pawt vetih, a ming khaw cadilcahma boeih taengah hing ni.
10 A cueihnah te hamtom loh a thui vetih, anih koehnah te paeng loh a doek ni.
11 A hing khuiah khaw thawngkhat lakah ming tanglue a khueh ni, duemnah te paan cakhaw anih ham ta rhoeh coeng.
Pathen Koehnah Laa
12 Ka lungbuei loh phoe a ngaih muep om, Hla lum bangla ka lumkil coeng.
13 Ka ca uepom neh pailum aw, hnatun lah, soca tuikaeng kah a poe rhaipai kung bangla.
14 Hmueihtui bangla botui hlah laeh, Tuilipai bangla na pailum laeh.
15 A ming te tanglue la khueh lamtah amah koehnah neh a taengah uemnah khueh laeh.
16 Boeipa kah bibi tah boeih then tangkik, A thui boeih te a tue a pha caengah thoeng yoeyah.
17 “He tah balae”, “Ke tah balae,” a ti thai moenih, a tue a pha vaengah te oldawtnah khaw boeih a hlat. A ol loh tui khaw puluk la a pai sak, a ol a ka dongah tuitungim kah tui khaw om.
18 Ol a paek vaengah a mangtaengnah boeih soep, khangnah thadueng khaw u loh a khaih thai moenih.
19 Bibi boeih he amah mikhmuh ah tueng, A mik aka buep pah thai he a om moenih.
20 A tong lamloh a tue a bawt hil a cungkuem a hmuh thai, A nih hamla khobae rhambae ti a om moenih.
21 “He tah balae”, “Ke tah balae,” n'ti thai moenih, a cungkuem he a mangtaengnah bangla a suen coeng.
22 A yoethennah loh khohmuen rhamrhae te tuiva bangla a khuk, Te vaengah tuili bangla boeih a et.
23 Tedae a kosi loh namtom rhoek te a haek, khohmuen tuiphuet khaw lungkaeh la a poeh sak.
24 Uepom hamtah longpuei he dueng Tedae halang hamlat tangrhom hoeng la om.
25 A tong lamtah a then hamla hno then a suen, tedae hlangtholh ham tah hno then khaw a thae pah.
26 Hlang khosaknah nong a kungpuei la a kuek tah tui neh, hmai neh, thi neh, lungkaeh he Vaidam, suktui neh khoitui, Misur thii, situi neh hnicu he ni.
27 He boeih he hlangcim ham tah a then pah, Hlang tholh ham la a thae la vik a poeh pah.
28 Tawnlohnah hamla khohli khaw a saii, Te dongah a thintoek loh tlang khaw a moelh sak. A poeknah hnin ah tah a thaa a huel uh vetih A saikung kah thintoek te paa bitni.
29 Hmai neh, rhael neh, khokha neh, lucik khaw he boeih he tawnlohnah ham ni a phueng.
30 Khohong rhamsa kah pumcu neh, saelkhui ta-ai rhulthae neh cunghang loh hlang tholh poci ham dan a tat.
31 Te long te Boeipa kah pinnah dongah bisai ham a ngaih sak, Diklai dongah a bibi hamla a sikim sak, Te dongah amah tuetang a pha vaengah tah A olpaek te aal uh tlaih voel mahpawh.
32 Te dongah a moecuek lamloh he boeih ka yakming coeng, te ka poek het coeng tih ca dongah ka khueh.
33 Boeipa kah bibi tah boeih then, A cungkuem a ngoe tue van vaengah boeih a paek.
34 U long khaw, “He tah ke lakah then,” ti thai pawh, Hno then amah tuetang vaengah a khueh coeng.
35 Te dongah na thinko boeih neh, ol neh Koehnah te saa lamtah Boeipa ming te uem laeh.