10
1 Aka cueih laitloekkung loh pilnam a cueih sak tih, lungming hlang kah uknah long tah a then buelh a om sak.
2 Pilnam laitloekung kah a om bangla a bibikung rhoek khaw om uh van. Khopuei ukung kah a om bangla vangca rhoek khaw om uh van.
3 Manghai kah a pam loh a pilnam a po sak tih, Ukkung rhoek kah yakmingnah long ni khopuei khaw tluep a naep sak.
4 Diklai kah uknah he khaw Boeipa kut ah om tih, a tuetang ah mawtkung then a khueh.
5 Hlang a cungphoeknah khaw Boeipa kut ah om tih, Amah long ni olkhueng paekung khaw thangpomnah a paek.
Koevoei Tholh
6 N'thaenah takuem ah khaw na imbem teangah thintoek khueh boeh, mangkhak khoboe te khaw thungnah khueh boeh.
7 Thinlen he Boeipa ham khaw hlang ham khaw thinnah la om tih, Khoboe paihaehnah khaw long khaw bok a toeh.
8 A sangnah khaw namtom lamloh namtom taengah a pak te paihaehnah, thinthahnah, dongkah khuehtawn dongah ni.
9 Metlae laipi neh hmaiphu khaw a koevoei thai, Hlang hing pum he a hing li vaengah mah hmawn coeng ta.
10 Aka tlo khing te siboei loh a yuh yam, tihin kah manghai khaw thangvuen ah duek hae ni.
11 Hlang he a duek phoeiah tah anih long te, aekrhit neh, sahik neh, phol ni a pang.
12 Hlang kah koevoeinah a tongnah he tah, Boeipa hnawtnah ham ni a om coeng. A thinko khaw anih aka saikung taeg lamloh nong coeng.
13 Koevoeinah a tongnah he tah tholhnah ni, Te dongah konawhnah a lun nah kungla cet. Boeipa loh amih te a yaak mueh citcai neh a hawk thil tih, a mih te boeih a thup.
14 Boeipa loh boei rhoek kah ngolkhoel khaw a palet tih, tlayae rhoek te amih ngolhmuen ah a ngol sak.
15 Boeipa loh namtom rhoek kah a yung khaw a phil tih, kodo rhoek te amih kah hmuen ah tloep a phung.
16 Boeipa loh namtom kah khohmuen te khopong la a khueh tih diklai khoengim duela a mih te a phae.
17 Amih te a khoe tih a mih a thup vaengah, amih poekkoepnah te diklai lamloh a phaeh.
18 Koevoeihnah he hlang hing hamla sai pawt tih, kosi hongnah khaw huta kah a cun rhoek ham bal moenih.
Thangpomnah Neh Aka Ting
19 U casak nim tah thangpomnah neh tiing pai, hlang casak rhoe pai ni te. U casak nim tah hinyahnah ham koih tloe pai, Amih tah Boeipa aka rhih rhoek pawn ni. U casak nim tah thangpomnah neh tiing pawh, Anih khaw hlang casak bal ni. U casak nim thangpomnah neh ting pai pawh, amih tah olpaek aka poe hlang rhoek pai ni.
20 Imkhui lung ah khaw mawtkung tah thangpom tueng, tedae Boeipa aka rhih tah a mikhmuh ah thangpom ham tueng.
22 Boei khaw, hlanglen khaw, khodaeng khaw, Boeipa rhihnah he ni amih kah thangpomnah la a om.
23 Khodaeng sitoe cakhaw lungcuei hlang tah hnaep ham moenih, tholh aka khueh hlang thangpom he khaw a rhoeprhui bal moenih.
24 Mangpa khaw, laitloekkung khaw, khoboei khaw hinyah ham tueng, Tedae amih te Boeipa aka rhih hlang lakah a len moenih.
25 Sayalh kah khosa long tah aka cueih tueihyoeih a bi vetih, lungming hlang te khaw kamkaih uh mahpawh.
Tlayaenah Kawng
26 Bi na saii vaengah na cueihnah tueng ham saii boeh, na ngoenah a om vaengah khaw hoem boeh.
27 Buh vawt neh aka hoem hlang lakah tah, a then aka yet bibi kung he then ngai.
28 Ka ca, namah te tlayaenah neh thangpom, namah a tingtawk la namah kueinah uh.
29 Amah aka boe coeng te tah u long a tang sak eh? Amah hliphen uh coeng atah u long anih a thangpom eh?
30 Khodoeng he a mingnah loh a thangpom tih, Boei khaw a khuehtawn long ni a thangpom mai.
31 Khodaengnah khuiah khaw a thangpom hlang tah bahoeng a khuehtawn ngai coeng tih, A boeinah khuiah mingthae aka phuei hlang tah, Bahoeng khodaeng tangkik coeng.