5
1 Khosoih rhoek he he ya uh lamtah
Israel imkhui loh hnatung uh.
Manghai imkhui long khaw hnakaeng laeh.
Mizpah ah pael la na om uh tih
Tabor ah lawk na phuel dongah
nangmih ham laitloeknah om.
2 Boekoek ngawnnah dongah muelh uh tih
te boeih te kai loh thuituennah ka khueh.
3 Ephraim khaw ka ming tih
Israel khaw kai lamloh a thuh thai moenih.
Ephraim loh na cukhalh neh Israel a poeih coeng.
4 A Pathen taengla mael ham khaw
a khoboe te a voeih uh moenih.
Pumyoihnah mueihla loh
amih kotak ah om tih BOEIPA te ming uh pawh.
5 A maelhmai ah Israel kah
hoemdamnah a doo dongah
Israel neh Ephraim khaw amamih kah
thaesainah dongah paloe uh.
Te vaengah amih taengkah Judah khaw paloe.
6 A boiva neh, a saelhung neh
BOEIPA tlap hamla cet uh dae
amih lamloh a khoe uh coeng dongah hmu uh mahpawh.
7 Halh ca a cun uh tih
BOEIPA taengah hnukpoh uh dongah
amih te hlasae neh a khoyo a yoop pah pawn ni.
8 Gibeah ah tuki neh Ramah ah olueng ueng uh.
Benjamin nang hnukah Bethaven yuhui saeh.
9 A cak la ka ming dongah
Israel koca taengkah toelthamnah hnin ah
Ephraim khaw imsuep la om ni.
10 Judah mangpa rhoek he
rhi rhawt la a om uh dongah
ka thinpom he tui bangla amih soah ka hawk ni.
11 Olrhi hnukah pongpa ham mulmet tih
laitloeknah aka phop Ephraim te a hnaemtaek coeng.
12 Te dongah kai he Ephraim taengah bungbo bangla,
Judah imkhui ham keet la ka tlung pah ni.
13 Ephraim loh amah kah tlohtat,
Judah loh amah kah a hma te a hmuh vaengah
Ephraim te Assyria la cet tih manghai Jareb te a tah.
Tedae anih loh nangmih te hoeih sak ham noeng pawt tih
nangmih kah a hma te a toi moenih.
14 Kai he Ephraim taengah sathuengca la,
Judah imkhui taengah sathueng la ka poeh pah.
Kai loh ka baeh vetih ka cet ni.
Ka khuen vaengah khaw huul uh mahpawh.
15 A boe nah rhi ah ni
kamah hmuen la ka cet vetih ka mael eh.
Amamih kah rhal khuiah ni
ka maelhmai a tlap uh vetih kai n'toem uh eh.