127
Di hagaamu tumaalia o Dimaadua * Taahili dela e daahili go digau ala e hula gi Jerusalem belee daumaha i golo. Di pisalem mai baahi o Solomon
1 Maa Dimaadua la hagalee hau di hale,
malaa, nia moomee o digau hau hale le e balumee hua.
Maa Dimaadua la hagalee abaaba di waahale,
malaa, nia gau hagaloohi o di waahale deelaa, le e hagaloohi hua balumee.
2 Ma e balumee ma ga ngalua damana
bolo e halahala au mee e hagahumalia do mouli,
e ala aga loo hagaluada ga kii loo boo.
Idimaa, Dimaadua le e wanga nia meegai
gi ana daangada ala e aloho ai i di madagoaa digaula e kii.
3 Nia dama la nia wanga dehuia mai baahi o Dimaadua,
di haga maluagina mai i baahi o Mee.
4 Nia dama daane o dahi daane i dono madagoaa nogo dama daane,
le e hai gadoo be nia amu maalei i lodo di lima o tangada dauwa.
5 E maluagina go tangada dela e logo ana amu maalei beenei!
Mee e deemee loo di bagege i di madagoaa a mee ma ga heetugi
gi ono hagadaumee i lodo di gowaa hai gabunga.
*^ Taahili dela e daahili go digau ala e hula gi Jerusalem belee daumaha i golo. Di pisalem mai baahi o Solomon