122
Di hagaamu o Jerusalem* Taahili dela e daahili go digau ala e hula gi Jerusalem belee daumaha i golo. Di pisalem mai baahi o David
1 Ogu lodo gu manawa lamalia i di madagoaa digaula ne hai mai gi di au boloo,
“Gidaadou gaa hula gi di Hale o Dimaadua!”
2 Malaa, dolomeenei gimaadou gu i ginei, e tuu i lodo nia bontai o Jerusalem!
3 Jerusalem la di waahale ne haga hoou,
di waahale madamada gei gu haga noho hagahumalia.
4 Deenei di gowaa e lloomoi ginai nia madawaawa, go nia madawaawa Israel,
e hai nadau danggee ang gi Dimaadua gii hai be nia haganoho a Maa.
5 Deenei di gowaa e hai ai nia gabunga,
nia king o Israel e gabunga nadau daangada.
6 Goodou dalodalo ina Jerusalem gii noho i di aumaalia, boloo:
“Digau ala e aloho i di goe la gii noho manawa lamalia.
7 Di noho i di aumaalia gii gila i lodo o abaaba
mo di noho humalia la gii gila i lodo oo hale aamua.”
8 Au e helekai gi Jerusalem, “Di noho i di aumaalia gii noho i doo baahi”,
idimaa go ogu duaahina mo ogu ihoo hagaaloho.
9 Au e dalodalo i ono haadanga lamalia,
idimaa dela go di gowaa e iai di hale o Dimaadua go tadau God.
*^ Taahili dela e daahili go digau ala e hula gi Jerusalem belee daumaha i golo. Di pisalem mai baahi o David