Abụ Ọma 12
Abụ Ọma nke dịrị onyeisi abụ. Nʼusoro Sheminit. Abụ Ọma nke Devid.
Ekpere maka enyemaka nʼoge ihe egwu
1 Onyenwe anyị, nyere anyị aka! Nʼihi na ndị ezi omume agwụla!
Ndị kwesiri ntụkwasị obi anọkwaghị nʼetiti ụmụ mmadụ.
2 O nwekwaghị onye eziokwu dị nʼọnụ ya nye onye agbataobi ya.
Egbugbere ọnụ onye ọbụla na-ekwukwa okwu ire ụtọ,
maọbụ aghụghọ dị nʼobi ha.
3 Ka Onyenwe anyị wezuga egbugbere ọnụ niile na-ekwu okwu ire ụtọ
na ire niile na-ekwu okwu ịnya isi.
4 Ndị na-asị,
“Ọ bụ site nʼire anyị ka anyị ga-enwe mmeri;
egbugbere ọnụ anyị ga-echebe anyị, ọ bụ onye na-achị anyị?”
5 “Nʼihi na a na-apụnara ndị ogbenye ihe nʼihi ndị nọ na mkpa na-asụ ude,
aga m ebili ugbu a, ka Onyenwe anyị kwuru.
Aga m zọpụta ha pụọ nʼaka ndị ahụ ji iwe ekwulu ha.”
6 Okwu ọnụ Onyenwe anyị niile zuruoke,
ha dịka ọlaọcha a nụchara nʼọkụ,
nke a nụchara ugboro asaa.
7 O Onyenwe anyị, i ga-edebe anyị nʼudo
ma sitekwa nʼaka ndị dị otu a chebe anyị ruo mgbe ebighị ebi.
8 Ndị ajọ omume na-ejegharị nʼebe niile
mgbe a na-eto ihe ọjọọ nʼetiti ụmụ mmadụ.