57
1 Gbɛ̃maaↄ lɛ́ midɛ,
mɛ́ a yã́ lɛ́ kã̀ada gbɛ̃elao.
Wà luayãmanaↄ sɛ̀lɛ lɛ́ táńnↄ,
mɛ́ gbɛ̃e làasoo i kawào.
Lua lɛ́ gbɛ̃́ maapiↄ si músi pↄ́ lɛ́ mↄ́wa.
2 Zɛmaasɛnapiↄ lɛ́ gↄ̃ ń aafiao,
aa kã́mabo ń wúlɛkĩiↄwa miau.
3 Ápiↄ sↄ̃, à mↄ la á màsokɛn nɛ́ↄ!
Gbãsĩde ń káaluao buiↄn á ũ!
4 Dé álɛ a láanikɛi?
Dé álɛ á lɛ́ yàasa ɛlɛwà
álɛ á lɛ́na bↄɛ̀i?
Á tàae nɛ́ↄ! Á bui mↄafilideↄ!
5 Á mɛ ì lua tã́ai lí gbɛ̃̀nɛↄ gbáu
ń ligↄ̃n yàasaↄ píi.
I sa'o ń á nɛ́ↄ swai
ń gbɛ̀ lookpaaↄ zíɛo.
6 A zɛ ń swa gbɛ̀ pↄ́lↄpↄlↄↄ,
ↄ̃mɛ á baa ũ.
Ao, ampiↄ a itↄ̃̀lɛmá,
a ń gbá pↄ́wɛnti.
Lá màaɛ, má gí tↄsiiwáe?
7 A dↄɛ'ĩikɛkĩi kɛ̀kɛ sĩ̀sĩ lɛsĩ musu,
wekĩi i dɛdɛ gɛ sa'ou.
8 I á zeeↄ pɛ́lɛ kpɛ́ kpɛɛlɛli saɛ.
A pãkpàmazi,
a á zwãa wòlowá,
a dɛdɛ a da á wúlɛkĩi yàasaa.
A lɛdoũkɛ̀ ń á yenzideↄ,
a wulɛńnↄ, a ↄlìa ń plɛi.
9 A nísi gbɛ̃̀wá,
a fɛlɛ ń kibɛgɛtao,
a tulalelɛ̀ maamaa.
A a zĩnaↄ zĩ̀ bùsu zã̀zãu,
a ázĩa bùsa e bɛdau.
10 A ázĩa kpàsa ń tá dasi oao,
i dↄ̃ kɛ́ a zɛ́ kuoo.
A ázĩa lɛ̀ ń láo, ↄ̃ á yɛ̃̀ɛɛ i láao.
11 Dé álɛ bílikɛwà álɛ vĩakɛɛ̀
ↄ̃ a fɛlɛ ń mↄafilioi?
Ma yã́ i dↄáguo,
i ma yãda á sↄ̃uo.
Kɛ́ ma nilɛ à gɛ̃̀gɛ̃ yã́i
álɛ vĩakɛmɛɛoa?
12 Má á yãnakpaa ázĩawa ń á yãkɛao ɛɛkaɛ́ á ↄzĩ,
a kã́fĩakɛɛ́o.
13 Tó a wɛ̃na wii lɛ̀,
á zĩadↄ̃abↄ pↄ́ á kã̀aaↄ á bↄ mɛ̀!
Aa gɛ̃ ń ĩ́anao píi,
baa lɛ́'ĩana a ń sɛ́lɛ.
Gbɛ̃́ pↄ́ nàmazi mɛ́ a bùsu túbible,
ↄ̃mɛ a gↄ̃ ma gbɛ̀sĩsĩ pↄ́ a kua adoa vĩ.
Lua gbɛ̃́ↄ gbã́gbãa
14 Dii mɛ̀: À zɛ́kpa! À zɛ́kpa!
Àli miↄnaↄ bibi!
À pↄ́ pↄ́ wa gɛ̃nalɛwà gága ma gbɛ̃́ↄ zɛ́u!
15 Asa ma Lua Musude má dɛńla,
má kú gↄↄpii mɛ́ ma tↄ́ kua adoa.
Ma mɛ̀: Ma bɛ ku gulɛsĩ pↄ́ a kua adoau,
má kú lↄ ń nↄ̀sɛniɛ sùuudeo.
Mi sùuudeↄ gba wɛ̃ni dafu,
mi nↄ̀sɛniɛdeↄ gba sↄ̃.
16 Máↄ yã́gagańnↄ láasaio,
ma pↄ aↄ paańzi gↄↄpiio.
Tó màaɛ, ma pↄkɛaↄ yɛ̃̀ɛɛ a láa,
an ĩ́an wɛ̃nide pↄ́ bↄ̀ ma kĩ́i a gɛ̃zɛa.
17 An gbɛ̃ble'ai tàae mɛ́ ma pↄ fɛ̃̀,
ↄ̃ ma ń gbɛ̃́ ma ulɛnɛ́ ń pↄkpɛ̃nɛo,
ↄ̃ aa gì bↄ̀ ma kpɛ,
aa ń pↄeã zɛ́ sɛ̀.
18 Baa kɛ́ ma ń yãkɛaↄ è màa,
má ń gbã́gbã, má ń tàlakpa,
má ń sↄ̃ níninɛ́ vlɛ̃́vlɛ̃.
19 Má tó ma sáaukpaa aↄ dↄ ↄↄlↄnapiↄ lɛ́u.
Ma Dii ma mɛ̀ má aafia kpá
gbɛ̃́ pↄ́ kú zã̀ↄ ń gbɛ̃́ pↄ́ kú kãiↄwa,* Ɛfɛ 2.17
mí ń gbã́gbã.
20 Vãikɛnaↄ dɛ lán ísia í pãpãakↄ̃wawa.
A í líↄ ku kílikilio,
a ikooaↄ ì fɛlɛ ń pɛ̀lɛao ń gbãsĩo.
21 Ma Dii ma mɛ̀
vãikɛnaↄ aaↄ aafiao.