54
Yelusalɛũ dafu
1 Ma Dii ma mɛ̀,
n fĩi pↄ́ ni nɛ'io,
koo pũna ń pↄna wiio.
N gbɛ̃́ pↄ́ ni nↄwãwãkɛo, gulakɛ.
Asa n gbɛ̃́ pↄ́ n gↄ̃ pãkpànzi,
n nɛ dasi aↄ dɛ nↄɛ pↄ́ a gↄ̃ aɛdↄ̀wà pↄ́a.* Gal 4.27
2 Ǹ n zwã̀akpɛ gu kã́fĩ,
ǹ a zwãa yàasa kṹ,
ǹ a ba gbã̀akũ,
ǹ a líↄ pɛ́lɛ gíũgiũ.
3 Asa ńyↄ̃ ↄta ↄplaai ń zɛɛo,
n gbɛ̃́ↄ buiↄ bùsu símá,
aai zↄ̃lɛ ń wɛ̃́lɛ ziaↄu.
4 Ńsu vĩakɛo, asa wí a n kũo.
Ńsu widɛo, n gɛɛ a gↄ̃ kpa n wɛ́io.
N ɛ̀waasogↄↄ wíyã a sãngu,
n gyaable ń gɛɛo kpánwɛi yã́ a dↄngu lↄo.
5 Asa mapi n Kɛna mámɛ má n gↄ̃ ũ,
ma tↄ́n Dii Zĩgↄ̃de!
Ma Isailiↄ Bona, an Lua,
ma kua adoaɛ,
wì mɛmɛɛ dṹnia píi Lua.
6 Má n gbɛsi
lán nↄɛ pↄ́ wà pãkpài aà pↄ yàwa.
Mapi n Lua má ɛa n kṹ
lán ɛ̀waaso nↄkpama pↄ́ à gìiwa.
7 Ma n to we yãa yↄↄ gĩaɛ,
ãma má ɛa n si ma sùuu zↄ̃ↄ yã́i.
8 Kɛ́ ma pↄ fɛ̃̀, ma bↄ n kpɛ gↄↄpla,
ãma má wɛ̃nadↄ̃nɛ gbɛ̃kɛ láasai musu.
Ma Dii n Bona mámɛ má ò.
9 Lá ma lɛgbɛ̃̀ Nↄee gↄↄ,
ma mɛ̀ í a da dṹniaa lↄo,† Daa 9.11
màa ma lɛgbɛ̃̀ gbã lↄ,
ma mɛ̀ ma pↄ a fɛ̃nzi mà n lele lↄo.
10 Baa tó gbɛ̀sĩsĩↄ làa mɛ́ sĩ̀sĩↄ gbòo,
ma gbɛ̃kɛa láa n kĩ́io,
ma bàakuannↄ aafia yã́ a gbooo.
Ma Dii n wɛ̃nadↄ̃nɛde mámɛ má ò.
11 Wɛ̃́lɛ wɛ̃nade pↄ́ zàa'ĩana ì a suumpapa,
mɛ́ gbɛ̃e i n nↄ̀sɛ nínio,
má ɛa n kálɛ ń tiikↄazio,
má n ɛ̃ daalɛ safiiwa.
12 Má n bĩ́i misonaↄ kɛ ń lubiio,
má n bĩ́ibↄlɛↄ kɛ ń gbɛdiio,
má n bĩ́iↄ bo ń gbɛ̀ bɛɛɛdeↄ.‡ Zia 21.18-21
13 Ma Dii, má yãda n gbɛ̃́ↄnɛ píi,§ Zãa 6.45
n nɛ́ↄ aafia aↄ zↄ̃ↄ.
14 Yã́zɛde a n gba gbãa,
gbãamↄa gbɛ̃́ↄnɛ a zã̀ kũnnↄ.
Ńyↄ̃ↄ pↄe vĩa vĩo,
gili a gɛ̃nguo.
15 Tó wà lɛ̀lɛma, bee i bↄ ma kĩ́io,
gbɛ̃́ pↄ́ lɛ̀lɛma a mikpama.
16 Gwa! Mámɛ ma sia kɛ̀,
ì tɛ́vu ń bↄ̀ↄo,
aà ↄzĩn gↄ̃kɛbↄpia ũ.
Mámɛ ma gbɛ̃kaalɛna kɛ̀ lↄ
aà gbɛ̃́ↄ dɛdɛ.
17 Gↄ̃kɛbↄ pↄ́ wa kɛ̀ n yã́i a àikɛo.
Gbɛ̃́ pↄ́ bↄ̀bↄnnↄ, n yã́ a zↄ̃lɛwà.
Ma zↄ̀blenaↄ baan we,
má tó aa zĩble.
Ma Dii mámɛ má ò.