52
1 Vu iu, vu iu Siↄna!
Gbãa da ula ũ!
Lua wɛ̃́lɛ Yelusalɛũ,
ǹ n pↄkasa í gbiaↄ da,
gyafↄↄdeↄ ń gbãlɛnaↄ gɛ̃ ń guu lↄo.* Zia 21.2, 27
2 Yelusalɛũ, bùsu woloma,
fɛlɛ zↄ̃lɛ n báawa.
Nɛnↄn zĩ̀zↄ Siↄna,
mↄdaona polo n nↄɛ.
3 Asa ma Dii ma mɛ̀:
Ma á kpámá pã,
mɛ́ má á bo ↄ̃asai.
4 Asa ma Dii Lua ma mɛ̀:
Ma gbɛ̃́ↄ zↄblè Egipi káau,
a gbɛa sa Asiliↄ gbãamↄ̀nɛ́.
5 Ɔ̃ ma mɛ̀:
Kɛ́ bee dɛ kpelewa sa ni?
Asa wà ma gbɛ̃́ↄ sɛ̀lɛ pã,
ↄ̃ an gbãamↄnɛdeↄ ìↄ tidↄńla,
aaìↄ ma tↄbɛ̃ɛsi gↄↄpii.† Lom 2.24
6 A yã́i tò má tó ma gbɛ̃́ↄ ma dↄ̃.
Gↄↄ bee aaↄ dↄ̃ kɛ́ mámɛ ma dↄaa yã́pi ò.
Ao, mámɛ.
7 Baonakpana gbapɛlɛa gbɛ̀sĩsĩ musu maa fá!‡ Lom 10.15
Àlɛ aafia kpàwakɛ,
àlɛ baonakpa Siↄnadeↄnɛ.
Àlɛ suabayã'ònɛ́,
àlɛ mɛ an Lua mɛ́ lɛ́ kible.
8 A gudↄ̃anaↄ wiidↄ,
aalɛ kúkuakɛ sãnusãnu,
asa aa wɛsì Dii ɛa sua Siↄnalɛ.
9 Yelusalɛũ ziadeↄ,
à pũna ń gulakɛao sãnusãnu,
asa Dii Yelusalɛũ bò,
à a gbɛ̃́ↄ nↄ̀sɛ nìninɛ́.
10 Lua a a gã̀sa pↄ́ a kua adoa gbãa ↄlↄ bui píiɛ,
tↄↄlɛlɛdeↄ e píi lá wá Lua a a gbɛ̃́ↄ suaba.
11 À fɛlɛ, à fɛlɛ, à bↄ we,
ásu ↄkã pↄ́ gbãlɛawao.§ 2Kln 6.17
Á gbɛ̃́ pↄ́ á Dii kpɛ́ pↄ́ↄ sɛa,
à bↄlɛu, íↄ ku gbãlɛsai.
12 Á bↄlɛ ń leeleoo,
á tá ń bàalɛaoo,
asa Dii Isailiↄ Lua a zɛmikũɛ́,
i ɛa àↄ tɛ́ á kpɛ.
Dii zↄ̀blena lɛ̀ síiↄ̃de
13 Gwa! Ma zↄ̀blena a gwea e,
wa aà kã́fĩ, wa aà sɛ lɛsĩ,
aↄ fuańla musumusu.
14 Aà oa ↄ̃̀ↄkpà, a dɛ oa ũ lↄo,
aà mɛ lìlɛ, a dɛ mɛ ũ lↄo,
ↄ̃ aà yã́pi dìmá.
15 Màa aà yã́ a ɛa bↄ bui dasiↄ saɛ,
mɛ́ kíaↄ lɛ́ a gↄ̃ kpaaũa aà aɛ,
asa aa yã́ pↄ́ wi onɛ́ yãao e,
aa yã́ pↄ́ aai ma yãao zɛ́ dↄ̃.* Lom 15.21