47
Babɛli dúuzↄ̃a
1 Babɛli wɛ̃́lɛ lɛ́so, pila zↄ̃lɛ bùsuu,
á Kaladeↄ, à zↄ̃lɛ zĩ́lɛ kpalabaasai.
Wa oɛ́ mɛ̀zãɛ ge mɛniɛnadeↄ lↄo.
2 À á pↄ́kummusu go á mia,
í gbɛnɛ sɛ wísilↄ.
À zwãa kuluka á gbala tɛ̃a bↄ,
í gɛ̃ íu à bua swaↄwa.
3 Wa á puizi e, á asii a bↄ gupuau.
Má tↄsiwá, má á gbɛ̃e tɛ̃boo.
4 Wá Bona tↄ́n Dii Zĩgↄ̃de,
Isailiↄ Lua pↄ́ a kua adoa.
5 Dii ò Babɛlideↄnɛ:
À gɛ́ gusiau, í zↄ̃lɛ kílikili.
Wa oɛ́ kpalaↄ mide lↄo.
6 Ma pↄ pà gbɛ̃́ pↄ́ dɛ ma pↄ́ ũↄzi,
má tò wà ma gbɛ̃́piↄ kpɛ è.
Ma ń kpama, ↄ̃ ni ń wɛ̃nagwao.
Baa maezↄ̃ↄↄ, n zuu gbia dànɛ́ à tↄ̃̀má.
7 N mɛ̀ n kpalablea aↄ gɛ́ gↄↄpiiɛ.
Ń yã́piↄ kũa n nↄ̀sɛ guuo,
ni làasookɛ yã́piↄ midɛawao.
8 Yã́ɛ bee ma sa lalaside.
Ń zↄ̃lɛa báawa dↄdↄa,
n mɛ̀ n bàasio gbɛ̃e kuo,
ńyↄ̃ gyaable bauo,
ńyↄ̃ nɛga wɛ̃nakɛo.
9 Yã́ɛ bee a ń le píi gↄↄ do kóũ,
nɛgaga ń gyaableao.* Zia 18.7-8
Baa ń n gbɛ̃kↄↄlɛkɛa zↄ̃ↄo
ń n pↄdama pãsĩo,
yã́pi a ń le, aↄ fòona vĩo.
10 Ń n yãvãikɛ náai vĩ,
n mɛ̀ gbɛ̃e lɛ́ n eo.
N ↄ̃nↄ ń n dↄ̃ao n mi lìaa,
ↄ̃ ni o n nↄ̀sɛu n bàasio gbɛ̃e kuo.
11 Músi a gɛ̃nzi,
ńyↄ̃ a yↄ̀ↄ dↄ̃ ǹ kɛo.
Kìsia a n le, aↄ kɛkɛa vĩo,
ásoo pↄ́ ń a fãn vĩo a n le lɛzasai.
12 Wɛtã ǹyↄ̃ gɛ́ ń n pↄdaamáo ń n gbɛ̃kↄↄlɛkɛa
pↄ́ dɛ n ↄzĩ ũ za n nɛ́fɛ̃nɛn zĩ́o.
Tó a fↄ̃ àikɛnɛ bɛ!
Tó a fↄ̃ to ǹ vĩadadańzi bɛ!
13 N nzĩa kpàsa ń yãgbɛaama dasio.
To musu tàasikanaↄ ń saanyãdↄ̃naↄ
ń mↄ àsi baokpanaↄ sunɛ ń ń yã́o,
aa n suaba ń yã́ pↄ́ lɛ́ mↄmao.
14 Aa dɛ lán sɛ̃̀ giiwa, tɛ́ a kṹmá,
aa ńzĩa si tɛ́vua gbãawao.
Tɛ́ pↄ́ wa kpakpa no,
tɛ́ pↄ́ wa zↄ̃lɛ a saɛ no.
15 Màa gbɛ̃́ pↄ́ tɛ́tɛnzi za n nɛ́fɛ̃nɛn zĩ́
n nzĩa kpàsa ń yã́iↄ gↄ̃.
Aa fãaa aaↄ liaazↄ̃,
an kee a fↄ̃ n bↄo.