Bibeli Luayãtaalá Isaia 8

Pↄ́ↄnaaagↄ̃ↄ Pↄ́ↄsɛlɛkpakpa

1 Dii òmɛɛ mà taala kooa zↄ̃ↄ sɛ mà yã́ɛ bee kɛ̃wà: Pↄ́ↄnaaagↄ̃ↄ Pↄ́ↄsɛlɛkpakpa. 2 Ma sa'ona Ulia ń Bɛlɛkia nɛ́ Zakalio sìsi aaↄ dɛmɛɛ yã́pi seeladeↄ ũ. 3 Kɛ́ ma wulɛ ń ma nↄ ãnabio, à nↄsì à nɛ'ì gↄ̃ɛ ũ. Ɔ̃ Dii òmɛɛ mà tↄ́kpaɛ̀ Pↄ́ↄnaaagↄ̃ↄ Pↄ́ↄsɛlɛkpakpa. 4 E àↄ gɛ́ Naa ń Baao oi dↄ̃, Asiliↄ kía a Damasideↄ àizɛɛↄ naaa, a Samalideↄ pↄ́ↄ sɛ́lɛ. 5 Dii òmɛɛ lↄ à mɛ̀:

6 Gbɛ̃́ɛ beeↄ sakà Siloe* í pↄ́ lɛ́ bàalɛ busɛbusɛgu,

ↄ̃ aa zɛ̀ ń Lezinio ń Lemalia nɛ́o.

7 A yã́i tò má ń pá ń Uflata í zↄ̃ↄ pↄ́ a sĩ̀sĩ sɛ à daguao,

ↄ̃mɛ Asiliↄ kía ń a gbɛ̃́ gbiaↄ ũ.

8 A pa gɛ̃ Yuda bùsuzi,

i dagua, i bùsupi kũ a nↄɛ.

Ípi yàasa lɛ́ da ń bùsua píi, Ɛmanuɛli.

9 Buipãleↄ, à zĩ̀ sↄukɛ, wi á wíwi.

Bùsuzãzãdeↄ, à swã́kpa!

À gↄ̃kɛbↄↄ sɛ́lɛ, wi á wíwi,

À gↄ̃kɛbↄↄ sɛ́lɛ, wi á wíwi.

10 Baa tó a lɛkpàaĩ, pãɛ.

Baa tó a yãdìlɛ ń kↄ̃o, a kɛo,

asa Lua kúwanↄɛ.

Vĩakɛa Luaɛ

11 Dii a ↄ gbãa nàa à yã'òmɛɛ, à lɛdàa à mɛ̀ másu gbɛ̃́piↄ kɛa kɛo. À mɛ̀:

12 Yã́ pↄ́ aalɛ gwa lɛkpaaĩnzi yã́ ũ,

ńsu dilɛ màao.

Yã́ pↄ́ aalɛ vĩakɛɛ̀, ńsu kɛɛ̀o.

Ńsu to iwãa ka n pↄao.

13 Ǹyↄ̃ Dii Zĩgↄ̃de yãma ado,

ↄ̃mɛ kũ̀ ǹ vĩakɛɛ̀.

Aà yã́ mɛ́ dɛ à iwãa ka n pↄa.

14 Ɔ̃mɛ aↄ dɛ n ulɛkĩi ũ,

mɛ́ aↄ dɛ Isaili lɛɛ plaↄnɛ

gbɛ pↄ́ ì to wà gɛ̃mbↄlɛwà ũ,

gbɛsi pↄ́ ì to aa fu ũ.†

Aↄ dɛ Yelusalɛũdeↄnɛ bai ũ.

15 An daside a gɛ̃mbↄlɛwà,

aa fu, aai kɛ kɛ́lɛkɛlɛ.

Aa si baipiu, i ń kṹ.

16 Má pↄ́ fĩ yã́pi taalawa seela ũ,

má kã́n'ↄ lɛ́ yãdanɛpiwa ma ìwaↄnɛ.

17 Ma wɛ́ dↄ Dii pↄ́ mikpɛdↄ̀ Yakↄbu buiↄnɛzi,

má aà náai vĩ.

18 Má kɛ́, ń nɛ́ pↄ́ Dii kpàaↄ.‡ Wá dɛ Isailiↄnɛ àsi pↄ́ Dii Zĩgↄ̃de pↄ́ kú Siↄna gbɛ musu ò seela ũ.

19 Tó wa òɛ́ à gɛ́ wɛlɛnde ge gɛ̀sisina pↄ́ aaìↄ yã'o ń kòlou hũuↄ kĩ́i, yãgbɛaa á Luawa mɛ́ maao lò? Wì gbɛ̃́ bɛ̃́ɛ àsi gbɛa gɛↄwa yã̀? 20 À gɛ Lua ikoyãdanɛ gwa. Tó an yã́ i kpaaĩòo, gu i dↄnɛ́ yãao.

21 Aa bã̀abãabo ń bùsuu, nↄana a ń dɛ, aa kɛ wɛ̃na. Tó an yɛ̃̀ɛɛ làa, an pↄ a pa, aai ń kía ń ń diio ká. Aa musu gwa, 22 aa zĩ́lɛ gwa, yã'ↄ̃ma mɛ́ a ń le. Aaↄ ku gusia ń pↄsia zↄ̃ↄo guu, aai gↄ̃ gusia níiniiu. 23 Ãma gbɛ̃́ pↄ́ kú yã'ↄ̃maupiↄ aaↄ ku gusiapiu gↄↄpiio. Wà Zabulↄni buiↄ ń Nɛfatali buiↄ bùsu kpɛbↄ̀ yãa, ãma wa Galile bùsu pↄ́ buipãleↄ kuu kpɛla zia za ísialɛu e à gɛ pɛ Yuudɛ̃ baawa.

Isaia
<
8
>

*8:6 Zãa 9.7

†8:14 1Piɛ 2.8

‡8:18 Ɛbɛ 2.13