Bibeli Luayãtaalá Zĩnaↄ yãkɛaↄ 2

Lua Nisĩna mↄa

1 Kɛ́ Pãteko* dikpɛgↄↄ kà, aa ku gudoũ ḿpii. 2 Kã́ndo aa kↄ̃fĩ mà à bↄ̀ luabɛ lán zàa'ĩan gbãawa, ↄ̃ à kpɛ́ pↄ́ aa zↄ̃̀lɛu wã̀. 3 Aa pↄ́ è lán tɛ́lɛpiↄnaↄwa, aa fã̀aa nàna ń baade miwa. 4 Lua Nisĩna dìnɛ́ ḿpii, ↄ̃ aa nà yãebui'oawa lá Nisĩnapi dànɛ́ aa owa.

5 Yudaeↄ ku Yelusalɛũ we, luayãmana pↄ́ aa bↄ̀ dṹnia bùsu píi guuↄ ũ. 6 Kɛ́ aa ń zↄapi mà, aa kã̀aańzi dasidasi, ↄ̃ aa bílikɛ̀, kɛ́ aa mà aalɛ ń baade píi buiyã'ò. 7 Yã́pi ń kṹ gbãa à bↄ̀ ń saɛ aa mɛ̀: Yã'onapiↄá Galiledeↄnɛ píio lò? 8 Àkɛa wá mà aalɛ wá baade buiyã'òi? 9 Paatiↄ ń Mɛdɛↄ ń Elaũↄn wá ũ ń gbɛ̃́ pↄ́ kú Mɛsↄpↄtamiↄ ń Yudeo ń Kapadosio ń Pↄ̃ntuo ń Azio 10 ń Filizio ń Pãmfilio ń Egipio ń Libii bùsu pↄ́ kú Silɛni saɛo ń gbɛ̃́ pↄ́ bↄ̀ Lomaↄ. 11 Yudaↄ ń gbɛ̃́ pↄ́ aa ń zɛ́ sɛ̀ↄn wá ũ ń Kɛlɛtiↄ ń Laalubuↄ, ↄ̃ wá mà, aalɛ Lua yãbↄnsaɛkɛaↄ o ń wá baade buiyãↄ. 12 Yã́pi ń kṹ gbãa, aa bílikɛ̀, aalɛ kↄ̃ lala aa mɛ̀: Yã́pi dɛ kpelewan wei? 13 Gbɛ̃eↄ sↄ̃ aalɛ ń láanikɛ aa mɛ̀: Í mɛ́ ń kã́.

Piɛɛ waasokɛa

14 Ɔ̃ Piɛɛ fɛ̀lɛ zɛ̀ ń a gbɛ̃́ kĩni gbɛ̃ↄn kuɛdoↄ, à yã'ò gbã́ugbãu à mɛ̀: Á Yudaↄ ń gbɛ̃́ pↄ́ kú Yelusalɛũↄ píi, tó á ye yã́pi dↄ̃, à swã́kpa ma yã́i. 15 Í i gbɛ̃́piↄ kã lá álɛ ewao, asa kↄↄ mↄ̀ kɛ̃okwiɛ. 16 Ãnabi Yoɛli dↄ̀aa yã́ɛ bee ò à mɛ̀:

17 Lua mɛ̀ gↄↄgbɛzãzĩ

má a Nisĩna pisi gbɛ̃́piiɛ,

á nɛgↄ̃ɛↄ ń á nɛnↄɛↄ i ãnabikɛkɛ,

á ɛ̀waasoↄ i wɛ́pungu'e,

á maezↄ̃ↄↄ i yã́ↄ e iu.

18 Gↄↄbeezĩ má a Nisĩna pisi

ma zↄ̀blenaↄnɛ gↄ̃ɛↄ ń nↄɛↄ píi

aai ãnabikɛkɛ.

19 Má seelaↄ kɛ musu,

má yãbↄnsaɛↄ kɛ dṹniau,

au ń tɛ́o ń tɛluo aↄ ku.

20 Ĩatɛ̃ a siakũ,

mↄvua a tã lán auwa

e Dii mↄgↄↄ zↄ̃ↄ gawide àↄ mↄ́,

21 Dii sìsinaↄ i bↄ píi.†

22 Isailiↄ, à yã́ɛ bee ma. Lá á dↄ̃ ázĩawa, Lua tò a Yesu Nazalɛti dɛa a gbɛ̃́ ũ seela è dabudabuↄ ń yãbↄnsaɛ pↄ́ a tò Yesupi kɛ̀ á guuↄ yã́i. 23 Lua zɛ̀ò a pↄeã ń a dↄ̃ao guu kɛ́ wà aà kpáwá, ↄ̃ á tò luayãdↄ̃nsaiↄ aà pàliwa aa aà dɛ̀.‡ 24 Ɔ̃ Lua ga ba pòlowà à aà vù,§ asa a zɛ́ kú kɛ́ ga fↄ̃ àↄ aà kũao. 25 Asa Davidi aà yã'ò à mɛ̀:

Miↄ Dii e ma wɛ́u gↄↄpii,

lá a ku ma ↄplaai, má kpaguao.

26 A yã́i ma pↄ ìↄ na,

ma nↄ̀sɛ ìↄ yáalↄ,

ma wɛ́ dↄi baa ma mɛ aↄ ku aafiaɛ,

27 asa ńyↄ̃ ma to miauo,

ńyↄ̃ wei n gbɛ̃́ pↄ́ a kua adoa yaikɛo.

28 N ma ka wɛ̃ni zɛ́wa,

n kĩ́i pↄna ìↄ pɛɛau.*

29 Ma gbɛ̃́ↄ, má fↄ̃ wá dezi káau Davidi yã'oɛ́ wásawasa. À gà, wà aà vĩ̀, aà mia ku wɛ̃́lɛu la e ń a gbão. 30 Aà ãnabikɛ guu a dↄ̃̀ kɛ́ Lua lɛgbɛ̃̀ɛ à mɛ̀ á a buie kpa a kpalau.† 31 Ɔ̃ Davidi dↄ̀aa Mɛsii vua yã'ò à mɛ̀:

Lua a aà to miauo,

a wei aà mɛ yaikɛo.

32 Yesupi ↄ̃ Lua aà bↄ̀ gau. A seeladeↄn wá ũ wápii. 33 Zↄ̃lɛa a Mae Lua ↄplaai à aà Nisĩna pↄ́ à a lɛgbɛ̃̀wɛ̃ɛ èwà, ↄ̃ a pìsiwɛ̃ɛ. Yã́ pↄ́ álɛ e mɛ́ álɛ ma tiaɛ bee bↄ̀ weɛ. 34 Asa i kɛ Davidi mɛ́ fɛ̀lɛ gɛ̀ luabɛo, à mɛ̀:

Dii ò ma Diiɛ aà zↄ̃lɛ a ↄplaai

35 e aà aà ibɛɛↄ kɛɛ̀ aà gbadibↄ ũ.‡

36 Isailiↄ, àↄ dↄ̃ sã́asã kɛ́ Yesu pↄ́ a aà pàliwa ↄ̃ Lua aà dìlɛ Dii ũ, Mɛsii ũ.

37 Kɛ́ aa yã́pi mà, à ń sↄ̃ zↄ̃̀, ↄ̃ aa Piɛɛ ń zĩna kĩniↄ là aa mɛ̀: Gbɛ̃́ↄ, wá sɛ́ kpelewa ni? 38 Ɔ̃ Piɛɛ ònɛ́: Á baade nↄ̀sɛlilɛ, í da'ilɛkɛ ń Yesu Kilisi tↄ́o, á duuna i kɛ̃́wá, Lua i á gba a Nisĩna. 39 Asa lɛ́ pↄ́ Lua gbɛ̃̀pi dɛ á pↄ́ ũɛ ń á nɛ́ↄ ń gbɛ̃́ pↄ́ kú zã̀ↄ, gbɛ̃́ pↄ́ Dii wá Lua a ń sɛ́piↄ píi. 40 À yãpãleↄ ònɛ́ dasi, à nàɛmá à mɛ̀: À ázĩa bↄ gbãgbɛ̃ vãiɛ beeↄ guu. 41 Ɔ̃ gbɛ̃́ pↄ́ aa aà yã́ sìↄ da'ilɛkɛ̀. Zĩbeezĩ ↄ̃ wà kã̀fĩ ń guu gbɛ̃ↄn ↄ̀aasↄsↄo lɛɛ àaↄ̃ (3.000).

Yesu náaikɛnaↄ kua ń kↄ̃o

42 Aa laaidↄ̀ zĩnaↄ yãdaanɛ́wa ń gbɛ̃kɛkɛakↄ̃ɛo ń Dii blɛbleao ń wabikɛao. 43 Zĩnapiↄ lɛ́ dabudabuↄ ń yãbↄnsaɛↄ kɛ, ↄ̃ vĩa gbɛ̃́pii kũ̀. 44 Dii náaikɛnaↄ píi gãli doũ. An pↄvĩa dɛ ampii pↄ́ ũɛ. 45 Tó aa ń pↄvĩaↄ yìa, aaì a ↄ̃a kpakↄ̃wa lá gbɛ̃́ a bↄↄlɛ vĩwa. 46 Lá gu lɛ́ dↄ aaìↄ kↄ̃ kãaa Lua ua ń lɛdoũo, aaìↄ Dii blɛ ble kↄ̃ bɛ, aaìↄ pↄble ń pↄnao ń nↄ̀sɛmɛndoo. 47 Aaìↄ Lua táasilɛ mɛ́ aaìↄ na ń gbɛ̃́piio. Dii ìↄ gbɛ̃́ pↄ́ álɛ ń suabaↄ kã́fĩ ń guu lá gu lɛ́ dↄ.

*2:1 Lev 23.15-16

†2:21 Yoɛ 3.1-5

‡2:23 Luk 23.33

§2:24 Luk 24.6

*2:28 Soũ 16.8-11

†2:30 Soũ 132.11, 2Sam 7.12-13

‡2:35 Soũ 110.1