1 Dikiri, matɛn wiki lɛ́nyĩ, ǹ kɛ likalika,

tó ma n sisi, ǹ sã kpá ma yãi.

2 Ǹ tó ma aduakɛna ká n kĩnaa

lán turaretiti túsukpɛ bà.

Ǹ tó ma ↄ dↄna musu gↄ̃ dennɛ

sa ↄkↄsi ona ũ.

3 Dikiri, ǹ lɛ́sↄ damɛnɛ ma lɛ́nɛ,

ǹ tó mà a lɛ́ fↄ̃.

4 Ǹsun tó yã vãni ma swɛ̃̀ gátɛro,

de màsun kakara kũ yãvãnikɛrinↄ

ń yãvãnikɛnaa gũnlo,

de màsun ń pↄ́ nnanↄ ble kũńworo.

5 Tó gbɛ̃ mana ma lɛ, à gbɛ̃kɛ kɛ̀mɛnɛmɛ!

Tó à kpã̀kɛ̃mai, mani gíiro,

nísi kũ a kpɛ̃̀oomɛ.

Madìgↄ̃ adua kɛ baala'i

de gbɛ̃ vãninↄ yãkɛna gboro.

6 Tó ò ń gbãnadenↄ kà sĩ̀sĩgororo wɛ̀ɛn,

yãvãnikɛrinↄ ni sí kũ ma yã mɛ́ à nna.

7 Lákũ òdi yàkaa para a bùru fãkↄ̃a nà,

lɛn ń wá nigↄ̃ fãkↄ̃ana ń mira lɛ́a lɛ.

8 Dikiri Luda, mↄkↄ̃mmɛ ma wɛ́ dↄnyĩ,

ma nanyĩ, ǹsun ma kpá gairo.

9 Ǹ ma bo tankutɛ kũ ò kpàkpamɛnɛnↄn,

bà kũ yãvãnikɛrinↄ kpàkpamɛnɛnↄ.

10 Ǹ tó gbɛ̃ vãninↄ si ń zĩda bàa gũn,

makũ sↄ̃ mani gɛ̃tɛ aafia.