1 I swɑɑ dɑkio ye nɛ, Yinni Gusunɔ nɑ geruɑ. Nɑ nɛɛ,

Isirelibɑ, i seewo

i kɑ tii yinɑ guunu kɑ gungunun wuswɑɑɔ.

2 Bɛɛ guunu, i swɑɑ dɑkio.

Bɛɛ tem kpɛɛkpɛɛku dɑmginu,

nɛ, Yinni Gusunɔ nɑ nɛn tɔmbu tɑɑrɛ wɛ̃ɛmɔ.

Nɑ kĩ n bu siribu soku.

3 Bɛɛ Isirelibɑ, bɛɛ nɛn tɔmbu, kɔ̃sɑ mbɑ nɑ bɛɛ kuɑ.

Mɑ sɔɔrɑ nɑ derɑ i wɑsirɑ.

I mɑn wisio.

4 I mɑn tɑɑrɛ wɛ̃ɛmɔ yèn sɔ̃ nɑ bɛɛ Isirelibɑ yɑrɑ sɑɑ Egibitin di?

Ǹ kun mɛ yèn sɔ̃ nɑ bɛɛ yɑrɑ sɑɑ yorun di?

Ǹ kun mɛ yèn sɔ̃ nɑ bɛɛ kpɑro beni gɔriɑmɑ, Mɔwisi kɑ Aroni kɑ Mɑriɑmu?

5 Bɛɛ nɛn tɔmbu, i yɑɑyo kɔ̃sɑ ye Bɑlɑki Mɔɑbun sinɑ boko u bwisikɑ u bɛɛ kuɑ.

I mɑɑ yɑɑyo ye Bɑlɑmu Beorin bii u nùn wisɑ.

Nɑ bɛɛ yɔ̃siri bɛɛn sɑnum sɔɔ sɑɑ Sitimun di sere Giligɑliɔ.

Mɑ i nɛn durom wɑ mɛ nɛ, Yinni Gusunɔ nɑ bɛɛ kuɑ.

6 Kɛ̃ɛ terɑ̀ kon kɑ Yinni Gusunɔ wi, wi u kpuro kere dɑɑwɑ

nɑ̀ n dɔɔ win sɑ̃ɑ yerɔ.

Kɛ̃ɛ terɑ̀ ko nɑ n nɛni n kɑ nùn yiirɑ.

Nɑɑ wɔ̃ɔ tiɑgiɑ kon kɑ nùn yɑ̃ku dɔ̃ɔ mwɑɑrɑrugiru kuɑ?

7 Yinni Gusunɔ u yɑ̃ɑ kinɛ dɑbi dɑbinun bukɑtɑ mɔ?

Gum kotosun bukɑtɑwɑ u mɔ?

Nɛn bii gbiikoowɑ kon nùn wɛ̃ u sere mɑn nɛn torɑnu suuru kuɑ?

8 Aɑwo, Yinni Gusunɔ u tɔmbu geɑ sɔ̃ɔsi ye u rɑ kɑ̃.

Ye u bu kɑnɑmɔ bu ko,

yerɑ bu ben berusebu wɛ̃ ye n sɑ̃ɑ begiɑ.

Kpɑ bu bu kĩru sɔ̃ɔsi.

Kpɑ bu wi, Gusunɔ ben Yinni swĩi kɑ tii kɑwɑbu.

9 Yinni Gusunɔ u kɑ Yerusɑlɛmugibu yɑ̃.

Wi u bwisi mɔ, u koo nùn nɑsiɑ.

Bɛɛ Yudɑbɑ, i de nɛn siribu bu bɛɛ yeeri.

10 Kon wurɑ tɔn kɔ̃so u dukiɑ gure win dirɔ kɑ gbɛnɑ?

Kpɑ u n sɑkɑku mɔ ge nɑ ǹ kĩ?

11 I tɑmɑɑ wi u kilo weesugiɑ mɔ u dɛɛre?

12 Wee bɛɛn gobigibu bɑ tɔmbu dɑm dɔremɔ,

bɑ rɑ n weesu mɔ̀.

Kpɑ bɑ n gɑbu nɔni wɔ̃kumɔ kɑ ben gɑri.

13 Tɛ̃, nɑ sɔɔru kpɑ n kɑ bɛɛ sɛ̃suku bɛɛn durum sɔ̃,

kpɑ i kɑm ko.

14 I ko i di, ɑdɑmɑ i ǹ debumɔ.

I ko i nɔɔgiru suɑ gɔ̃ɔrun sɔ̃.

Mɛyɑ n ǹ koorɔ i gɑ̃ɑnu bere.

Ì n mɑɑ gɑ̃ɑnu beruɑ, tɑbɑ kon kɑ ye kɑm koosiɑ.

15 I ko i duure, ɑdɑmɑ i ǹ gɛ̃ɛmɔ.

I ko i olifi gɑmɑ,

ɑdɑmɑ i ǹ wɑsi i yen gum sɑwɑ.

I ko i resɛm tɑm wĩɑ,

ɑdɑmɑ i ǹ wɑsi i mu nɔ.

16 Domi i sinɑ boko Omirin dɑɑ kɔ̃sɑ sɑɑrimɔ kɑ sere mɑɑ Akɑbugiɑ.

I ben dɑɑ sɑɑrimɔwɑ mɑm mɑm.

Yen sɔ̃nɑ kon de bɛɛn wuu gu ko bɑnsu.

Kpɑ n de bu bɛɛ yɛ̃ɛ.

I ko i sekuru wɑ bɛɛ kpuro nge mɛ nɛn tɔmbu bɑ rɑ wɑ.